Bu gün İranda növbəti prezident seçkiləri keçirilir

Bakı:

20 °C

64 %

3 m/s

Əlaqə

AZ RU EN

Ana səhifə / Siyasət / Bu gün İranda növbəti prezident seçkiləri keçirilir

Bu gün İranda növbəti prezident seçkiləri keçirilir

12.06.2009 [08:50]

Seçicilərin 89 faizinin səsvermədə iştirak edəcəyi gözlənilir
Bu gün İran İslam Respublikasında növbəti prezident seçkiləri keçirilir. Məlum olduğu kimi, seçkilərdə 4 namizəd mübarizə aparır. Konstitusiyanın Mühafizə Şurasının qərarına əsasən, namizəd kimi qeydə alınan hazırkı prezident Mahmud Əhmədinejad, keçmiş baş nazir Mirhüseyn Musəvi, İran İnqilab Keşikçiləri Korpusunun keçmiş komandanı Möhsün Rzayi və Milli Etimad Partiyasının rəhbəri Mehdi Kərrubi təbliğat üçün ayrılan vaxtdan səmərəli istifadə ediblər. Xarici müşahidəçilər iranlı seçicilərin bu seçkilərə xüsusi maraq göstərdiyini deyirlər. Bu da səbəbsiz deyil. İran İslam Respublikasının tarixində bu ilk seçkilərdir ki, namizədlər mübarizədə televiziya debatları formatından istifadə ediblər. Həmin debatlar zamanı namizədlər tərəfindən səslənən fikirlər sadə seçicinin prosesə marağını daha da artırıb. Buna görə də, bu gün İranda seçici fəallığının görünməmiş həddə olacağı ehtimal edilir. Xarici mətbuatın məlumatlarına əsasən, seçicilərin 89 faizi səsvermədə iştirak etməyə hazırdır. Əksər ekspertlərin qənaətinə görə, bu seçkini maraqlı edən digər məqam namizədlərin müxtəlif spektrləri əhatə etməsi ilə bağlıdır. Məsələn, Mehdi Kərrubinin Loristanın bölgəsi də daxil olmaqla müəyyən bir elektorata malik olduğu deyilir. İran İnqilab Keşikçiləri Korpusunun keçmiş baş komandanı Möhsün Rzayi isə Xuzistanda yaşayan etnik bəxtiyarilərdəndir.
Hazırki prezident Mahmud Əhmədinejada gəlincə, tərəfdarları onun ölkənin əksər kəsimləri tərəfindən dəstəkləndiyini bildirirlər. Qeyd olunur ki, Əhmədinejadın Qərb, xüsusilə də Birləşmiş Ştatların təzyiqləri qarşısında geri çəkilməməsi onun mühafizəkarlar arasındakı nüfuzunu daha da artırıb. Eyni zamanda, ölkədə əsas söz sahibi olan din xadimlərinin də indiki prezidenti dəstəklədikləri söylənilir. Lakin bu seçkilərdə Mahmud Əhmədinejada əsas rəqib sayılan Mirhüseyn Musəvi həmin fikirlərlə razılaşmır. Məlumat üçün deyək ki, islahatçı qanadın təmsilçisi Musəvi dini rəhbər Xamneyi ilə eyni şəhərdəndir. İraqla 8 illik müharibə zamanı Musəvi baş nazir olub. Daha sonra o, 16 il prezidentin ali müşaviri (8 il Haşimi Rəfsəncaninin, 8 il isə Məhəmməd Xatəminin) olub. Xarici ekspertlərin ehtimallarına görə, seçkinin birinci turunda qalibin adını müəyyənləşdirmək mümkün olmayacaq. Və indiki prezident Mahmud Əhmədinejadla keçmiş baş nazir Mirhüseyn Musəvi ikinci turda mübarizəni davam etdirəcəklər.
NADİR

Paylaş:

Baxılıb: 1322 dəfə