Mərkəzi Seçki Komissiyasının sədri Məzahir Pənahov prezident seçkilərinə hazırlıqla bağlı sonuncu mətbuat konfransını keçirib

Bakı:

20 °C

53 %

5 m/s

AZ RU EN

Ana səhifə / Siyasət / Mərkəzi Seçki Komissiyasının sədri Məzahir Pənahov prezident seçkilərinə hazırlıqla bağlı sonuncu mətbuat konfransını keçirib

Mərkəzi Seçki Komissiyasının sədri Məzahir Pənahov prezident seçkilərinə hazırlıqla bağlı sonuncu mətbuat konfransını keçirib

09.10.2013 [14:36]

Mərkəzi Seçki Komissiyasının sədri Məzahir Pənahov oktyabrın 8-də Müstəqil Mətbuat Mərkəzində prezident seçkilərinə hazırlıqla bağlı sonuncu mətbuat konfransını keçirib.
AzərTAc xəbər verir ki, Məzahir Pənahov budəfəki seçkilərdə 10 namizədin mübarizə aparacağını bildirib. O deyib ki, Seçki Məcəlləsində nəzərdə tutulduğu kimi, prezidentliyə namizədlərə təbliğat-təşviqat kampaniyası üçün bütün lazımi şərait yaradılıb, kampaniya tam demokratik və qanunauyğun keçib.
Seçkilərdə 5 milyon 145 minə yaxın seçici 5 min 492 məntəqədə səs verəcək. Onlardan 5 min 273-ü daimi, qalan 219-u isə səsverməyə 5 gün qalmış yaradılmış müvəqqəti məntəqələrdir. Müvəqqəti məntəqələr Azərbaycanın xarici dövlətlərdəki diplomatik nümayəndəliklərində, neft platformalarında, sanatoriyalarda, hərbi hissələrdə, islah əmək müəssisələrində, eləcə də Azərbaycan bayrağı altında üzən gəmilərdə yaradılıb.
M.Pənahov qeyd edib ki, seçicilərin hüquqları pozulmazdır və adlarını seçici siyahısında tapmayan şəxslərin yaşadıqları ərazidəki məntəqəyə daxil olarkən şəxsiyyət vəsiqəsini təqdim etmələri kifayətdir. Onların adları əlavə seçici siyahısına daxil ediləcək və səsvermə hüququndan istifadə edə biləcəklər.
MSK sədrinin sözlərinə görə, seçkiləri 1400-ə yaxın beynəlxalq müşahidəçi izləyəcək. Onların 100-ə qədəri xarici ölkələrin KİV nümayəndələridir. Eyni zamanda, seçki prosesini 52 minə yaxın yerli müşahidəçi izləyəcək ki, onların da 6 mindən çoxu MSK-da, qalan 42 mini dairə seçki komissiyalarında akkreditasiyadan keçib.
Mətbuat konfransında vurğulanıb ki, seçkilərlə əlaqədar 125 dairədə 5492 məntəqə yaradılıb. Bu məntəqələrin minində veb-kameralar quraşdırılıb ki, bu da ümumi sayın 20 faizini təşkil edir.
Seçki subyektlərinin maarifləndirilməsi məsələsinə toxunan MSK sədri bildirib ki, bu istiqamətdə də mühüm işlər görülüb. Belə ki, MSK bütün seçki subyektləri üçün müxtəlif formalı maarifləndirmə tədbirləri həyata keçirib. Polislər, müşahidəçilər üçün yaddaş kitabçaları paylanıb.
Eyni zamanda, görmə qabiliyyəti zəif olan seçicilər üçün məntəqələrdə rahat şərait yaradılıb. Həmçinin hərəkət imkanları məhdud seçicilər üçün məntəqələrdə ilk dəfə panduslar qurulub. Bu qrupa aid olan insanlar təxminən 1200-ə yaxın məntəqəni əhatə edir.
Hazırda Həcc ziyarətində olan zəvvarlar üçün də məntəqə yaradılıb. Həcc ziyarətində, xidməti ezamiyyətdə və digər səbəblərdən Məkkədə olan 3700-ə qədər azərbaycanlı öz seçki hüququndan istifadə edə biləcək.
MSK sədri bildirib ki, səsvermə oktyabrın 9-da saat 8.00-da başlayacaq, 19.00-da başa çatacaq. Səsvermənin gedişi ilə bağlı gün ərzində 5 dəfə ictimaiyyətə məlumat veriləcək, səsvermənin ilkin nəticələri isə elə həmin gün axşam saatlarında açıqlanacaq.

Paylaş:

Baxılıb: 1171 dəfə