Azərbaycanın və Qazaxıstanın sərhəd qurumları arasında əməkdaşlığın inkişafı müzakirə olunub

Bakı:

30 °C

38 %

0 m/s

Əlaqə

AZ RU EN

Ana səhifə / Siyasət / Azərbaycanın və Qazaxıstanın sərhəd qurumları arasında əməkdaşlığın inkişafı müzakirə olunub

Azərbaycanın və Qazaxıstanın sərhəd qurumları arasında əməkdaşlığın inkişafı müzakirə olunub

25.02.2016 [10:02]

Qazaxıstan Respublikasının Milli Təhlükəsizlik Komitəsi sədrinin müavini - Sərhəd Xidmətinin direktoru, polkovnik Darxan Dilmanovun rəhbərlik etdiyi nümayəndə heyəti Dövlət Sərhəd Xidmətinin rəisi - Sərhəd Qoşunlarının komandanı, general-polkovnik Elçin Quliyevin dəvəti ilə fevralın 22-də Azərbaycana rəsmi səfərə gəlib.
Dövlət Sərhəd Xidmətinin (DSX) mətbuat mərkəzindən bildiriblər ki, nümayəndə heyəti əvvəlcə Fəxri xiyabana gələrək xalqımızın Ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad edib, məzarı önünə əklil qoyub.
Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb.
Sonra Şəhidlər xiyabanına gələn qonaqlar ölkəmizin azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsini ehtiramla yad edib, məzarları üzərinə tər çiçəklər düzüb, “Əbədi məşəl” abidəsinin önünə əklil qoyublar.
Səfər çərçivəsində qonaqlar xidmətin Aparatında DSX rəisi general-polkovnik Elçin Quliyev ilə görüşüblər.
Görüşdə DSX ilə Qazaxıstanın Milli Təhlükəsizlik Komitəsi Sərhəd Xidməti arasında ikitərəfli əlaqələrin perspektivlərinə dair fikir mübadiləsi aparılıb. Tərəflər arasında Xəzər dənizində sərhəd təhlükəsizliyinin təmin olunması məqsədilə ikitərəfli əməkdaşlığın inkişaf etdirilməsinin, birgə əməliyyat-profilaktik tədbirlərin keçirilməsinin, o cümlədən qeyri-leqal miqrasiyanın, narkotiklərin qanunsuz daşınmasının, qaçaqmalçılığın və digər qanunsuz fəaliyyətlərin qarşısının alınmasının vacibliyi vurğulanıb. Həmin sahələr üzrə qarşılıqlı əməkdaşlıq və təcrübə mübadiləsinin aparılmasına hazırlıq ifadə edilib.
Bununla yanaşı, Sahil Mühafizəsində xidmətin təşkili, DSX Akademiyası və təlim mərkəzlərində Qazaxıstan Respublikasının MTK Sərhəd Xidmətinin Sahil Mühafizəsi üçün mütəxəssislərin hazırlanması, dənizdə neft-qaz infrastrukturlarının mühafizəsi sahəsində Azərbaycanın təcrübəsinin öyrənilməsi və bu sahədə birgə təlimlərin keçirilməsi üzrə əməkdaşlığın perspektivləri və digər maraq doğuran məsələlər müzakirə edilib.
Söhbət zamanı Azərbaycanın dövlət sərhədindəki əməliyyat şəraiti və mövcud təhdidlər, o cümlədən Ermənistanın təcavüzü nəticəsində torpaqlarımızın 20 faizinin və dövlət sərhədlərinin bir hissəsinin zəbt olunması, işğal edilən ərazilərin transsərhəd cinayətkar fəaliyyətlər üçün istifadə edildiyi, mövcud vəziyyətin sərhəd təhlükəsizliyinə əsas təhdid olduğu vurğulanıb. Həmçinin sərhəd təhlükəsizliyinin gücləndirilməsi istiqamətində aparılmış islahatlar və əldə olunmuş nailiyyətlər barəsində Qazaxıstan nümayəndələrinə ətraflı məlumat verilib.
Səfər çərçivəsində qonaqlar DSX Aparatının struktur bölmələri, Sahil Mühafizəsi, DSX Akademiyası, “Sərhədçi” İdman Olimpiya Mərkəzi, Xüsusi Məktəb və digər hərbi obyektlərin fəaliyyəti ilə tanış olublar.
Arif ƏsƏdov

Paylaş:

Baxılıb: 619 dəfə