Türkiyə hökuməti Azərbaycanın maraqlarına zidd siyasət aparmamalıdır

Bakı:

21 °C

56 %

3 m/s

Əlaqə

AZ RU EN

Ana səhifə / Siyasət / Türkiyə hökuməti Azərbaycanın maraqlarına zidd siyasət aparmamalıdır

Türkiyə hökuməti Azərbaycanın maraqlarına zidd siyasət aparmamalıdır

09.04.2009 [16:26]

Milli Məclisin İqtisadi Siyasət Komitəsinin mövqeyi belədir
Parlamentin İqtisadi Siyasət Komitəsinin dünənki iclasında “Xüsusi iqtisadi zonalar haqqında” Qanun layihəsi üçüncü oxunuşda müzakirəyə çıxarılıb. Bundan öncə isə komissiya üzvləri Azərbaycan Prezidentinin Təhlükəsizlik Şurasının iclasındakı çıxışını müsbət qiymətləndiriblər. Eləcə də, Türkiyə-Ermənistan münasibətləri ilə bağlı fikirlərini bildiriblər. İqtisadi Siyasət Komitəsinin sədri Ziyad Səmədzadə bildirib ki, dövlət başçısı Təhlükəsizlik Şurasının iclasında dövlətçiliyimiz üçün mühüm olan istiqamətlər barədə öz mövqeyini ifadə edib: “Azərbaycan Prezidentinin mövqeyini cəmiyyətimiz birmənalı şəkildə dəstəkləyir. Son zamanlar Türkiyə və Ermənistan arasında sərhədlərin açılması barədə məlumatlar haqlı olaraq ictimaiyyəti narahat edib. ABŞ prezidentinin Türkiyə-Ermənistan münasibətləri haqqında fikirləri də narahatlıq yaradır. Bütün bunlar barədə biz Azərbaycan cəmiyyətini təmsil edərək dövlət başçımızın mövqeyini dəstəkləyirik. Dəfələrlə ölkəmizə qarşı ikili standartların şahidi oluruq. Buna baxmayaraq, Azərbaycanın milli maraqları hər şeydən üstün tutulmalıdır”. Z.Səmədzadə məsələ ilə bağlı Milli Məclisdə təmsil olunan siyasi partiyaların və kütləvi informasiya vasitələrinin bəyanatlarını da təqdir edib. O deyib ki, ölkəmizin haqq işi xalqımız tərəfindən dəstəklənir. Komitə sədri parlamentdə qanunvericilik işlərinin də milli maraqlarımıza uyğun qəbul olunduğunu bildirib. Z.Səmədzadənin sözlərinə görə, bəzi xarici ekspertlər, hətta xüsusi iqtisadi zonalar haqqında qanun qəbul edilməsinə qarşı çıxıblar: “Amma biz beynəlxalq təcrübədən çıxış edərək bu qanunu qəbul edirik. Qanunun qəbulundan sonra Nazilər Kabineti xüsusi iqtisadi zonaların yaradılması istiqamətində tədbirlər görəcək”.
Komitənin üzvü, millət vəkili Vahid Əhmədov təklif edib ki, Türkiyə-Ermənistan münasibətlərinə dair məsələ Milli Məclisin müzakirəsinə çıxarılsın: “Parlamentdə təmsil olunan siyasi partiyalar yaranmış vəziyyətlə bağlı birgə mövqe bildirsələr də, bütövlükdə, məsələ Milli Məclisin müzakirəsinə çıxarılmalıdır. Azərbaycanla Türkiyə qardaş dövlətdir, bütün beynəlxalq təşkilatlarda Türkiyə ölkəmizin mövqeyini dəstəkləyir. Amma Türkiyənin AKP hökumətinin siyasəti arxadan zərbə kimi başa düşülməlidir. ABŞ prezidentinin də fikirləri onu göstərdi ki, o, Türkiyə-Ermənistan sərhədlərinin açılmasının tərəfdarıdır. Ağır iqtisadi şəraitdə olan Ermənistan Rusiya tərəfindən silahla təchiz olunur. Sərhədlər açılandan sonra isə Türkiyə də Ermənistanı iqtisadi cəhətdən təchiz edə bilər. Türkiyə unutmamalıdır ki, Mərkəzi Asiyaya çıxışı Azərbaycan vasitəsilədir”. Millət vəkili yaranmış vəziyyətlə əlaqədar Milli Məclisin qərar qəbul etməsini təklif edib.
Sosial Rifah Partiyasının sədri, millət vəkili Xanhüseyn Kazımlı da qeyd edib ki, Ermənistanda terror, narkobiznes dövlət siyasətinin tərkib hissəsidir: “Belə olan halda, terrora məruz qalan ABŞ-ın Ermənistanı dəstəkləməsi, uydurma soyqırımı iddialarını tanımaq istəməsi başadüşülən deyil. Başa düşürük ki, Türkiyəyə qarşı xarici təzyiqlər var. Amma Türkiyənin bu təzyiqlər qarşısında geri çəkilməsi bağışlanmazdır”.
Millət vəkili Nazim Məmmədov isə Türkiyə-Ermənistan münasibətlərinin Milli Məclisin müzakirəsinə çıxarılmasını məqsədəuyğun saymayıb. Onun sözlərinə görə, bəzi xarici qüvvələrin Türkiyənin Azərbaycanla münasibətlərinin pozulmasında maraqları var: “Buna görə də, diqqətli olmalıyıq. Türkiyə rəsmiləri bəyan ediblər ki, Azərbaycanın maraqlarına zidd addım atmayacaqlar. Hər halda, bu məsələdə müəyyən qədər gözləməliyik. Milli Məclisin sədri Oqtay Əsədov məsələyə münasibət bildirib. Ona görə də, parlamentdə geniş müzakirələrin aparılmasına ehtiyac yoxdur. Amma bu yöndə ictimai müzakirələr davam etməlidir”.
Komitə sədrinin müavini çingiz Əsədullayev də N.Məmmədovun təklifini dəstəkləyib: “Əlbəttə sərhədlərin açılması Azərbaycanın maraqlarına zidd olan məsələdir. Türkiyənin dövlət və hökumət başçıları bəyan ediblər ki, Ermənistanla aparılan danışıqlarda Azərbaycanın maraqları qorunur. Danışıqların gedişi bizə geniş izah edilməlidir. Ona görə də, məsələyə ehtiyatlı yanaşmalıyıq”.
Komitə üzvləri çıxışlarında “Xüsusi iqtisadi zonalar haqqında” Qanun layihəsinin üçüncü oxunuşa təkmil formada çıxarıldığını bildiriblər. Qeyd edək ki, bu qanun Azərbaycanda xüsusi iqtisadi zonaların yaradılması və idarə edilməsi ilə bağlı hüquqi və iqtisadi münasibətləri tənzimləyir, həmin zonalarda sahibkarlıq fəaliyyətinin təşkili qaydalarını müəyyənləşdirir. Millət vəkili Əli Məsimli böhran şəraitində neftdənkənar sahələrin inkişaf etdirilməsini vacib hesab edir. Bu cəhətdən xüsusi iqtisadi zonaların yaradılması önəmlidir.
Millət vəkili V.Əhmədovun sözlərinə görə, dünyada 600-ə yaxın iqtisadi zonalar var. Bu zonalar investorlar üçün cəlbedici olmalıdır. O, qeyd edib ki, ilkin şəraitdə dövlət xüsusi zonaların yaradılmasına maliyyə ayırmalıdır. Bu işi yalnız investorlar həyata keçirməməlidir.
Komitənin sədri Ziyad Səmədzadə millət vəkillərinin təkliflərinin nəzərə alınacağını bildirib.
Sonda qanun layihəsinin Milli Məclisin müzakirəsinə çıxarılması tövsiyə olunub.
Nardar BAYRAMLI

Paylaş:

Baxılıb: 1582 dəfə