İordaniyalı siyasətçi: Ermənistanın Azərbaycana ərazi iddiaları tarixin və həqiqətin saxtalaşdırılmasıdır

Bakı:

20 °C

77 %

7 m/s

AZ RU EN

Ana səhifə / Siyasət / İordaniyalı siyasətçi: Ermənistanın Azərbaycana ərazi iddiaları tarixin və həqiqətin saxtalaşdırılmasıdır

İordaniyalı siyasətçi: Ermənistanın Azərbaycana ərazi iddiaları tarixin və həqiqətin saxtalaşdırılmasıdır

29.04.2016 [10:02]

Tanınmış iordaniyalı siyasətçi, İordaniya Senatı Şurasının üzvü, Azərbaycan-İordaniya Parlament Dostluq Qrupunun sədri Muhammad əl-Suqur AZƏRTAC-ın xüsusi müxbirinə eksklüziv müsahibəsində deyib: “İordaniya və Azərbaycan qardaş və dost ölkələrdir, xalqlarımızı dərin dostluq telləri və əməkdaşlıq birləşdirir. Ölkələrimizin liderləri arasında çox möhkəm və dost münasibətlər də çox vacibdir. İordaniya Azərbaycanın ədalətli mövqeyini bütün səviyyələrdə tam dəstəkləyir, Azərbaycanın ərazi bütövlüyünün və Ermənistan tərəfindən işğal edilmiş ərazilərinin qaytarılmasının tərəfdarıdır”.
Muhammad əl-Suqur vurğulayıb: “Biz Azərbaycandakı vəziyyəti həmişə diqqətlə izləyirik, orada baş verən hadisələrdən, xüsusilə cəbhə xəttindəki son provokasiyalardan xəbərimiz var. Biz Ermənistan-Azərbaycan, Dağlıq Qarabağ münaqişəsi, danışıqlar prosesi və Azərbaycanın ədalətli mövqeyi, habelə Dağlıq Qarabağ münaqişəsinin artıq uzun illərdir davam etməsi, bütün cəhdlərə baxmayaraq həllini tapmaması haqqında kifayət qədər yaxşı məlumatlıyıq”.
Senatorun sözlərinə görə, BMT Ermənistanın Azərbaycana qarşı təcavüzünü pisləyən bir neçə qətnamə qəbul edib və Ermənistan silahlı qüvvələrinin Azərbaycanın işğal edilmiş Dağlıq Qarabağ regionundan qeyd-şərtsiz çıxarılmasını tələb edib. Siyasətçi deyib: “BMT Azərbaycanın tələbini dəstəkləyir və işğal edilmiş ərazilərin Azərbaycana məxsus olmasını tanıyır. Beynəlxalq hüquq normalarına və tarixi arxiv sənədlərinə müvafiq olaraq, Dağlıq Qarabağ və ona bitişik rayonlar tarixən Azərbaycanın ayrılmaz hissəsidir, Ermənistanın Azərbaycana ərazi iddiası isə tarixin və həqiqətin saxtalaşdırılmasıdır”.
Senator Azərbaycan Ordusunun Ermənistanın son provokasiyasına cavabını şərh edərək bildirib ki, Ermənistan Azərbaycana qarşı neçə illərdir təcavüzkar siyasət yürüdür və müntəzəm fitnəkar əməllər törədir. O, həmçinin qeyd edib ki, bu ayın əvvəlində Ermənistan silahlı qüvvələrinin provokasiyasına cavab olaraq Azərbaycan Ordusu işğal edilmiş ərazilərdən - tarixən Azərbaycana məxsus əzəli torpaqlarda yerləşən bir neçə mühüm strateji yüksəkliyi və yaşayış məntəqəsini qaytara bilib. Senator xüsusilə vurğulayıb ki, Ermənistan tərəfinin silahlı hücumuna qarşı Azərbaycanın cavab tədbirləri görməyə tam haqqı olub. Onu da demək yerinə düşər ki, Azərbaycan qarşıya qoyulan vəzifələri yerinə yetirmək iqtidarında olan güclü orduya malikdir. Senator deyib ki, bununla yanaşı, aydındır ki, Azərbaycan münaqişənin beynəlxalq hüquq normaları çərçivəsində sülh siyasəti ilə nizamlanmasının tərəfdarıdır və bu, çox müdrik və uzaqgörən siyasətdir. Azərbaycan dövlətinin bu cür yanaşması BMT Təhlükəsizlik Şurasının dünyada mövcud olan bütün münaqişələri sülh yolu ilə həll etməyə çağıran Nizamnaməsinə tam müvafiqdir.
İordaniya senatorunun fikrincə, bu məsələnin sülh yolu ilə həlli Azərbaycanın mənafeyinə cavab verir, çünki siyasi həll tarixi bünövrəyə əsaslanır və Azərbaycanın zəbt edilmiş torpaqlarının geri qaytarılmasına dair ədalətli mövqeyini təsdiqləyir. Muhammad əl-Suqur deyib: “Bütün tarixi faktlar və beynəlxalq hüquq Azərbaycanın bu torpaqlar üzərində hüququnu təsdiqləyir. Düşünmürəm ki, Ermənistanda onların qonşu Azərbaycan ərazilərinə olan iddialarının qanuniliyini təsdiqləyən sənədlər olsun”.
İordaniyalı siyasətçi Azərbaycanın ədalətli mövqeyinin İslam Əməkdaşlıq Təşkilatı (İƏT) tərəfindən yekdilliklə dəstəklənməsindən danışaraq bildirib ki, İƏT Ermənistanın təcavüzünü pisləyir və Dağlıq Qarabağ məsələsində Azərbaycanı həmişə dəstəkləyir, Azərbaycanın ərazi bütövlüyünün və Ermənistan silahlı qüvvələrinin işğal edilmiş torpaqlardan qeyd-şərtsiz çıxarılmasının tərəfdarıdır. İordaniya Senatı Şurasının üzvü fikrini yekunlaşdıraraq deyib: “Bu, Azərbaycana siyasi dəstək göstərən ərəb və müsəlman ölkələrinin vahid mövqeyini təsdiqləyir”.

Paylaş:

Baxılıb: 683 dəfə