Qubada dini icmalar üçün regional konfrans başa çatıb

Bakı:

27 °C

64 %

15 m/s

Əlaqə

AZ RU EN

Ana səhifə / Siyasət / Qubada dini icmalar üçün regional konfrans başa çatıb

Qubada dini icmalar üçün regional konfrans başa çatıb

18.09.2014 [09:58]

Sentyabrın 17-də Qubada Dini Qurumlarla İş üzrə Dövlət Komitəsinin (DQİDK) təşkilatçılığı ilə respublikanın şimal bölgəsində fəaliyyət göstərən dini icma sədrləri, imam və axundlar, eləcə də fəal dindar və ilahiyyatçılar üçün “Milli adət-ənənələrimiz və müasirlik” mövzusunda ikigünlük regional konfrans başa çatıb.
Regional konfransın hər iki iş gününün tədbirlərində Azərbaycan Respublikasının millətlərarası, multikulturalizm və dini məsələlər üzrə Dövlət müşaviri xidmətinin baş məsləhətçisi Müzəffər Talıblı iştirak edib.
Dini Qurumlarla İş üzrə Dövlət Komitəsinin mətbuat xidmətindən AzərTAc-a bildiriblər ki, dövlət-din münasibətlərinin daha yüksək səviyyədə tənzimlənməsi, dini maarifləndirmə işinin təşkili və aparılması, həmçinin dini icmaların cəmiyyətdə radikalizm meyllərinin qarşısının alınması və sosial problemlərin həlli prosesinə cəlb olunması məqsədilə keçirilən regional konfransın ikinci günü bir sıra maraqlı məruzələrlə yadda qalıb.
“Ənənəvi İslam dini radikalizmlə mübarizədə real alternativ kimi” mövzusunu əhatə edən plenar iclasda ilk olaraq Qafqaz Müsəlmanları İdarəsinin bölgə qazısı Naib Səttarov “Azərbaycanın şimal bölgəsində ənənəvi İslam” mövzusunda məruzə ilə çıxış edib. Natiq tarixən ölkəmizdə mövcud olan İslam dəyərləri, ənənəvi məzhəblər və onlar arasında olan tolerantlıq ənənələrindən danışıb.
Mövzunun davamı olaraq Bakı İslam Universitetinin müəllimi Aslan Həbibov “Ənənəvi İslam: dini radikalizmə qarşı mənəvi müdafiə sistemi” mövzusunda məruzəsində son illərdə yayılan qeyri-ənənəvi, radikal dini cərəyanların ənənəvi İslamın düzgün təbliğ edilməsi ilə qarşısının alınmasının vacib olduğunu diqqətə çatdırıb.
“Milli adət-ənənələrimiz: dini icmalar və din xadimlərimiz” adlı plenar iclasda Dini Qurumlarla İş üzrə Dövlət Komitəsinin şöbə müdiri Niyaz Yaqubov “Milli mənəvi dəyərlərimizin təbliğ olunmasında dini icmaların yeri və rolu” mövzusundakı məruzəsində milli mənəvi dəyərlərimizin təbliğ edilməsi, xüsusilə gənclərimizin bu ruhda yetişməsi üçün din xadimlərinin, dini icmaların fəaliyyətinin vacib olduğunu vurğulayıb.
Dini Araşdırmalar Mərkəzinin icraçı direktoru Natiq Rəhimov “Din xadimlərinin natiqlik qabiliyyəti və motivasiya üsulları” mövzusunda məruzəsində ruhanilərin və din xadimlərinin dinimizin təbliğ edilməsi istiqamətində apardıqları işdə cəmiyyətin ayrı-ayrı fərdlərinin xüsusiyyətlərinə uyğun metodlardan istifadə edilməsinin əhəmiyyətini diqqətə çatdırıb.
Fasilədən sonra işini davam etdirən konfransda Dini Qurumlarla İş üzrə Dövlət Komitəsinin dinşünaslıq ekspertizası, ictimai məsələlər və analitik təhlil şöbəsinin müdiri Nahid Məmmədovun “Vətənpərvərlik milli mənəvi dəyər kimi”, həmin şöbənin müdir müavini Əliheydər Zülfüqarovun “Dini icmaların fəaliyyəti: imkanlar və perspektivlər”, Qafqaz Müsəlmanları İdarəsinin Quba rayonu üzrə səlahiyyətli nümayəndəsi, Quba şəhəri “Hacı Cəfər” məscidinin imamı Elnur Əfəndiyevin “İslamda Vətən və dövlət sevgisi” mövzularında məruzələri dinlənilib, fikir mübadiləsi aparılıb.
Tədbirdə çıxış edən Quba rayonunun Qırımızı qəsəbə dağ yəhudiləri dini icmasının sədri Boris Simanduyev bildirib ki, Azərbaycanda bütün dini icmalar əsrlər boyu birgə tolerantlıq şəraitində yaşayıblar. Boris Simanduyev buna misal olaraq Azərbaycanda yəhudilərin adət-ənənələrinin qorunub saxlanmasında müsəlmanların böyük xidmətlərini diqqətə çatdırıb. Bildirib ki, “buna görə də mən bütün yəhudilər adından Azərbaycan xalqına təşəkkür edirəm”.
Konfransın bağlanış mərasimində çıxış edən DQİDK-nın sədr müavini Gündüz İsmayılov bildirib ki, din xadimləri növbəti konfranslar üçün onları maraqlandıran mövzular təklif edə bilərlər.
Bu konfransların əsas məqsədinin təkcə maarifləndirmə deyil, həm də dini icmaların təşkilatlandırılması və təlimatlandırılması olduğunu diqqətə çatdıran G.İsmayılov növbəti belə tədbirlərə dindarların cəlb edilməsi prosesində icmaların yaxından iştirakının zəruriliyini vurğulayıb. Bildirib ki, dini icmalar və din xadimləri regiondakı dini durumu daha yaxşı bilir və gənclərimizin dini maarifləndirilmə istiqamətində faydalı olan bu cür tədbirlərə cəlb edilməsi onların gələcək inkişafı üçün əhəmiyyətli olacaq.

Paylaş:

Baxılıb: 726 dəfə