Ukraynalı pilot: Ən dəhşətlisi o idi ki, bizimlə Xocalıya gedən polis kapitanı meyitlərin içində öz uşağının cəsədini tapdı

Bakı:

20 °C

88 %

2 m/s

AZ RU EN

Ana səhifə / Siyasət / Ukraynalı pilot: Ən dəhşətlisi o idi ki, bizimlə Xocalıya gedən polis kapitanı meyitlərin içində öz uşağının cəsədini tapdı

Ukraynalı pilot: Ən dəhşətlisi o idi ki, bizimlə Xocalıya gedən polis kapitanı meyitlərin içində öz uşağının cəsədini tapdı

26.02.2016 [10:20]

Dünən Xocalı qətliamının ilk şahidi, jurnalistləri bu vəhşiliyin törədildiyi yerə vertolyotla aparan ukraynalı pilot Kraveç Leonid Markoviçin iştirakı ilə mətbuat konfransı keçirilib. “Azadinform” xəbər verir ki, pilot Ukrayna Azərbaycanlıları Birləşmiş Diasporunun (UABD) dəvəti ilə Bakıya gəlib.
Tədbiri giriş sözü ilə açan UABD sədri Hikmət Cavadov bildirib ki, 2 il bundan qabaq Markoviçin Xocalıya gəlməsi haqqında məlumat alıb: “İki il ərzində bu məsələni araşdırıb film hazırladıq. Filmin təqdimatı isə sabah (bu gün - red.) olacaq”.
Daha sonra çıxış edən Markoviç bildirib ki, 1989-90-cı ilə qədər SSRİ qoşunlarının tərkibində Gəncədə xidmət edib. Gəncədən Ağdama və digər bölgələrə uçuşlar edib, vertolyot komandiri vəzifəsində olub: “1991-ci ilə qədər dinc əhalini Dağlıq Qarabağdan müharibə olmayan ərazilərə daşıyırdım. 1992-ci il fevralın 27-də Gəncəyə qayıdarkən Xocalının şərqindən 2 km məsafədə uçarkən dağın ətəyindən rəngli paltarlar göründü. 500 metr məsafəyə enərək gördük ki, ermənilər dinc əhaliyə divan tutub, onların arasında sağ qalanlar da vardı”.
Pilot qeyd edib ki, Azərbaycan vertolyotunu görərkən ermənilər atəş açıb. Vertolyotla Gəncəyə qayıdıb Azərbaycan hökumətini, prezidentin köməkçisini məlumatlandırıblar.
Bundan sonra Markoviçdən xahiş ediblər ki, hadisə baş verən yeri tanıdığı üçün jurnalistləri ora aparsın: “Jurnalistləri apararkən Çingiz Mustafayevi gördüm. Xalq ona çox inanırdı. Çingizlə bərabər 3 nəfər də vardı. Onların çəkmək üçün cəmi 5 dəqiqə vaxtları oldu. Çünki çox təhlükəli idi. Ermənilər bizi görən kimi atəş açmağa başladılar. Bu çəkilişlərdən sonra faciəni dünya ictimaiyyətinə çatdırmaq mümkün oldu”.
O bildirib ki, meyitlər bir-birindən çox uzaq məsafədə idi: “Ən dəhşətli məqamlardan biri vertolyotda Xocalıya gələnlərin arasında olan polis kapitanının qarşılaşdığı hadisə idi. Polis kapitanı ölən uşaqların arasında öz oğlunu tapmışdı. Polis uşağı gətirib vertolyota qoyanda ermənilər atəş açmağa başladı. Polis kapitanı özünü itirmiş vəziyyətdə idi, sanki ağlı başından çıxmışdı”.
Hadisə şahidi qeyd edib ki, onlar Xocalıya gedərkən ikinci vertolyot da olub. Bu, Markoviçin idarə etdiyi vertolyotu qorumaq üçün idi. Markoviçin idarə etdiyi vertolyot mülki idi, vətəndaşları daşımaq üçün, orada heç bir hərbi sursat yox idi.
Ukraynalı pilot əlavə edib ki, beynəlxalq məhkəmə olarsa, heç bir əlavə fakt lazım deyil: “Xocalıda gördüklərimi dünya ictimaiyyətinə çatdırmağa hazıram”.

Paylaş:

Baxılıb: 693 dəfə