Milli Məclisin nümayəndə heyətinin Monteneqroya səfəri başa çatıb

Bakı:

26 °C

56 %

3 m/s

Əlaqə

AZ RU EN

Ana səhifə / Siyasət / Milli Məclisin nümayəndə heyətinin Monteneqroya səfəri başa çatıb

Milli Məclisin nümayəndə heyətinin Monteneqroya səfəri başa çatıb

24.05.2016 [10:12]

Milli Məclisin sədri Oqtay Əsədovun başçılıq etdiyi parlament nümayəndə heyəti Monteneqronun müstəqilliyinin 10 illik yubileyi ilə əlaqədar keçirilən tədbirlərdə iştirak etmək üçün mayın 20-dən 22-dək bu ölkənin paytaxtı Podqoritsa şəhərində səfərdə olub.
Parlamentin mətbuat xidmətindən AZƏRTAC-a bildiriblər ki, səfər çərçivəsində Oqtay Əsədov Monteneqronun Prezidenti Filip Vuyanoviç ilə görüşüb. Görüşdə Milli Məclisin sədri Müstəqillik Günü münasibətilə dost Monteneqro dövləti və xalqını Azərbaycan Respublikasının Prezidenti İlham Əliyevin adından, eləcə də Azərbaycan xalqı adından təbrik edib.
Söhbət zamanı bildirilib ki, yüksək səviyyəli nümayəndə heyətlərinin qarşılıqlı səfərləri əməkdaşlığın inkişafı baxımından mühüm əhəmiyyət kəsb edir.
Milli Məclisin sədri qeyd edib ki, ölkələrimiz arasında iqtisadi sahədəki göstəriciləri yüksəltmək üçün biznes forumların keçirilməsi, iş adamları arasında əlaqələrin təmin olunması mühüm əhəmiyyət kəsb edir. “Bu baxımdan biz Hökumətlərarası İqtisadi Komissiyanın yaradılmasını da müsbət hal kimi dəyərləndiririk. Bu gün Azərbaycan enerji sahəsində Avropanın etibarlı tərəfdaşıdır. “Cənub Qaz Dəhlizi” layihəsinin reallaşdırılması istiqamətində mühüm addımlar atılmaqdadır”, - deyə sədr qeyd edib.
Oqtay Əsədov münasibətlərin inkişafında parlamentlərin mühüm rol oynadığını söyləyərək vurğulayıb: “Biz hər iki ölkənin qanunvericilik orqanında parlamentlərarası əlaqələr üzrə dostluq qruplarının mövcud olmasını yüksək qiymətləndiririk”.
Ermənistan-Azərbaycan, Dağlıq Qarabağ münaqişəsindən söz açan Milli Məclisin sədri bildirib ki, nüfuzlu beynəlxalq qurumların bu məsələ ilə əlaqədar qərar və qətnamələrinə məhəl qoymayan Ermənistan işğalçılıq siyasəti yeritməkdə davam edir: “Biz inanırıq ki, beynəlxalq birliyin dəstəyi ilə münaqişə ölkələrin ərazi bütövlüyü prinsipi çərçivəsində tezliklə öz ədalətli həllini tapacaq”.
Monteneqronun Prezidenti Filip Vuyanoviç Azərbaycan nümayəndə heyətinin ölkənin Müstəqillik Günü münasibətilə keçirilən yubiley tədbirlərinə qatılmasını yüksək dəyərləndirib. Vurğulayıb ki, təmsil etdiyi ölkə Cənubi Qafqazın bu bölgəsi ilə həyatın müxtəlif sahələrində əməkdaşlığı dərinləşdirmək niyyətindədir.
Görüş zamanı parlamentlərarası əlaqələrin inkişaf perspektivləri, regional münaqişələrin aradan qaldırılması və digər məsələlər ətrafında fikir mübadiləsi aparılıb.
Həmin gün Monteneqronun paytaxtında ölkənin müstəqillik qazanmasının 10 illiyi münasibətilə ədəbi-bədii kompozisiyalardan ibarət tədbir keçirilib. Azərbaycan nümayəndə heyəti tədbirdə iştirak edib.
Səfər çərçivəsində Milli Məclisin sədri Oqtay Əsədov Azərbaycanın böyük şairi Hüseyn Cavidin şərəfinə Podqoritsa şəhərinin mərkəzi parkında qoyulmuş büstünü ziyarət edərək, abidənin önünə tər çiçəklər düzüb. Park Azərbaycan Prezidenti İlham Əliyevin təşəbbüsü ilə 2013-cü ildə yenidən qurulub.
Monteneqroda keçirilən tədbirlərdə Milli Məclis Aparatının rəhbəri Səfa Mirzəyev və digər rəsmi şəxslər iştirak ediblər.

Paylaş:

Baxılıb: 624 dəfə