Naxçıvan şəhərində Şərq hamamı istifadəyə verilib

Bakı:

21 °C

73 %

6 m/s

Əlaqə

AZ RU EN

Ana səhifə / Siyasət / Naxçıvan şəhərində Şərq hamamı istifadəyə verilib

Naxçıvan şəhərində Şərq hamamı istifadəyə verilib

18.12.2015 [10:22]

Naxçıvan qədim şəhər mədəniyyətinə malikdir. Bu mədəniyyətin izləri qədim tikililərdə və tarixi abidələrdə yaşayır. Vaxtilə Naxçıvan şəhərində inşa olunan zəngin tərtibatlı hamamlar bu gün tarixi-memarlıq abidələri kimi mədəniyyətimizin nadir inciləri sırasına daxil olub. Bu gün də Naxçıvan şəhərində ictimai mədəni xidmət obyektlərinin inşasına xüsusi diqqət yetirilir.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, bu sahədə görülən işlərin davamı olaraq dekabrın 17-də Naxçıvan şəhərinin Əlincə məhəlləsində Şərq hamamı istifadəyə verilib.
Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib.
Naxçıvan şəhər İcra Hakimiyyətinin başçısı Vüqar Səfərov çıxış edərək deyib ki, “2014-2015-ci illərdə Naxçıvan şəhərinin sosial-iqtisadi inkişafı üzrə Proqram”a uyğun olaraq Naxçıvan şəhərində yeni istehsal müəssisələri yaradılıb, müasir yollar və körpülər salınıb, təhsil, səhiyyə, mədəniyyət obyektləri, inzibati və yaşayış binaları tikilərək istifadəyə verilib. Həmçinin şəhərdəki tarixi abidələr memarlıq elementləri qorunub saxlanılmaqla bərpa olunub. Hazırda şəhərdə yeni parkın salınması işləri davam etdirilir. İstifadəyə verilən Şərq hamamının da bu sahədə görülən işlərin davamı olduğunu bildirən icra başçısı şəhər sakinləri adından minnətdarlıq edib.
Naxçıvan Muxtar Respublikası Ali Məclisinin Sədri Vasif Talıbov tədbirdə çıxış edərək deyib: “2014-cü ildə Naxçıvan şəhərinin sosial-iqtisadi inkişafını təmin etmək məqsədilə Sərəncam imzalanmış, “2014-2015-ci illərdə Naxçıvan şəhərinin sosial-iqtisadi inkişafı üzrə Proqram” qəbul olunmuşdur. Proqrama uyğun olaraq muxtar respublikanın paytaxtı Naxçıvan şəhərində quruculuq tədbirləri həyata keçirilmişdir. Bu tədbirlər içərisində vacib sahələrdən biri də yeni hamam kompleksinin tikilməsi idi”.
Ali Məclisin Sədri deyib: “Bu gün muxtar respublikanın bütün yaşayış məntəqələrində dayanıqlı qaz, elektrik və su təminatı vardır. Hər bir ailə öz mənzilində lazımi məişət şəraiti yaratmışdır. Lakin Naxçıvanın paytaxt şəhəri olması və burada 10 minə yaxın tələbənin təhsil alması yeni mədəni xidmət obyektinin - hamam kompleksinin tikintisini zəruri edirdi. Yeni hamam kompleksi əhaliyə xidmət göstərməklə yanaşı, həm də memarlıq abidəsi kimi inşa olunmalı, Şərq adət-ənənələri və üslubu qorunub saxlanılmalı idi. Tikinti işləri aparılarkən bu amillər nəzərə alınmış, qədim Şərq adət-ənənələri və üslubuna uyğun yeni hamam kompleksi inşa olunmuşdur”.
Ali Məclisin Sədri Şərq hamamında yeni işlə təmin olunanları və gələcək istifadəçiləri təbrik edib, kompleksin tikintisində əməyi olanlara təşəkkürünü bildirib.
Baxış zamanı məlumat verilib ki, Şərq hamamı özünəməxsus memarlıq quruluşu ilə diqqəti cəlb edir. Burada göstərilən xidmətlərdən saatda 100 nəfər istifadə edəcəkdir. Hamam qadınlar və kişilər üçün nəzərdə tutulan iki ayrı bölmədən ibarətdir. Həmçinin burada hamam ləvazimatlarının satışı mağazası və çay evi də fəaliyyət göstərir. Şərq hamamında 15 nəfər işlə təmin olunub.
Həyətdə hər birinin tutumu 25 ton olan 3 su çəni qoyulub, davamlı su təminatı yaradılıb, geniş abadlıq işləri görülüb.

Paylaş:

Baxılıb: 692 dəfə