Azərbaycan və Türkiyə qardaş, qonşu və tərəfdaş ölkələrdir

Bakı:

24 °C

54 %

2 m/s

Əlaqə

AZ RU EN

Ana səhifə / Siyasət / Azərbaycan və Türkiyə qardaş, qonşu və tərəfdaş ölkələrdir

Azərbaycan və Türkiyə qardaş, qonşu və tərəfdaş ölkələrdir

27.05.2009 [09:55]

Azərbaycanda səfərdə olan Türkiyənin xarici işlər naziri Əhməd Davudoğlu dünən Fəxri Xiyabana gələrək, müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad edib, məzarı önünə əklil qoyub. Görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üzərinə gül dəstəsi qoyulub.
Türkiyə rəsmisi Şəhidlər Xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının məzarları üzərinə güllər düzüb, “Əbədi məşəl” abidəsinin önünə əklil qoyub.
Sonra qonaq Şəhidlər Xiyabanında türk şəhidlərinin xatirəsinə ucaldılmış abidəni də ziyarət edib. Türkiyənin xarici işlər naziri 1918-ci ildə Bakının bolşevik-erməni daşnak qoşunlarından azad edilməsi uğrunda döyüşlərdə şəhid olmuş 1130 türk əsgərinin xatirəsini ehtiramla yad edib, abidənin önünə əklil qoyub. Ə.Davudoğlu xatirə kitabına ürək sözlərini yazdıqdan sonra Şəhidlik kitabəsinin üstünə gül dəstələri düzüb.
Azərbaycan və Türkiyə xarici işlər nazirlərinin təkbətək və nümayəndə heyətlərinin iştirakı ilə görüşü keçirilib. Görüşdən sonra keçirilən brifinqdə Azərbaycanın xarici işlər naziri Elmar Məmmədyarov türkiyəli həmkarı ilə Dağlıq Qarabağ münaqişəsi, enerji, mədəniyyət, iqtisadiyyat sahəsində əməkdaşlıq məsələləri ətrafında müzakirələr apardıqlarını bildirib: “ölkələrimiz arasında mövcud olan 2 milyard dollar dəyərində mal dövriyyəsinin həcmi bizi qane etmir. Düşünürük ki, bu rəqəm artırılmalıdır, çünki bunun üçün potensial var”. Mədəni sahədə əməkdaşlıqdan danışan E. Məmmədyarov hazırda Türkiyədə 3 min azərbaycanlı tələbənin, Azərbaycanda isə 1700 türk tələbənin təhsil aldığını qeyd edib. İki qardaş ölkə arasında indiyə kimi 150-yə yaxın sənədin imzalandığını bildirən nazir, bu rəqəmin kifayət olmadığını bəyan edib.
Türkiyənin xarici işlər naziri Əhməd Davudoğlu 15 gün ərzində Azərbaycana ikinci dəfə gəldiyini deyib və ilk dəfə XİN başçısı qismində Türkiyənin baş naziri Rəcəb Təyyib Ərdoğanı Bakı səfərində müşayiət etdiyini xatırladıb: “Azərbaycan bizim ikinci evimizdir, mən Suriyadan birbaşa Bakıya gəldim. İki qardaş və strateji tərəfdaş ölkə arasında əlaqələr çox mükəmməldir”.
Əhməd Davudoğlu Bakıda keçirdiyi görüşlər zamanı iki ölkə arasında viza rejiminin aradan qaldırılması məsələsinin də müzakirə obyekti olduğunu deyib: “Biz Azərbaycanın gələcəyinə Türkiyənin gələcəyi kimi baxırıq. Türkiyə bölgədə münaqişələrin dondurulmuş vəziyyətdə qalmasını istəmir, Dağlıq Qarabağ münaqişəsinin həlli üçün ATƏT-in Minsk qrupu beynəlxalq aləmi dəstəyi ilə ciddi işlər görməlidir”.
Türkiyənin xarici işlər naziri Əhməd Davudoğlu bildirib ki, bizim üçün əsas Azərbaycanın ərazi bütövlüyüdür: “Azərbaycan və Türkiyə qardaş, qonşu və tərəfdaş ölkələrdir”.
Türkiyənin tarixdə olduğu kimi, bundan sonra da hər zaman Azərbaycanın yanında olacağını qeyd edən Ə.Davudoğlu Ermənistana da mesaj göndərib: “Ermənistan işğala son qoymalı, bölgəni gərginlikdən azad etməlidir. Azərbaycan əraziləri BMT-nin qətnamələri əsasında işğaldan azad olunmalıdır. Regionu yalnız birgə inkişaf etdirmək mümkündür”.
Azərbaycan və Ermənistan prezidentlərinin Sank-Peterburqda keçiriləcək görüşünə toxunan, Ə.Davudoğlu bu görüşü çox önəmli fürsət adlandırıb.

Paylaş:

Baxılıb: 1358 dəfə