Rauf Əliyev: Azərbaycan hərtərəfli inkişaf etmiş demokratik dövlətdir və bu inkişaf uğurla davam edəcək

Bakı:

19 °C

82 %

4 m/s

AZ RU EN

Ana səhifə / Siyasət / Rauf Əliyev: Azərbaycan hərtərəfli inkişaf etmiş demokratik dövlətdir və bu inkişaf uğurla davam edəcək

Rauf Əliyev: Azərbaycan hərtərəfli inkişaf etmiş demokratik dövlətdir və bu inkişaf uğurla davam edəcək

28.04.2016 [10:11]

“Azadlıq” qəzetində vaxtı ilə ABŞ-ın Azərbaycandakı səfirliyində işləmiş, hazırda isə “insan hüquqlarının müdafiəsi” ilə məşğul olan Rebekka Vinsentin “Azərbaycandakı siyasi məhbuslar yaddan çıxmamalıdır” başlıqlı məqaləsinin tərcüməsi çap olunub. Məqalə ilə tanış olduqda təəcüblənməmək mümkün deyil. Müəllif Azərbaycanda guya “siyasi məhbuslar” olduğunu, onların bir neçəsinin azadlığa buraxıldığını, digərlərinin hələ də həbsdə olduğunu iddia edir”. Bu fikirləri Milli Məclisin deputatı Rauf Əliyev deyib.
R.Əliyev bildirib ki, Azərbaycan Prezidenti İlham Əliyev məhkum olunmuş bir sıra şəxslərin, onların ailə üzvlərinin, İnsan hüquqları üzrə müvəkkilin, insan hüquqları müdafiəsi təşkilatlarının əfv haqqında müraciətlərinə baxaraq, humanizm prinsipinə əsaslanaraq bir qrup şəxsin o cümlədən məqalədə qeyd olunan 14 nəfərin əfv olunması barədə 17 mart 2016-cı il tarixində Sərəncam imzalayıb. Onun sözlərinə görə, həmin 14 nəfər şəxsin “siyasi məhbus” olması Rebekka Vinsentin subyektiv fikirləridir.
“Bu şəxslər də digər məhkumlar kimi Azərbaycan Cinayət Məcəlləsinin müvafiq maddələrinə görə məhkum olunublar. Azərbaycan Prezidentinin bu humanist addımı dünyanın nüfuzlu dövlətləri və qurumları, o cümlədən ABŞ, Fransa, Avropa Birliyi və Avropa Şurası tərəfindən yüksək qiymətləndirilib. Məhkəmə qərarları ilə şəxslərin azadlığa buraxılması ancaq məhkəmənin hüququdur. Məhkəmələrin işinə heç kim müdaxilə edə bilməz. Qeyd etmək lazımdır ki, “siyasi məhbuslar” məsələsi anti-Azərbaycan qüvvələri tərəfindən vaxtaşırı Azərbaycana qarşı təzyiq vasitəsi kimi istifadə olunur. Maraqlıdır ki, özünü “insan hüquqlarının müdafiəçisi” sayan Rebekka Vinsent nə üçün mövcud olmayan “siyasi məhbuslar”ın” hüquqlarından söz açır, ancaq Ermənistan tərəfindən öz ata-baba yurdlarından qovulmuş bir milyondan artıq azərbaycanlı qaçqın və köçkünlərin pozulmuş hüquqlarından danışmır”, - deyən millət vəkilinin fikrincə həmin məqalənin indi çap olunması təsadüfi deyil.
Onun sözlərinə görə, məqalə beynəlxalq ictimaiyyətin diqqətinin Azərbaycana, onun paytaxtı Bakı şəhərinə yönəldiyi bir vaxtda yazılıb: “BMT-nin Sivilizasiyalar Alyansının VII Qlobal Formunun Bakıda yüksək səviyyədə keçirilməsi, dünyanın 140-dan artıq dövlətinin 3 minə yaxın nümayəndələrinin bu tədbirdə iştirakı Azərbaycanın beynəlxalq aləmdəki artan nüfuzundan xəbər verir. Əlbəttə, anti-Azərbaycan qüvvələr və onların Azərbaycandakı əlaltıları belə möhtəşəm tədbirin Azərbaycanda yüksək səviyyədə keçirilməsindən narahat olurlar. Onlar yalnız şər və böhtanlarla Azərbaycanın imicinə ləkə vurmağa cəhd göstərirlər. Ancaq bu cəhdlər əbəsdir. Azərbaycan hərtərəfli inkişaf etmiş demokratik dövlətdir və bu inkişaf uğurla davam edəcək”.

Paylaş:

Baxılıb: 614 dəfə