Bakı Şəhər Prokurorluğunda ötən ilin yekunları və qarşıda duran vəzifələr müzakirə edilib

Bakı:

16 °C

82 %

3 m/s

Əlaqə

AZ RU EN

Ana səhifə / Siyasət / Bakı Şəhər Prokurorluğunda ötən ilin yekunları və qarşıda duran vəzifələr müzakirə edilib

Bakı Şəhər Prokurorluğunda ötən ilin yekunları və qarşıda duran vəzifələr müzakirə edilib

16.01.2016 [10:27]

Yanvarın 15-də Bakı Şəhər Prokurorluğunda ərazi rayon (şəhər) prokurorluqları işçilərinin iştirakı ilə 2015-ci ildə cinayətkarlığa qarşı mübarizə, qanunçuluq və hüquq qaydasının möhkəmləndirilməsi, insan və vətəndaş hüquq və azadlıqlarının qorunması sahəsində görülmüş işlərin vəziyyəti və qarşıda duran vəzifələrin müzakirəsinə həsr olunmuş geniş əməliyyat müşavirəsi keçirilib.
Müşavirədə hesabat məruzəsi ilə çıxış edən Bakı şəhər prokuroru Əziz Seyidov bildirib ki, əvvəlki illərdə olduğu kimi, 2015-ci il də ölkəmiz üçün uğurlu olub, dövlətimizin başçısının rəhbərliyi ilə həyata keçirilmiş müstəqil, düşünülmüş siyasi kurs sayəsində ölkəmiz uğurlu inkişafını davam etdirib, dünya birliyindəki mövqeyini daha da möhkəmləndirib. Bunu ötən il ölkəmizdə keçirilmiş mühüm beynəlxalq tədbirlər də təsdiqləyir. Bütün bunların əsasında sabit dövlət siyasəti durur ki, bu sabitlik bilavasitə ölkə rəhbərliyinin gərgin əməyinin məntiqi nəticəsidir.
AZƏRTAC xəbər verir ki, hesabat dövründə şəhər prokurorluğunun əməkdaşlarının cinayətkarlığa və hüquq pozuntularına qarşı mübarizə sahəsində paytaxtın digər hüquq mühafizə orqanları ilə əlaqəli şəkildə fəaliyyət göstərərək bir çox nailiyyətlər əldə etdikləri diqqətə çatdırılıb.
Qeyd olunub ki, şəhər prokurorluğu əməkdaşları tərəfindən ibtidai araşdırmaya prosessual rəhbərlik əsasən düzgün təşkil edilib, bu sahədə tələbkarlıq daha da artırılıb, istintaq və təhqiqatın tam, hərtərəfli və obyektiv aparılmasına nəzarət gücləndirilib. Görülmüş müsbət işlərin nəticəsidir ki, il ərzində prokurorluqda 578, daxili işlər orqanlarında isə 4644 cinayət işinin istintaqının tamamlanması təmin edilib.
Müşavirədə vətəndaşların qəbulu, onların müraciətlərinə baxılması işinə xüsusi diqqət yetirilərək hər bir əməkdaşdan vətəndaşların qəbulu və onların müraciətlərinin araşdırılması işinə qayğı və həssaslıqla yanaşması tələb olunub. Bildirilib ki, hesabat dövründə Bakı Şəhər Prokurorluğunda ümumilikdə 1876 vətəndaşın qəbulu təşkil edilib. Onlardan 403 nəfəri şəxsən şəhər prokuroru tərəfindən qəbul olunub.
Bundan başqa, Azərbaycan Prezidentinin “Sahibkarlığın inkişafına mane olan müdaxilələrin qarşısının alınması haqqında” 2002-ci il 28 sentyabr tarixli Fərmanı, “Sahibkarlıq sahəsində aparılan yoxlamaların dayandırılması haqqında” 2015-ci il 20 oktyabr tarixli Qanun və bu sahədə qəbul edilmiş digər normativ hüquqi aktlar, habelə həmin qanunların və normativ aktların tələblərinə uyğun olaraq qəbul edilmiş Baş Prokurorun müvafiq əmrləri bir daha müşavirə iştirakçılarının diqqətinə çatdırılaraq bu sahədə prokuror nəzarətinin gücləndirilməsi və qüvvədə olan qanunvericiliyin tələblərinə əməl edilməsi tələb olunub.
Yekunda şəhər prokuroru Əziz Seyidov hər bir prokurorluq əməkdaşının dövlət səviyyəsində göstərilən böyük etimadı doğruldacağına, insan və vətəndaş hüquq və azadlıqlarının təmin edilməsi, cinayətkarlığa qarşı mübarizə, qanunçuluğun və hüquq qaydasının möhkəmləndirilməsi sahəsində öz qulluq və vəzifə borclarını layiqincə yerinə yetirəcəklərinə əminliyini ifadə edib.

Paylaş:

Baxılıb: 700 dəfə