Bakıda Ümumdünya İnsan Hüquqları Bəyannaməsinin qəbul edilməsinin 65-ci ildönümü ilə əlaqədar konfrans keçirilib

Bakı:

17 °C

82 %

3 m/s

AZ RU EN

Ana səhifə / Siyasət / Bakıda Ümumdünya İnsan Hüquqları Bəyannaməsinin qəbul edilməsinin 65-ci ildönümü ilə əlaqədar konfrans keçirilib

Bakıda Ümumdünya İnsan Hüquqları Bəyannaməsinin qəbul edilməsinin 65-ci ildönümü ilə əlaqədar konfrans keçirilib

11.12.2013 [09:29]

Dekabrın 10-da Dini Qurumlarla İş üzrə Dövlət Komitəsinin (DQİDK) təşkilatçılığı ilə BMT Baş Məclisi tərəfindən Ümumdünya İnsan Hüquqları Bəyannaməsinin qəbul edilməsinin 65-ci ildönümü ilə əlaqədar konfrans keçirilib.
AzərTAc xəbər verir ki, “Azərbaycanda dövlət-din münasibətləri və insan hüquqları” mövzusunda keçirilən konfransda ölkəmizdə vicdan azadlığının təmin olunması sahəsində həyata keçirilən tədbirlər və dini icmaların insan hüquqlarının qorunmasında rolu müzakirə edilib.
Tədbirdə Azərbaycandakı bir sıra dini konfessiyaların rəhbərləri, dini icma sədrləri, o cümlədən insan hüquqlarının müdafiəsi sahəsində fəaliyyət göstərən mütəxəssislər iştirak ediblər.
DQİDK-nın sədri Elşad İskəndərov tədbirdə çıxış edərək dekabrın 10-da bütün dünyada olduğu kimi, Azərbaycanda da Beynəlxalq İnsan Hüquqları Gününün geniş şəkildə qeyd edildiyini söyləyib. Komitə sədri bildirib ki, ölkəmizdə insan hüquq və azadlıqlarının qorunması sahəsində mühüm işlər görülüb. O, deyib ki, Ümummilli lider Heydər Əliyevin insan hüquqlarının qorunması ilə bağlı siyasəti bu gün Prezident İlham Əliyev tərəfindən uğurla davam etdirilir.
E.İskəndərov Dini Qurumlarla İş üzrə Dövlət Komitəsinin son bir ildə insan hüquqları ilə bağlı 50-yə yaxın tədbir həyata keçirdiyini bildirib. Komitə sədri əlavə edib ki, əsasən dini icmaların, milli azlıqların, qadınların və uşaqların hüquqlarının qorunması istiqamətində həyata keçirilən tədbirlər bundan sonra da davam etdiriləcək.
Milli Məclisin insan hüquqları komitəsinin sədri Rəbiyyət Aslanova çıxışında deyib ki, Azərbaycanda insan hüquq və azadlıqlarının qorunması istiqamətində çox mühüm addımlar atılıb, bu sahədə mükəmməl qanunvericilik bazası yaradılıb. Ümumiyyətlə, insan hüquqlarının müdafiəsi ilə bağlı həm nəzəri, həm də əməli inkişaf hiss olunur. Prezident İlham Əliyev tərəfindən təsdiq edilmiş Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı buna bariz nümunədir. Beynəlxalq qurumlar da Azərbaycanda insan hüquqları sahəsində böyük uğurların qazanıldığını etiraf edirlər.
Diqqətə çatdırılıb ki, 1995-ci ildə Ümummilli lider Heydər Əliyevin bilavasitə rəhbərliyi ilə hazırlanıb qəbul edilən Azərbaycan Respublikasının Konstitusiyasında demokratik, hüquqi dövlət quruculuğu və insan haqlarının qorunması dövlətimizin ali, strateji məqsədi kimi önə çəkilib.
Konfransda, həmçinin BMT-nin Azərbaycan nümayəndəliyi və İSESCO tərəfindən təsis olunmuş Milli Tolerantlıq Mərkəzi tərəfindən həyata keçiriləcək dini icmalar üçün “Hörmət naminə birləş” layihə müsabiqəsi elan edilib. Müsabiqəyə əsasən Ümumdünya İnsan Hüquqları Bəyannaməsinin 18-ci maddəsində nəzərdə tutulmuş fundamental azadlıqlardan hesab edilən vicdan azadlığının ölkəmizdə təsbitinin təzahürü olaraq qeydiyyatdan keçmiş dini icmalar tərəfindən layihələr reallaşdırılacaq. Bu layihələr sağlamlığı məhdud yeniyetmələrin təhsil ehtiyaclarının qarşılanmasına, məhbusların cəmiyyətə inteqrasiyasına və ailə dəyərlərinin qorunmasına hədəflənib. Layihənin əsas prinsipi cəmiyyət üçün faydalı fəaliyyətin həyata keçirilməsi, o cümlədən dini icmaların cəmiyyətə inteqrasiyasının daha da gücləndirilməsidir. Layihədə iştirak etmək üçün müxtəlif konfessiyalara mənsub olan ən azı üç dini icma birlikdə sosial layihə təklif etməlidir. Hər layihə üçün beş min manatadək maliyyə vəsaiti ayrılması nəzərdə tutulub.

Paylaş:

Baxılıb: 1114 dəfə