Musa Quliyev: “Amnesty International” əqrəb kimi bir təşkilatdır

Bakı:

20 °C

70 %

7 m/s

Əlaqə

AZ RU EN

Ana səhifə / Siyasət / Musa Quliyev: “Amnesty International” əqrəb kimi bir təşkilatdır

Musa Quliyev: “Amnesty International” əqrəb kimi bir təşkilatdır

05.03.2015 [10:08]

“Amnesty International”ın Azərbaycanla bağlı heç vaxt müsbət, ədalətli mövqeyi olmayıb”. Bunu SİA-ya Yeni Azərbaycan Partiyası (YAP) Siyasi Şurasının üzvü, millət vəkili Musa Quliyev “Amnesty International”ın bu ilin yayında Azərbaycanda keçiriləcək birinci Avropa Oyunlarını boykot etməyə ünvanlanmış müraciətinə münasibət bildirərkən deyib.
Onun sözlərinə görə, sözügedən təşkilat ona görə yaranıb ki, sürətlə inkişaf etməkdə olan və dünya düzənində özünə daha nüfuzlu yer tutmağa layiq, imkanı olan ölkələri həmişə müəyyən qarayaxmalarla, təhdidlərlə, böhtanlarla nüfuzdan salmağa çalışsın: “İndiyədək bu təşkilatın bütün arxivinə nəzər salsaq görərik ki, onun Azərbaycanla bağlı heç bir müsbət fikri olmayıb. Təbii ki, indiki məqamda da onların əllərinə təzə bəhanə düşüb. Bildiyiniz kimi, bu ilin yayında Azərbaycanda birinci Avropa Oyunları keçiriləcək. Azərbaycan dünya tarixinə birinci Avropa Oyunlarını keçirən dövlət kimi düşəcək. Onlar istəyirlər ki, müxtəlif bəhanələrlə (Ukraynadakı hadisələri ortaya atmaqla, guya Azərbaycanda insan haqlarının pozulması, siyasi məhbusların olması ilə bağlı, mətbuat azadlığına qəsd edilməsi və s.) özlərinin Avropadakı tamaşaçılarına, oxucularına müraciət etsinlər və Azərbaycana qarşı qarayaxma kampaniyasına başlasınlar”.
M.Quliyev bildirib ki, Azərbaycan xalqı öz Prezidentinin, iqtidarının siyasətini dəstəkləyir: “Buna görə də, onlar Azərbaycan daxilində heç bir müvəffəqiyyət əldə edə bilmirlər. İndi də onlar xarici auditoriyaya müraciət etməyə başlayırlar. İnanıram ki, burada da heç bir nəticə əldə etməyəcəklər. Çünki belə müraciətlər çox olub və bundan sonra da ola bilər. Bu ilin yayında Azərbaycanda birinci Avropa Oyunları çox yüksək səviyyədə keçiriləcək. Həmçinin də, ölkəmizə gələn qonaqlara Azərbaycan xalqı öz qonaqpərvərliyini göstərəcək. İdman əslində birlik, bərabərlik, dostluq, sülh, qardaşlıq rəmzidir. İdman əslində xalqları birləşdirən, yaxınlaşdıran, eləcə də münasibətləri yaxşılaşdıran vasitədir. Təbii ki, bu, Azərbaycanı dünya, Avropa xalqlarına daha da yaxınlaşdıracaq. Bu oyunlar Azərbaycanın uğurlarını, mədəniyyətini, inkişafını dünyaya bir daha nümayiş etdirəcək. Bu, tək bir idman aksiyası deyil, həm də siyasi, nüfuzlu bir aksiyasıdır. Hesab edirəm ki, biz tədbiri çox yüksək səviyyədə keçirəcəyik. Bakıda keçirilən “Eurovision” mahnı müsabiqəsində olduğu kimi bütün iştirakçılar birinci Avropa Oyunlarından da razı qalacaqlar və Azərbaycanı yüksək qiymətləndirəcəklər.
Ümumiyyətlə, əqrəbin funksiyası odur ki, haradasa kimisə çalsın və zəhərləsin. Təbii ki, “Amnesty International” da əqrəb kimi bir təşkilatdır”.

Paylaş:

Baxılıb: 684 dəfə