Nüfuzlu “ər-Riyad” qəzeti Səudiyyə Ərəbistanı – Azərbaycan münasibətləri barədə yazıb

Bakı:

18 °C

100 %

2 m/s

Əlaqə

AZ RU EN

Ana səhifə / Siyasət / Nüfuzlu “ər-Riyad” qəzeti Səudiyyə Ərəbistanı – Azərbaycan münasibətləri barədə yazıb

Nüfuzlu “ər-Riyad” qəzeti Səudiyyə Ərəbistanı – Azərbaycan münasibətləri barədə yazıb

24.12.2025 [21:53]

Səudiyyə Ərəbistanı Krallığında nəşr olunan nüfuzlu “ər-Riyad” qəzetinin bugünkü nömrəsində “Səudiyyə Ərəbistanı–Azərbaycan münasibətləri: möhkəm tərəfdaşlıq və suverenliyə ardıcıl dəstək” sərlövhəli məqalə dərc edilib.

AZƏRTAC xəbər verir ki, məqalədə ölkəmizlə Səudiyyə Ərəbistanı arasında formalaşmış əməkdaşlıq əlaqələrinin, diplomatik münasibətlərin tarixinə toxunulur. Qeyd olunur ki, Azərbaycan Respublikası ilə Səudiyyə Ərəbistanı Krallığı arasında münasibətlər qarşılıqlı hörmət, islam həmrəyliyi və beynəlxalq hüququn prinsiplərinə sadiqlik əsasında formalaşmış əməkdaşlıq modelini təcəssüm etdirir. Bildirilir ki, Krallıq bütün dövrlərdə Azərbaycanın suverenliyini və ərazi bütövlüyünü ardıcıl və prinsipial şəkildə dəstəkləyib, regional sülhün və sabitliyin möhkəmləndirilməsinə yönəlmiş məsuliyyətli xarici siyasət xəttinə sadiq qalıb.

Yazıda vurğulanır ki, bu mövqe iki ölkə arasında mövcud olan qardaşlıq münasibətlərinin dərinliyini əks etdirir. Eyni zamanda, ikitərəfli əlaqələrin son illərdə siyasi və iqtisadi sahələrdə, xüsusilə investisiya, ticarət və enerji istiqamətlərində, eləcə də qarşılıqlı maraq doğuran regional və beynəlxalq məsələlər üzrə nəzərəçarpacaq dərəcədə inkişaf etməsi məqalədə öz əksini tapıb.

Yazıda, həmçinin Azərbaycanın son illər ərzində əldə etdiyi nailiyyətlərə də qısaca toxunulur. Qeyd olunur ki, müasir Azərbaycan dövlətinin formalaşması prosesində siyasi rəhbərliyin milli suverenliyin möhkəmləndirilməsi və dövlət institutlarının qurulmasında rolu xüsusi əhəmiyyət daşıyıb. Son illər ərzində Azərbaycan siyasi və sosial-iqtisadi inkişaf sahəsində mühüm nailiyyətlər əldə edərək regional və beynəlxalq müstəvidə etibarlı tərəfdaş kimi mövqeyini gücləndirib. Uzun illər davam edən işğaldan sonra ölkənin ərazi bütövlüyünün tam bərpası Azərbaycanın tarixində həlledici mərhələ kimi dəyərləndirilir.

Yazıda 2025-ci ilin avqustunda Vaşinqtonda keçirilmiş yüksək səviyyəli görüşə də toxunulur. Bildirilir ki, həmin görüş çərçivəsində Azərbaycan və Ermənistan arasında sülh sazişi paraflanıb, tərəflər qarşılıqlı şəkildə bir-birinin suverenliyini və ərazi bütövlüyünü tanıyıblar. Bu razılaşma Cənubi Qafqaz regionunda sabitliyin, inkişafın və əməkdaşlığın genişlənməsi üçün yeni imkanlar açır.

Yazıda Azərbaycanın əldə etdiyi nailiyyətlərdə ölkə rəhbərinin danılmaz rolu bir daha vurğulanır. “Bu gün doğum gününü qeyd edən Prezident İlham Əliyevi Azərbaycan xalqı müasir Azərbaycan dövlətinin qurulmasında, suverenliyinin möhkəmləndirilməsində və Cənubi Qafqaz regionunda mövqeyinin möhkəmləndirilməsində mühüm rol oynamış siyasi lider, sülhün memarı və tam suverenlik mərhələsinin lideri kimi görür”, - deyə məqalənin sonunda bildirilir.

Paylaş:

Baxılıb: 848 dəfə