Tarixi Zəfərdən yeni inşa mərhələsinə

Bakı:

28 °C

47 %

13 m/s

Əlaqə

AZ RU EN

Ana səhifə / Siyasət / Tarixi Zəfərdən yeni inşa mərhələsinə

Tarixi Zəfərdən yeni inşa mərhələsinə

04.11.2025 [10:41]

Dilarə Cəbrayılova,

295 saylı orta məktəbin direktoru, V çağırış Milli Məclisin deputatı

Azərbaycan xalqı 2020-ci ilin payızında tarixinin ən şanlı səhifəsini yazdı. Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 gün ərzində işğal altındakı torpaqları azad etdi. Qarabağda və Şərqi Zəngəzurda qazanılan bu Qələbə xalqımızın birliyi, dövlətin gücü və Prezidentin müdrik rəhbərliyinin nəticəsi idi.

Lakin Zəfər yalnız müharibə meydanında qazanılmadı. Əsl qələbə o zaman başlayır ki, torpaqlarda həyat yenidən canlanır, dağıdılmış şəhərlər və kəndlər bərpa olunur, xalq doğma yurduna qayıdır.

Cənab Prezident İlham Əliyev bu istiqamətdə tarixi bir missiyanı həyata keçirir: Qarabağı və Şərqi Zəngəzuru yenidən dirçəltmək, orada müasir və dayanıqlı həyat qurmaq.

Prezident İlham Əliyev illər boyu güclü dövlət və qüdrətli ordu quruculuğunu ölkənin əsas prioriteti kimi müəyyənləşdirmişdi. Onun uzaqgörən siyasəti nəticəsində Azərbaycan Ordusu XXI əsrin müasir tələblərinə cavab verən güclü hərbi qüvvəyə çevrildi.

Diplomatik arenada, beynəlxalq təşkilatlarda Prezidentin prinsipial mövqeyi Azərbaycanın haqlı səsini dünyaya çatdırdı.

44 günlük Vətən müharibəsi zamanı İlham Əliyevin hər çıxışı, hər addımı xalqda böyük ruh yüksəkliyi yaratdı. O, həm döyüş meydanında qələbə qazanan sərkərdə, həm də dünyaya ədaləti bəyan edən lider kimi tarixə düşdü.

Zəfərdən dərhal sonra Prezident İlham Əliyevin göstərişi ilə azad olunmuş torpaqlarda genişmiqyaslı bərpa və yenidənqurma işlərinə start verildi.

Bu gün Qarabağ və Şərqi Zəngəzur bölgələrində həyat sürətlə bərpa olunur. Dağıdılmış şəhərlər yenidən qurulur, infrastruktur tamamilə yenilənir, yollar, körpülər, tunellər, enerji xətləri çəkilir.

Füzuli, Zəngilan və Laçın beynəlxalq hava limanlarının rekord müddətdə istifadəyə verilməsi bu torpaqlarda görülən işlərin miqyasını aydın göstərir. Bu hava limanları Qarabağın dünyaya açılan qapısı, Azərbaycanın gələcək turizm və iqtisadi mərkəzlərinin dayağıdır.

Prezident İlham Əliyevin rəhbərliyi ilə həyata keçirilən “Böyük Qayıdış” proqramı azad edilmiş torpaqlarda həyatın tam bərpasına yönəlib. Bu proqram çərçivəsində yeni yaşayış massivləri, məktəblər, tibb ocaqları, sosial və iqtisadi obyektlər tikilir.

Zəngilanın Ağalı kəndində yaradılan “ağıllı kənd” layihəsi bu işlərin bariz nümunəsidir. Burada alternativ enerji mənbələri ilə təmin olunan evlər, müasir məktəblər və ekoloji təmiz təsərrüfat sahələri fəaliyyət göstərir. Artıq ilk ailələr doğma torpaqlarına qayıdıb. Bu, həm texnoloji, həm də mənəvi baxımdan əlamətdar hadisədir — çünki hər bir qayıdış bir həyatın yenidən doğulması deməkdir.

Prezident İlham Əliyevin xüsusi diqqəti ilə Şuşa şəhəri – Azərbaycanın mədəniyyət paytaxtı – bu gün tamamilə yenidən qurulur.

İşğal dövründə dağıdılmış tarixi abidələr, məscidlər, məbədlər, muzeylər və mədəniyyət ocaqları bərpa olunur.

Bu gün Şuşa təkcə Azərbaycanın deyil, bütün Türk dünyasının mədəniyyət paytaxtı kimi tanınır. O, həm tariximizin, həm qürurumuzun, həm də milli birliyimizin simvoluna çevrilib.

Cənab Prezident İlham Əliyevin uzaqgörən siyasəti nəticəsində Qarabağ və Şərqi Zəngəzur “yaşıl enerji zonası” elan edilib.

Bu ərazilərdə günəş və külək enerjisi stansiyaları qurulur, alternativ enerji layihələri reallaşdırılır. Məqsəd yalnız iqtisadi inkişaf deyil, həm də ekoloji tarazlığın bərpasıdır.

Zəngilan, Cəbrayıl, Kəlbəcər və Laçın rayonlarında bu istiqamətdə beynəlxalq tərəfdaşlarla böyük layihələr həyata keçirilir.

Cənab Prezident hər dəfə azad edilmiş torpaqlara səfər edir, görülən işləri şəxsən yerində izləyir, yeni layihələrin təməlqoyma mərasimlərində iştirak edir.

İşğaldan azad olunmuş ərazilərdə görülən işlər təkcə iqtisadi və texnoloji baxımdan deyil, həm də mənəvi baxımdan mühüm əhəmiyyət daşıyır.

Bu, dağıntılardan doğulan bir yenidənqurma, viran qalmış şəhərlərin həyatla dolması, torpağa, insana və gələcəyə inamın bərpasıdır.

Qarabağda və Şərqi Zəngəzurda bu gün baş verən hər bir dəyişiklik – ucalan məktəb binası, bərpa olunan abidə, çəkilən yol – Azərbaycanın gələcək nəsillərinə yönəlmiş bir mesajdır:

“Bu torpaqlar əbədi bizimdir və burada həyat əbədi olacaq.”

Prezident İlham Əliyevin rəhbərliyi ilə Qarabağ dirçəlir, Qarabağ yaşayır, Qarabağ əbədi Azərbaycanındır!

Paylaş:

Baxılıb: 1070 dəfə