Azərbaycan dilinin müasir texnologiyalara inteqrasiyası dövlət siyasətinin prioritet istiqamətlərindəndir

Bakı:

16 °C

77 %

11 m/s

AZ RU EN

Ana səhifə / Siyasət / Azərbaycan dilinin müasir texnologiyalara inteqrasiyası dövlət siyasətinin prioritet istiqamətlərindəndir

Azərbaycan dilinin müasir texnologiyalara inteqrasiyası dövlət siyasətinin prioritet istiqamətlərindəndir

08.12.2025 [12:54]

Azərbaycan dilinin qorunması, ədəbi dil normalarının inkişafı və onun müasir texnologiyalara inteqrasiyası dövlət siyasətinin əsas prioritet istiqamətlərindəndir.

AZƏRTAC xəbər verir ki, bunu Milli Məclisin sədri Sahibə Qafarova dekabrın 8-də parlamentdə keçirilən “Azərbaycan dilinin dövlət dili kimi inkişaf strategiyası: Mövcud vəziyyət və perspektivlər” mövzusuna həsr edilən konfransda çıxışı zamanı deyib.

Parlamentin sədri qeyd edib ki, Azərbaycan dili bu gün inkişaf edir, lakin qlobal proseslər qarşıya yeni tələblər qoyur. Dünya dəyişir, yeni texnologiyalar icad olunur və dilimizin həm qorunması, həm də modernləşdirilməsi üçün sistemli yanaşmaya ehtiyac yaranır. Parlamentin fəal iştirakı və qanunvericilik təşəbbüslərinin dəstəklənməsi bu hədəflərə çatmağı mümkün edir. Azərbaycan dilinin qarşısında müasir dünyanın dinamikasından irəli gələn yeni vəzifələr dayanır.

Sahibə Qafarovanın sözlərinə görə, bu vəzifələri şərti olaraq bir neçə əsas çağırış kimi qruplaşdırmaq olar. Bunlara dilin saflığının qorunması, rəqəmsallaşma və yeni texnologiyalara inteqrasiya, terminologiyanın elmi əsaslarla yenilənməsi və digər mühüm istiqamətlər daxildir. Bu çağırışların təhlili göstərir ki, Azərbaycan dilinin yeni inkişaf mərhələsinə qədəm qoyması sistemli, uzunmüddətli və elmi baxımdan əsaslandırılmış yanaşma tələb edir. Buna görə də gələcək dil siyasətinin strateji istiqamətlərinin müəyyənləşdirilməsi qarşıda duran ən mühüm vəzifələrdən biridir.

“Dil siyasətinin yeni mərhələsindən danışarkən, əsas prioritetlər kimi xüsusilə aşağıdakı hədəfləri qeyd etmək olar: Təhsildə müasir metod və texnologiyalar əsasında dil tədrisinin təkmilləşdirilməsi, mediada və ictimai məkanda ədəbi dil normalarına əməl olunmasının gücləndirilməsi, terminologiyanın geniş elmi baza üzərində eyniləşdirilməsi və yenilənməsi, Azərbaycan dilinin dünya elmi və mədəni mühitində nüfuzunun artırılması, dilimizin rəqəmsal və texnoloji platformalarda tam funksional tətbiqi, süni intellekt sistemlərinə inteqrasiya səviyyəsinin yüksəldilməsi və digər mühüm istiqamətlər.

Əminliklə demək olar ki, bu məqsədlərin hər birinin reallaşması təkcə dilimizin inkişafı baxımından deyil, bütövlükdə dövlətçiliyimizin möhkəmlənməsi üçün strateji əhəmiyyət daşıyır”, - deyə Milli Məclisin sədri əlavə edib.

Paylaş:

Baxılıb: 442 dəfə