Getulio Vargas Fondunun professoru, siyasi təhlilçi Monik Soçaşevski Braziliya Deputatlar Palatasının sədri Rodriqo Mayanın Azərbaycana səfəri haqqında fikirlərini bölüşüb

Bakı:

31 °C

51 %

6 m/s

AZ RU EN

Ana səhifə / Siyasət / Getulio Vargas Fondunun professoru, siyasi təhlilçi Monik Soçaşevski Braziliya Deputatlar Palatasının sədri Rodriqo Mayanın Azərbaycana səfəri haqqında fikirlərini bölüşüb

Getulio Vargas Fondunun professoru, siyasi təhlilçi Monik Soçaşevski Braziliya Deputatlar Palatasının sədri Rodriqo Mayanın Azərbaycana səfəri haqqında fikirlərini bölüşüb

08.11.2016 [09:56]

Braziliyada nüfuzlu ali təhsil ocağı və tədqiqat mərkəzi olan Getulio Vargas Fondunun professoru, siyasi təhlilçi Monik Soçaşevski “Huffpost Brazil” internet portalında Braziliya Deputatlar Palatasının sədri Rodriqo Mayanın Azərbaycana səfəri haqqında fikirlərini bölüşüb (bax: Monique Sochaczewski. Rodrigo Maia e a ignorancia sobre o Azerbaijao / ‘’Brasilpost.com.br’’, 31 oktyabr 2016).
M.Soçaşevski Braziliya Deputatlar Palatasının sədri Rodriqo Mayanın rəhbərlik etdiyi nümayəndə heyətinin ilk xarici rəsmi səfərini Azərbaycana etməsinin ölkə seçimi nöqteyi-nəzərindən yerli kütləvi informasiya vasitələrində maraq doğurduğunu qeyd edib. O, bəzi Braziliya KİV-lərinin Azərbaycanı “ekzotik Asiya ölkəsi” kimi təsvir etdiyini, bəzilərinin isə Mərkəzi Asiyada yerləşdiyini bildirdiyini vurğulayıb.
Müəllifin sözlərinə görə, əslində, Azərbaycan haqqında ilk gözəçarpan məqam ölkənin multikultural xarakteridir. O, Azərbaycanın müxtəlif millətlərin və dinlərin kəsişməsində yerləşən əsrarəngiz ölkə olduğunu qeyd edib. Sonra Azərbaycandakı yəhudi icması haqqında məlumat verən M.Soçaşevski müsəlman ölkəsində yəhudi icmasının əsrlər boyu sülh və əmin-amanlıqda yaşadığını vurğulayıb və Azərbaycanın bu sahədə təcrübəsinin təqdirəlayiq olduğunu bildirib.
M.Soçaşevskinin fikirlərinə əsasən, R.Mayanın başçılıq etdiyi nümayəndə heyətinin Azərbaycana səfəri zamanı diqqət mərkəzində olacaq ikinci məsələ Dağlıq Qarabağ münaqişəsinin yaratdığı ağır nəticələr olacaqdır. O, Sovet İttifaqının dağılmasından sonra, 1992-94-cü illərdə Azərbaycan və qonşusu Ermənistan arasında baş vermiş müharibə nəticəsində 20 mindən artıq insanın həyatını itirdiyi, 1 milyon insanın qaçqın düşdüyü və Azərbaycanın Dağlıq Qarabağ bölgəsi ilə yanaşı 7 ətraf rayonunun Ermənistan tərəfindən zəbt edildiyini və beləliklə, Azərbaycanın 20% ərazisinin işğal olunduğunu vurğulayıb.
Müəllif hər bir azərbaycanlının muğam, mətbəx, xalça kimi mövzularda söhbətləri Ermənistan tərəfindən işğal edilmiş Qarabağ ilə əlaqələndirdiyini qeyd edib. O, Dağlıq Qarabağ münaqişəsinin təkcə Azərbaycan diplomatiyasının əsas vəzifəsi olmadığını, eyni zamanda, bütövlükdə Azərbaycan xalqının ən vacib məsələsi olduğunu vurğulayıb.
M.Soçaşevski “Azərbaycanın Braziliyada gündəmə gətirilməsinə” görə Rodriqo Mayaya təşəkkürünü bildirib. Müəllif Azərbaycanın Braziliyadakı səfirliyinin 2012-ci ildən aktiv şəkildə fəaliyyət göstərdiyini qeyd edib. O, Azərbaycanın vacib ölkə olduğunu, güclü neft sənayesinə malik olduğunu və Avrasiyada mühüm rol oynadığını vurğulayıb. M.Soçaşevski Azərbaycanın böyük Avropanın tərkib hissəsi olduğunu, həmçinin ölkənin “Avroviziya” mahnı müsabiqəsi və ilk Avropa Olimpiya Oyunlarına ev sahibliyi etdiyini diqqətə çatdırıb.
Müəllif 19-cu əsrin sonu - 20-ci əsrin əvvəlində Nobel və Rotşild kimi ailələrin Azərbaycana gəldiyini misal gətirərək Azərbaycanın tarixən beynəlxalq ictimaiyyətin diqqət mərkəzində olduğunu, neft-qaz sahəsində aparıcı ölkə olduğunu bildirib və hazırda Azərbaycanın Cənubi Qafqazda çox vacib rol oynadığını qeyd edib.
Newtimes.az

Paylaş:

Baxılıb: 542 dəfə