Xəzər rayonunun ən iri səhiyyə ocağı əsaslı təmir və yenidənqurmadan sonra istifadəyə verilib

Bakı:

17 °C

53 %

2 m/s

Əlaqə

AZ RU EN

Ana səhifə / Siyasət / Xəzər rayonunun ən iri səhiyyə ocağı əsaslı təmir və yenidənqurmadan sonra istifadəyə verilib

Xəzər rayonunun ən iri səhiyyə ocağı əsaslı təmir və yenidənqurmadan sonra istifadəyə verilib

11.04.2013 [17:16]

Azərbaycanın birinci xanımı Mehriban Əliyeva 26 nömrəli Birləşmiş Şəhər Xəstəxanası ilə tanış olub
Azərbaycanın birinci xanımı, Heydər Əliyev Fondunun prezidenti, Milli Məclisin Xəzər rayonundan seçilmiş deputatı Mehriban Əliyeva aprelin 10-da Mərdəkan qəsəbəsində əsaslı təmir və yenidənqurmadan sonra istifadəyə verilmiş 26 nömrəli Birləşmiş Şəhər Xəstəxanası ilə tanış olub.
Mehriban xanım Əliyevaya məlumat verilib ki, xəstəxana 1983-cü ildə Ulu öndər Heydər Əliyevin iştirakı ilə istifadəyə verilib. Həmin gündən ötən dövr ərzində xəstəxana və onun nəzdindəki uşaqlar və böyüklər üçün poliklinikaların əsaslı təmirə ehtiyacı yaranıb. Prezident İlham Əliyevin Sərəncamı ilə təsdiq olunmuş Bakı və şəhərətrafı qəsəbələrin sosial-iqtisadi inkişafı Proqramı çərçivəsində bu səhiyyə ocağında da 2011-ci ilin iyul ayından əsaslı təmir işlərinə başlanılıb.
Qeyd olunub ki, xəstəxana Xəzər rayonu ərazisindəki ən iri səhiyyə ocağıdır və ümumi ərazisi 4 hektardır. Beşmərtəbəli bina 140 çarpayılıqdır və burada əhaliyə 614 nəfərlik tibbi heyət xidmət göstərəcək.
Xəstəxanada uşaq, cərrahiyyə, anesteziologiya, reanimasiya, ginekologiya, doğuş, sinir və daxili xəstəliklər, təcili yardım şöbələri, qadın məsləhətxanası fəaliyyət göstərəcək. Tibb müəssisəsi Almaniya istehsalı olan ən keyfiyyətli avadanlıq ilə təchiz olunub.
Əsaslı təmirdən sonra yüksək səviyyədə qurulan poliklinikalarda 27 min uşağa və 45 min böyüyə keyfiyyətli tibbi xidmət göstəriləcək. Bu poliklinikaların xidmətindən Mərdəkan ilə yanaşı, Şüvəlan, Şağan və Qala qəsəbələrinin əhalisi də istifadə edəcək. Həmçinin diqqətə çatdırılıb ki, məhz bu xəstəxana Xəzər rayonunda fəaliyyət göstərən tibb müəssisələrini yemək və dərman preparatları ilə təmin edir.
Azərbaycanın birinci xanımı xəstəxananın kollektivi ilə görüşüb, səhiyyə ocağının istifadəyə verilməsi münasibətilə onları təbrik edib. Heydər Əliyev Fondunun prezidenti Mehriban xanım Əliyeva Prezident İlham Əliyevin də təbriklərini onlara çatdırıb. Əsaslı təmirdən sonra xəstəxanada həm əhaliyə yüksək səviyyədə tibbi xidmətin göstərilməsi, həm də həkimlərin fəaliyyəti üçün gözəl şərait yaradıldığını qeyd edən Mehriban xanım Əliyeva Bakıətrafı qəsəbələrdə geniş abadlıq-quruculuq işlərinin məmnunluq doğurduğunu deyib.
Sonda xatirə şəkli çəkdirilib.

Paylaş:

Baxılıb: 1190 dəfə