Ermənistan danışıqlar prosesində imitasiya taktikasını seçib

Bakı:

16 °C

94 %

5 m/s

Əlaqə

AZ RU EN

Ana səhifə / Siyasət / Ermənistan danışıqlar prosesində imitasiya taktikasını seçib

Ermənistan danışıqlar prosesində imitasiya taktikasını seçib

11.02.2015 [10:02]

İƏT Parlament İttifaqı çərçivəsində Müsəlman Qadın Parlamentarilərinin IV Forumunda millət vəkili Gövhər Baxşəliyeva Ermənistanın işğalçılıq siyasəti ilə bağlı çıxış edib
Məlum olduğu kimi, bu yaxınlarda İstanbul şəhərində İslam Əməkdaşlıq Təşkilatı Parlament İttifaqının 10-cu sessiyası keçirilib. Azərbaycan nümayəndə heyəti bu toplantıda fəal iştirak edib. Sessiya çərçivəsində Müsəlman Qadın Parlamentarilərinin IV Forumu keçirilib. Forumda ölkəmizi Milli Məclisin İƏT Parlament İttifaqında nümayəndə heyətinin rəhbəri, AMEA-nın Şərqşünaslıq İnstitutunun direktoru Gövhər Baxşəliyeva təmsil edib. Forumu giriş sözü ilə açan İƏT Pİ baş katibi Mahmud Erol Kılıc müsəlman aləmində baş verən proseslər və bu proseslərdə qadınların rolu, qadınların hüquqlarının qorunması, ailə və uşaq, qadına qarşı zorakılıqla mübarizə və müasir dünya üçün böyük aktuallıq kəsb edən digər məsələlərdən danışıb.
Tədbirdə çıxış edən Azərbaycan nümayəndə heyətinin rəhbəri Gövhər Baxşəliyeva ölkəmizdə dövlət səviyyəsində ailə, qadın və uşaq siyasətindən, qadın hüquqlarından, qadınların inkişafı üçün yaradılmış hərtərəfli şəraitdən bəhs edib. Bununla belə, G.Baxşəliyeva Azərbaycan qadınlarının böyük bir qisminin 20 ildən artıqdır ki, erməni işğalından əziyyət çəkdiyini, ata-baba torpaqlarını tərk etdiyini, qaçqın-köçkün vəziyyətində yaşadığını, müharibənin gətirdiyi bütün fəlakətləri yaşadığını Forum iştirakçılarının nəzərinə çatdırıb və Ermənistan-Azərbaycan Qarabağ münaqişəsinin bütövlükdə xalqımıza gətirdiyi bəlalardan danışıb. O, bu günədək BMT Təhlükəsizlik Şurasının məlum 4 qətnaməsinin və digər beynəlxalq təşkilatların Azərbaycan torpaqlarının işğalı ilə bağlı qərarlarının icra olunmadığını təəssüflə qeyd edib: “Ermənistan, sadəcə olaraq, danışıqlar prosesində imitasiya taktikasını seçib. O sülh istəmir, işğal edilmiş torpaqlardan çıxmaq istəmir. İşğalçı dövlətə təzyiq göstərilməlidir. O məcbur edilməlidir ki, işğal olunmuş torpaqlardan çıxsın. Nə üçün başqa yerlərdə qəbul edilmiş qətnamələr dərhal icra edilir, bizə gəldikdə icra edilmir?! Bu, ədalətsizlikdir, ikili standartlardır. Artıq Azərbaycan xalqı bunu yaxşı bilir, dərk edir ki, bu problemin həll olunmaması təkcə Ermənistanın qeyri-konstruktiv mövqeyi ilə izah edilə bilməz. Görünür, dünyada elə qüvvələr var ki, bu münaqişənin həll olunmasında maraqlı deyillər. Görünür, elə qüvvələr var ki, bu münaqişənin doldurulmuş vəziyyətdə qalmasında və bundan Azərbaycana bir təzyiq vasitəsi kimi istifadə etməkdə maraqlıdırlar. Son illərdə müxtəlif bölgələrdə - Avropada, Yaxın və Orta Şərqdə gördüyümüz mənzərə bu yanaşmanı daha da gücləndirir”.
Azərbaycanın demokratiyanın inkişafına, insan haqlarının qorunmasına, ədalətin bərqərar olmasına çox böyük və dəyərli töhfələr verməsini diqqətə çatdıran G.Baxşəliyeva, xüsusilə ölkəmizin multikulturalizmlə bağlı təcrübəsini vurğulayıb. Beynəlxalq münasibətlərdə ikili standartların mövcudluğunu qeyd edən millət vəkili bunun heç kimə xeyir gətirmədiyini deyib: “Ölkələrin daxili işlərinə qarışma onları qarışdırır, sabitliyi pozur, ölkələrdə qanlı toqquşmalara gətirib çıxarır və bu, qanlı toqquşmaların arxasında dayanan qüvvələrə də nəticə etibarilə mənfi təsir göstərir. Çünki bu gün dünyada bütün ölkələr, demək olar ki, bir-biri ilə bağlıdır və istənilən yerdə baş verən hadisə nə vaxtsa başqa yerdə də öz əks-sədasını verir”.
Forumun yekunu olaraq qətnamə qəbul edilib.
N.BAYRAMLI

Paylaş:

Baxılıb: 653 dəfə