ABŞ-dakı erməni lobbisinin növbəti cəhdi fiaskoya uğrayıb

Bakı:

24 °C

53 %

1 m/s

Əlaqə

AZ RU EN

Ana səhifə / Siyasət / ABŞ-dakı erməni lobbisinin növbəti cəhdi fiaskoya uğrayıb

ABŞ-dakı erməni lobbisinin növbəti cəhdi fiaskoya uğrayıb

02.04.2016 [11:34]

Havay ştatının Nümayəndələr Palatasının sədri Azərbaycandan üzr istəyib
ABŞ-ın Havay ştatının Nümayəndələr Palatasının sədri Cozef Souki erməni lobbisinin ənənəvi manipulyasiyası və məkrli oyunları nəticəsində martın 29-da palatanın qondarma “Dağlıq Qarabağ respublikası”na dair qəbul etdiyi 167 saylı qətnamə ilə bağlı memorandum imzalayıb. C.Souki bu qətnaməyə görə təəssüf hissi keçirdiyini bildirib, Azərbaycan Hökumətindən və xalqından dərindən üzr istədiyini elan edib.
Bu barədə AZƏRTAC-a Azərbaycanın Los-Ancelesdəki baş konsulluğundan məlumat verilib.
Baş konsulluğa ünvanlanmış memorandumda spiker C.Souki təəssüflə bildirib ki, Nümayəndələr Palatasının xarici siyasətlə bağlı qəbul etdiyi hər bir sənəd müvafiq komitələrə getməli olduğu halda, həmin qətnamə mövcud qanunvericilik prosedurlarına zidd olaraq gündəliyə salınıb və ictimai müzakirəyə çıxarılmadan qəbul edilib.
Qeyd olunub ki, Havay Ştatının Nümayəndələr Palatasında bəzən fərdlərə və təşkilatlara, məsələn, müəllimlərə, səhiyyə işçilərinə, yaxud xeyriyyə qurumlarına həvəsləndirici məqsədlərlə təbriknamələr təqdim edilir. 167 saylı qətnamə də bu qəbildən olan, sadə mərasim xarakterli sənəd adı altında gündəliyə salınıb və onun əsl mahiyyətinə diqqət yetirilməyib. Bu səbəbdən də spiker C.Souki qətnamənin müvafiq komitə tərəfindən müzakirə olunmadan qəbul edilməsinə görə dərindən üzr istədiyini bildirib, oxşar hadisələrin gələcəkdə baş verməməsi üçün daxili qaydalarda dəyişiklik ediləcəyini vurğulayıb.
Həmçinin spiker bildirib ki, ABŞ uzun illərdir Ermənistan-Azərbaycan, Dağlıq Qarabağ münaqişəsinin həlli ilə bağlı səylər göstərir. Bu səpkidə C.Souki 167 saylı qətnamənin hər hansı hüquqi qüvvəyə malik olmadığını da vurğulayaraq, Nümayəndələr Palatasının dolğun məlumat əldə etmədən belə bir sənədi qəbul etməsinə görə üzr istəyib.
Spiker C.Souki memorandumun sonunda Nümayəndələr Palatasının üzvləri adından Azərbaycan ilə ABŞ arasındakı güclü dostluq əlaqələrinin davam edəcəyinə ümidvar olduğunu bildirərək yazıb: “Ümid edirəm ki, bizi bu vəziyyətə gətirib çıxaran xoşagəlməz halı anlayırsınız. Mən buna görə Azərbaycan Hökumətindən və xalqından səmimi şəkildə üzr istəyirəm”.
Qeyd edək ki, qətnamədən bir müddət əvvəl - 2016-cı il martın 10-da erməni lobbisinin təhriki ilə Havay Ştatının Senatında oxşar məzmunlu iki qətnamə gündəliyə gətirilmişdi. Azərbaycanın Los-Ancelesdəki baş konsulluğunun operativ müdaxiləsi nəticəsində Havay Senatının rəhbərliyi martın 11-də rəsmi bəyanat verərək bu qətnamələri rədd etdiyini bildirmişdi. Üstəlik həmin bəyanatda Azərbaycanın ərazi bütövlüyünə açıq dəstək ifadə olunmuşdu. Görünür, bundan pərt olan erməni lobbisi növbəti məkrli planını Havay ştatının Nümayəndələr Palatasında həyata keçirməyə cəhd edib, qanunvericiləri aldadaraq öz məqsədlərinə nail olmağa çalışıb. Ancaq Palatanın spikeri tərəfindən imzalanan və həmin qətnaməni heçə endirən rəsmi memorandum ilə erməni lobbisi bir daha layiqli cavabını alıb.

Paylaş:

Baxılıb: 783 dəfə