Musa Quliyev: Təkcə ipoteka ilə əhalinin mənzil tələbatı ödənilmir

Bakı:

25 °C

64 %

0 m/s

Əlaqə

AZ RU EN

Ana səhifə / Siyasət / Musa Quliyev: Təkcə ipoteka ilə əhalinin mənzil tələbatı ödənilmir

Musa Quliyev: Təkcə ipoteka ilə əhalinin mənzil tələbatı ödənilmir

26.08.2015 [10:09]

“Sosial Mənzil Fondunun yaradılması dövlətin diqqət mərkəzindədir. Hesab edirəm ki, bu məsələ Milli Məclisin payız sessiyasında gündəliyə salınarsa, yaxşı olar”. Bu sözləri SİA-ya açıqlamasında Milli Məclisin Sosial siyasət komitəsinin üzvü, millət vəkili Musa Quliyev deyib.
Millət vəkili vurğulayıb ki, Azərbaycan Prezidentinin əhalinin sosial-iqtisadi şəraitinin yaxşılaşdırılması ilə bağlı konkret Sərəncamı var və bu Sərəncamdan irəli gələn məsələlər uğurla həyata keçirilir: “Əhalinin sosial rifahının yaxşılaşdırılması, yoxsulluğun aradan qaldırılması və ölkəmizin sosial- iqtisadi inkişafının yüksəldilməsi üçün konkret proqram var və bununla bağlı lazımi tədbirlər həyata keçirilir. Əhalinin yoxsulluğunun aradan qaldırılmasının əsas istiqamətlərindən biri də əhalinin mənzil təminatının yaxşılaşdırılmasıdır. Azərbaycanda hər il 80-85 min yeni ailə qurulur. Bu ailələrin böyük əksəriyyətinin ya yeni mənzilə, ya da mövcud mənzilinin genişləndirilməsinə ehtiyacı var. Bildiyimiz kimi, dövlət tərəfindən qaçqınlar, şəhid ailələri, Qarabağ əlilləri üçün evlər tikilərək verilir. Qalan kateqoriyadan olan insanlar gərək ya öz pulu ilə ev alsın, ya torpaq alaraq ev tiksin, ya da ipotekadan yararlansın. Azərbaycanda İpoteka Fondunun imkanları genişlənir. Cənab Prezidentin bununla bağlı Sərəncamı oldu və gələn ildən İpoteka Fonduna 200 milyon manat əlavə vəsait ayrılacaq ki, insanlarımız bundan istifadə edə bilsinlər. Amma təkcə ipoteka ilə, dövlətin tikdiyi evlə dünya praktikasında əhalinin mənzil tələbatı ödənilmir”.
Musa Quliyev insanların mənzillə təmin olunması üçün bir neçə variant haqqında da məlumat verib. O qeyd edib ki, İpoteka Fondu ilə ildə qurulan 80-85 min yeni ailəni mənzillə təmin etmək mümkün deyil: “Bunun üçün başqa yollar da var, bu yollardan biri aztəminatlı insanlara mənzil şəraitini yaxşılaşdırmaq üçün dövlətin və bələdiyyənin dəstəyidir. Bu da sosial evlərin tikilməsi və bununla bağlı fondun yaradılması və sosial kirayə müqaviləsi bağlayaraq həmin insanları evlərə köçürməkdir. Dünyada mənzil təminatı ilə bağlı müxtəlif ölkələrin praktikası var və bunlardan ən yaxşısı Sinqapur praktikasıdır ki, biz də həmin praktikadan istifadə edə bilərik. Sinqapur praktikasında sosial evlər fondu yaradılır, həmin fonda işə götürən də işçi də müəyyən vəsait ödəyir və müəyyən vəsait ödənildikdən sonra, növbəlilik əsasında şəxs həmin fonddan tikilən evi alır və geridə qalan vəsaiti 5-10 il ərzində kirayə şəklində fonda ödəyir. Başqa bir variant isə fond olmadan dövlətin özünün evləri tikməsidir. Belə ki, tikilən evlər növbəlilik əsasında aztəminatlı ailələrə verilir və həmin ailə də uzunmüddətli kirayə şəklində evin pulunu dövlətə ödəyir. Belə evlərin başa gəlməsi də ucuz olur. Çünki, həmin evlərin bir kvadrat metri 200- 300 dollara başa gəlir. Bu həm dövlətin özü üçün, həm də vətəndaş üçün sərfəlidir. Hesab edirəm ki, bizim də dövlətimiz bu sahədə ipoteka kreditləşməsi ilə yanaşı, sosial evlərin tikilməsi sahəsində də öz təşəbbüsünü göstərməlidir və bu, insanların ildən- ilə mənzilə artan tələbatının ödənilməsinə dəstək olar. Eyni işi bələdiyyələr də görə bilər. Bələdiyyələr də fond yarada bilir və yaxud öz hesabı varsa, evi tikir və uzun müddətə kirayə verir. Başqa bir variantı isə, dövlətin sahibkara bütün şəraiti yaratmasıdır. Torpağı sahibkara pulsuz verməklə və ya tender elan etməklə də ev tikdirə bilər. Müxtəlif variantlar var və bunların hər biri sosial kirayə müqaviləsi əsasında insanların mənzillə bağlı şəraitinin yaxşılaşmasına xidmət edir. Hesab edirəm ki, bunun üçün bizim imkanımız da var”.

Paylaş:

Baxılıb: 577 dəfə