Müstəqil Azərbaycanın neft strategiyası dövlətimizin həm daxili, həm də xarici siyasətinin əsas tərkib hissəsinə çevrilib

Bakı:

21 °C

59 %

2 m/s

AZ RU EN

Ana səhifə / Siyasət / Müstəqil Azərbaycanın neft strategiyası dövlətimizin həm daxili, həm də xarici siyasətinin əsas tərkib hissəsinə çevrilib

Müstəqil Azərbaycanın neft strategiyası dövlətimizin həm daxili, həm də xarici siyasətinin əsas tərkib hissəsinə çevrilib

20.09.2014 [10:20]

Sentyabrın 19-da Bakı Dövlət Universitetində (BDU) “Əsrin müqaviləsi”nin imzalanmasının 20 illiyinə həsr olunmuş tədbir keçirilib.
AzərTAc xəbər verir ki, müvafiq qurumların nümayəndələrinin, tanınmış alimlərin və tələbələrin iştirak etdikləri tədbirdə BDU-nun rektoru, Milli Məclisin deputatı, akademik Abel Məhərrəmov Ümummilli liderimiz Heydər Əliyevin dahiyanə siyasəti nəticəsində Qərbin iri neft şirkətləri ilə uğurlu danışıqlar aparılaraq 1994-cü il sentyabrın 20-də bütün dünyada “Əsrin müqaviləsi” adı ilə tanınan neft kontraktlarının imzalandığını xatırladıb.
“Əsrin müqaviləsi”nin tarixi əhəmiyyətindən danışan rektor bu sazişin müstəqil Azərbaycanın inkişafında mühüm rolunu vurğulayıb. Qeyd edilib ki, bu gün Azərbaycanın tərəqqisinin əsasını Ulu öndər Heydər Əliyev tərəfindən işlənib hazırlanmış yeni neft strategiyası qoyub.
Ulu öndər Heydər Əliyev siyasətinin Azərbaycan Prezidenti İlham Əliyev tərəfindən uğurla davam etdirildiyini diqqətə çatdıran akademik A.Məhərrəmov ölkəmizdə fədakar neftçi əməyinə xüsusi qiymət verildiyini, neftçilərə daim böyük qayğı göstərildiyini bildirib.
Azərbaycan Respublikası Dövlət Neft Şirkətinin (ARDNŞ) birinci vitse-prezidenti, akademik Xoşbəxt Yusifzadə Ümummilli lider Heydər Əliyevin müasir müstəqil dövlətimizin qurulmasında, möhkəmləndirilməsində və dünyaya tanıdılmasında əvəzsiz tarixi xidmətlərindən danışıb.
Azərbaycan neft sənayesinin inkişaf mərhələlərindən bəhs edən X.Yusifzadə qeyd edib ki, 1994-cü ildən sonra Azərbaycanın neft epopeyasının yeni parlaq mərhələsi başlandı. Bu mərhələ “Əsrin müqaviləsi”nın və Ümummilli lider Heydər Əliyevin yeni neft strategiyasının işlənib hazırlanması və həyata keçirilməsi illərini əhatə edir. 1994-cü il sentyabrın 20-də dahi rəhbər Heydər Əliyevin misilsiz əməyi sayəsində Azəri-Çiraq-Günəşli (dərinsulu hissə) yataqlarının işlənməsi üzrə dünyanın yeddi ölkəsinin 11 məşhur neft şirkəti - bp, “Statoyl”, “Amoko”, “TPAO”, “İtoci”, “ExxonMobil”, “LUKoyl”, “Delta”, “Remko”, “MacDermot”, “Hess” şirkətləri ilə sonralar tarixə “Əsrin müqaviləsi” kimi düşmüş “hasilatın pay bölgüsü” sazişi imzalanıb. Həmin vaxtdan başlayaraq, müstəqil Azərbaycanın neft strategiyası dövlətimizin həm daxili, həm də xarici siyasətinin əsas tərkib hissəsinə çevrilib.
X.Yusifzadə vurğulayıb ki, Ulu öndər Heydər Əliyevin Fərmanı ilə 2001-ci ildən etibarən sentyabrın 20-si ölkəmizdə Neftçilər Günü kimi qeyd olunur.
ARDNŞ-in birinci vitse-prezidenti Azərbaycanın qazandığı digər uğurlardan da danışıb.
Azərbaycan Ağsaqqallar Şurasının sədri, Milli Məclisin deputatı Fəttah Heydərov, Milli Məclisin İqtisadi siyasət komitəsinin sədri, akademik Ziyad Səmədzadə Ümummilli lider Heydər Əliyev siyasətinin uğurlu bəhrələrindən, “Əsrin müqaviləsi”nin ölkəmizin tərəqqisində tarixi rolundan bəhs edib, dahi rəhbərin ideyalarının Azərbaycan Respublikasının Prezidenti İlham Əliyev tərəfindən qətiyyətlə həyata keçirildiyini vurğulayıblar. Bu siyasət nəticəsində Azərbaycanın hazırda çox sürətlə inkişaf etdiyi bildirilib.

Paylaş:

Baxılıb: 739 dəfə