Milli Məclisdə Azərbaycan-Rumıniya, Azərbaycan-Avstriya əlaqələrinin inkişafı məsələləri müzakirə olunub

Bakı:

31 °C

46 %

7 m/s

AZ RU EN

Ana səhifə / Siyasət / Milli Məclisdə Azərbaycan-Rumıniya, Azərbaycan-Avstriya əlaqələrinin inkişafı məsələləri müzakirə olunub

Milli Məclisdə Azərbaycan-Rumıniya, Azərbaycan-Avstriya əlaqələrinin inkişafı məsələləri müzakirə olunub

09.11.2016 [00:15]

Noyabrın 8-də Milli Məclisin sədri Oqtay Əsədov Rumıniyanın ölkəmizdə yeni təyin olunmuş səfiri Dan İanku ilə görüşüb.
Milli Məclisin mətbuat xidmətindən AZƏRTAC-a bildiriblər ki, sədr yeni səfirin ölkələrimiz arasındakı strateji tərəfdaşlıq münasibətlərinin daha da irəliyə aparılması üçün səylərini əsirgəməyəcəyinə əminliyini ifadə edib, bu işdə ona uğurlar arzulayıb.
Qeyd edilib ki, qədim tarixi köklərə malik olan münasibətlərimiz müasir dövrdə yeni keyfiyyətlə inkişaf etməkdədir. Gələn il ölkələrimiz arasında diplomatik münasibətlərin qurulmasının 25 ili tamam olur. Ölkə başçılarının qarşılıqlı səfərləri və aparılan danışıqlar əlaqələrimizin daha da möhkəmlənməsi üçün yaxşı zəmin yaradıb. Bu günədək Azərbaycanla Rumıniya arasında 60-a yaxın hüquqi sənəd imzalanıb. Azərbaycan Rumıniya ilə təkcə siyasi deyil, iqtisadi sahədə də əlaqələrin davamlı inkişafında maraqlıdır. Bu baxımdan müştərək iqtisadi komissiyanın fəaliyyəti təqdirəlayiqdir.
Spiker dövlətlərarası münasibətlərin inkişafında parlamentlərin rolunu yüksək qiymətləndirib, 2006-cı ildə Rumıniyaya etdiyi səfəri xatırladıb. Bildirilib ki, Rumıniya parlamentinin hər iki palatasının sədrləri müxtəlif vaxtlarda Azərbaycana səfər ediblər. Bu sahədə əlaqələrimizin daha da möhkəmlənməsində parlamentlərimizdə fəaliyyət göstərən dostluq qruplarının rolu böyükdür. Deputatlarımız nüfuzlu beynəlxalq qurumlarda səmərəli əməkdaşlıq edirlər. “Biz prinsipial məsələlərdə beynəlxalq qurumlarda Rumıniyanın Azərbaycana göstərdiyi dəstəyi yüksək dəyərləndirir və ümid edirik ki, bu dəstək gələcəkdə də davam edəcək”, - deyə O.Əsədov vurğulayıb.
Səfir Dan İanku yeni vəzifədə ölkələrimiz arasında münasibətlərin daha da dərinləşməsi üçün əlindən gələni əsirgəməyəcəyini söyləyib. Qeyd edib ki, Rumıniya Azərbaycanı özünə dost və qardaş ölkə hesab edir. Azərbaycanın əldə etdiyi uğurlar Rumıniyanı da sevindirir. Siyasi, iqtisadi, mədəni, humanitar sahələrdə əlaqələrimizin daha da möhkəmlənməsi ümumi məqsədlərə xidmət edir. Bu məsələdə parlamentlərin də üzərinə böyük vəzifə düşür. Biz parlament nümayəndə heyətlərinin qarşılıqlı səfərlərini əməkdaşlığımızın keyfiyyətcə yeni səviyyəyə qaldırılması baxımından əhəmiyyətli hesab edirik.
Görüşdə tərəfləri maraqlandıran digər məsələlər ətrafında fikir mübadiləsi aparılıb.
* * *
Həmin gün Milli Məclisin sədri Oqtay Əsədov Avstriyanın Azərbaycandakı səfiri Aksel Vex ilə görüşüb.
Oqtay Əsədov ümidvar olduğunu bildirib ki, diplomatik xidməti dövründə səfir münasibətlərimizin inkişafına töhfələr verəcək. Qeyd edilib ki, əlaqələrimiz istər ikitərəfli, istərsə də Avropa strukturları ilə əməkdaşlıq baxımından önəmlidir. Ölkəmizin Avstriya ilə münasibətləri yüksələn xətt üzrə inkişaf etməkdədir. Bu inkişaf bütün sahələri - siyasi, iqtisadi, mədəni əlaqələri əhatə edir.
Sədr 2013-cü ildə dövlət başçılarımız arasında imzalanmış dostluq münasibətləri və tərəfdaşlığa dair Birgə Bəyannamənin əhəmiyyətini xüsusi vurğulayıb. Bildirib ki, yüksək səviyyəli nümayəndə heyətlərinin qarşılıqlı səfərləri əlaqələrimizin daha da dərinləşməsinə yeni impuls verib. Vaxtilə Azərbaycan xalqının Ümummilli lideri Heydər Əliyevin apardığı bu siyasət bu gün də Prezident İlham Əliyev tərəfindən uğurla davam etdirilir. Ölkələrimiz arasında imzalanmış 40-a yaxın sənəd münasibətlərimizin hüquqi bazasını təşkil edir.
Milli Məclisin sədri Azərbaycanın Avropanın etibarlı enerji tərəfdaşı olduğunu deyib. Qeyd edib ki, gələcəkdə TANAP və TAP layihələrinin reallaşması qitənin enerji təhlükəsizliyinin təmin edilməsində mühüm rol oynayacaq. İqtisadi əlaqələrimizin inkişafında iqtisadiyyat, kənd təsərrüfatı, sənaye, texnika və texnologiya sahələrində əməkdaşlıq üzrə komissiya təqdirəlayiq fəaliyyət göstərir. İş adamları arasında qarşılıqlı biznes forumların keçirilməsinin də əhəmiyyəti böyükdür.
Diqqətə çatdırılıb ki, hər iki ölkə parlamentində fəaliyyət göstərən dostluq qrupları sıx və faydalı əməkdaşlıq üçün körpü rolunu oynayır. Deputatların qarşılıqlı səfərləri təqdirəlayiq hesab edilir. Nümayəndə heyətlərimizin beynəlxalq qurumlarda mütəmadi görüşləri və onları maraqlandıran məsələlər ətrafında müzakirələr aparılması önəmlidir.
Səfir Aksel Vex diplomatik fəaliyyəti dövründə iki ölkə arasında əlaqələrin daha da dərinləşməsi üçün səylərini əsirgəməyəcəyini söyləyib. Qeyd edib ki, Avstriya Qafqazın bu bölgəsi ilə əlaqələrin inkişafında maraqlıdır. Azərbaycanın qısa zaman kəsiyində əldə etdiyi uğurlar və bölgədə baş verən proseslər Avropa ölkələrinin, o cümlədən Avstriyanın diqqət mərkəzindədir. “Biz Azərbaycanın Avropanın enerji arxitekturasında oynadığı rolu yaxşı başa düşür və bunu yüksək qiymətləndiririk. İqtisadi, mədəni sahələrdə münasibətlərimiz inkişaf etməkdədir. Gələcəkdə də bu istiqamətdə fəaliyyətimizi davam etdirmək niyyətindəyik”, - deyə səfir bildirib.
Söhbət zamanı parlamentlər səviyyəsində əlaqələrin daha da möhkəmlənməsi üçün deputatlardan ibarət nümayəndə heyətlərinin qarşılıqlı səfərlərinin önəmi vurğulanıb.
Görüşdə tərəfləri maraqlandıran digər məsələlər ətrafında fikir mübadiləsi aparılıb.