ZAUM Maarifçilik İctimai Birliyi Binəqədi rayonunda ictimai forum təşkil edib

Bakı:

13 °C

88 %

3 m/s

Əlaqə

AZ RU EN

Ana səhifə / Siyasət / ZAUM Maarifçilik İctimai Birliyi Binəqədi rayonunda ictimai forum təşkil edib

ZAUM Maarifçilik İctimai Birliyi Binəqədi rayonunda ictimai forum təşkil edib

20.06.2009 [11:28]

İctimai Birliyin məqsədi QHT-dövlət-vətəndaş əlaqələrini möhkəmləndirmək, QHT-lərlə bağlı mövcud olan mənfi stereotipləri dağıtmaqdır
Dünən YAP Binəqədi rayon təşkilatının qərargahında ictimai forum keçirilib. Azərbaycan Respublikasının Prezidenti yanında Qeyri Hökumət Təşkilatlarına Dövlət Dəstəyi Şurasının maliyyə dəstəyi, “Zəngin Azərbaycan Uğrunda Mübarizə” Maarifçilik İctimai Birliyinin (ZAUM) və Binəqədi rayon İcra Hakimiyyətinin birgə təşkilatçılığı ilə baş tutan tədbirdə dövlət və QHT-lərin birgə əməkdaşlığı formalarının müzakirəsi keçirilib.
Tədbirdə çıxış edən beynəlxalq təlimçi Sevda Məmmədli forumun keçirilməsinin məqsədindən və funksiyalarından danışıb: “İnkişaf etmiş ölkələrin çoxunda ictimai xidmətin həyata keçirilməsində, eləcə də, yerli problemlərin həllində QHT-lərin xidmətindən və kadr ehtiyatlarından geniş istifadə edilir, hər iki tərəf işin bütün mərhələlərində iştirak imkanına malik olur”.
Fikirlərini tədbir iştirakçıları ilə bölüşən ZAUM-un rəhbəri İradə Əliyeva söyləyib ki, 1992-ci ildə “İctimai-birliklər haqqında”, 2000-ci ildə isə “İctimai birliklər və fondlar haqqında” qanunların qəbulundan sonra ölkəmizdə QHT-lərin fəaliyyəti genişlənib: “İldən-ilə belə qurumların sayı artır. Prezident İlham Əliyevin 2007-ci ildə imzaladığı Fərmanla Prezident yanında QHT-lərə Dövlət Dəstəyi Şurasının yaradılması bu sahənin inkişafına böyük təkan verdi”.
Onun sözlərinə görə, “QHT-dövlət əməkdaşlığının rayon icra strukturları səviyyəsində təkmilləşdirilməsinin təşkili” layihəsinin əsas məqsədi QHT-dövlət-vətəndaş əlaqələrini möhkəmləndirmək, QHT-lərlə bağlı mövcud olan mənfi stereotipləri dağıtmaqdır.
Layihənin rəhbəri İradə Əliyevanın sözlərinə görə, onlar bundan sonra Bakının daha 4 rayonunda - Nizami, Sabunçu, Nəsimi, Əzizbəyov rayonlarında da müzakirələr təşkil edəcəklər. Sonrakı mərhələdə layihənin regionlarda da həyata keçirilməsi gözlənilir.
Binəqədi rayon İcra Hakimiyyəti başçısının I müavini Eldar Ağayev söyləyib ki, ölkədə yaradılmış plüralist şərait nəticəsində 3000-dən artıq QHT fəaliyyət göstərir. O, qeyd edib ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yaradılması bu sahənin daha da təkmilləşməsinə gətirib çıxarıb: “Binəqədi rayonunda da bir sıra QHT-lər, ictimai birliklər fəaliyyət göstərir. Rayon İcra Hakimiyyəti isə bu təşkilatların normal fəaliyyət göstərməsi üçün şərait yaradır”.
YAP Binəqədi rayon təşkilatının sədri Nəbi Xəlilov isə QHT nümayəndələri ilə müntəzəm olaraq görüşlərin keçirildiyini və onlara işlərinin təşkilində böyük köməkliklərin göstərildiyini söyləyib.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının məsul işçisi Vüsal Quliyev QHT-lərə olan yüksək dövlət qayğısından danışıb: “Qeyri-Hökumət Təşkilatlarının fəaliyyətinin düzgün istiqamətdə qurulması vətəndaş cəmiyyətinin formalaşmasına müsbət təsir göstərir. Bu baxımdan da dövlət bu sahəyə xüsusi diqqət ayırır”.
Binəqədi rayon İcra Hakimiyyətinin İctimai-siyasi şöbəsinin müdiri Natiq Əliyev isə söyləyib ki, 2007-ci ilin dekabr ayının 12-də Prezident İlham Əliyev tərəfindən imzalanmış Fərman bu sahəyə böyük canlanma gətirib. O, rayonda fəaliyyət göstərən QHT-lər, ictimai birliklər barədə geniş məlumat verib.
Sonra ictimai forumda geniş müzakirələr aparılıb.
Ramil VƏLİBƏYOV

Paylaş:

Baxılıb: 1372 dəfə