Xalqımız Heydər Əliyev siyasətinə alternativ görmür

Bakı:

19 °C

54 %

3 m/s

Əlaqə

AZ RU EN

Ana səhifə / Siyasət / Xalqımız Heydər Əliyev siyasətinə alternativ görmür

Xalqımız Heydər Əliyev siyasətinə alternativ görmür

20.02.2013 [01:43]

YAP Sədrinin müavini Əli Əhmədov partiyanın Yardımlı rayon təşkilatının fəalları və gəncləri ilə görüşüb
Dünən Yeni Azərbaycan Partiyasının (YAP) Sədr müavini-İcra katibi, millət vəkili Əli Əhmədov Yardımlıda partiyanın Yardımlı rayon təşkilatının fəalları ilə görüş keçirib. SİA-nın bölgə müxbirinin verdiyi məlumata görə, görüşdə YAP İcra katibinin müavini, millət vəkili Mübariz Qurbanlı, millət vəkilləri Hadi Rəcəbli, Cavanşir Paşazadə, Nəriman Əliyev və YAP-ın məsul işçisi Mirkamal Seyidov iştirak ediblər.
Tədbirdə ilk olaraq çıxış edən YAP Yardımlı rayon təşkilatının sədri Mahir Mirzəyev təşkilatın fəaliyyəti haqqında geniş məlumat verib. Onun sözlərinə görə, son illər partiyanın sıraları xeyli genişlənib: “Hazırda rayonda YAP-ın 3000 nəfərə yaxın üzvü var”.
M.Mirzəyev, həmçinin, rayonda gedən quruculuq işlərinə toxunub. O, bu işlərdə YAP üzvlərinin fəallıq göstərdiyini də qeyd edib. Qarşıdan gələn prezident seçkilərinə toxunan təşkilat sədri bu kampaniyada partiya üzvlərinin fəal iştirak edəcəyini bildirib.
Görüşdə çıxış edən YAP-ın Sədr müavini-İcra katibi Əli Əhmədov ölkəmizdə həyata keçirilən geniş abadlıq və quruculuq işləri haqqında fikirlərini bildirib. Əli Əhmədov Prezident İlham Əliyevin rəhbərliyi ilə Azərbaycanın dünyada nüfuzunun artdığını, qüdrətli dövlətə çevrildiyini, eləcə də, ölkə əhalisinin rifah halının gündən-günə yaxşılaşdığını diqqətə çatdırıb. Onun sözlərinə görə, Azərbaycanda Ulu öndər Heydər Əliyev tərəfindən əsası qoyulan siyasət bu gün Prezident İlham Əliyev tərəfindən uğurla davam etdirilir. Xalqın bu siyasətin davamlı olmasını arzu etdiyini deyən Əli Əhmədov qeyd edib ki, oktyabrda keçiriləcək prezident seçkilərində ölkə vətəndaşları yenidən cənab İlham Əliyevə etimad göstərməklə öz mövqeyini ifadə edəcəklər.
Tədbirdə Yardımlı rayon İcra Hakimiyyətinin başçısı Sevindik Hətəmov çıxış edərək son illərdə rayonda həyata keçirilən quruculuq işləri barədə məlumat verib. Onun sözlərinə görə, hökumət bu rayonun sosial-iqtisadi inkişafı üçün lazımi addımlar atır. S.Hətəmov hazırda Yardımlı rayonunda içməli su xətlərinin çəkildiyini, yolların əsaslı təmir olunduğunu, kəndlərdə qaz xətlərinin çəkilişinə başladıqlarını diqqətə çatdırıb. İcra Hakimiyyətinin başçısı həmçinin, qeyd edib ki, Yardımlıda Heydər Əliyev Mərkəzinin, YAP rayon təşkilatının inzibati binasının, eləcə də, Gənclər Mərkəzinin yeni binasının son tamamlanma işləri gedir.
Yardımlıya səfər çərçivəsində YAP-ın Sədr müavini Əli Əhmədov partiyanın rayon təşkilatının Gənclər Birliyinin fəalları ilə də görüşüb. Görüşdə rayonun Gənclər və İdman idarəsinin rəisi Anar Alışov çıxış edərək gənclərin rayonun ictimai-siyasi həyatındakı rolundan danışıb, ictimai fəaliyyətləri haqda məlumat verib. Gənclərin bütün seçkilərdə fəal iştirak etdiklərini deyən A.Alışov qeyd edib ki, qarşıdan gələn prezident seçkilərində rayon gəncləri YAP-ın Sədri, cənab İlham Əliyevin namizədliyini dəstəkləyəcəklər.
Tədbirdə çıxış edən YAP Sədrinin müavini Əli Əhmədov gənclərin ölkəmizin ictimai-siyasi həyatındakı fəal rolundan, Azərbaycanda uğurlu gənclər siyasətinin həyata keçirilməsindən ətraflı bəhs edib. Azərbaycan hökumətinin fəaliyyətində gənclərlə bağlı siyasətin əsas yerlərdən birini tutduğunu bildirən Əli Əhmədov gənclərin yaxşı təhsil alması, müasir dünyagörüşünə yiyələnməsi, malik olduğu potensialı ifadə etməsi və bu potensialı Azərbaycanın inkişafı istiqamətinə yönəltməsi üçün hər cür şəraitin yaradıldığını diqqətə çatdırıb.
YAP Sədrinin müavini, eyni zamanda, bəzi dairələrin ölkəmizin imicinə zərər vurmağa çalışdığını deyərək gəncləri ayıq-sayıq olmağa çağırıb. O, gəncləri sosial şəbəkələrdə fəal olmağa və Azərbaycanın uğurlarına kölgə salmaq istəyənlərə qarşı mübarizə aparmağa çağırıb.
Görüşün sonunda YAP-ın Sədr müavini Əli Əhmədov gəncləri maraqlandıran sualları cavablandırıb.

Paylaş:

Baxılıb: 1106 dəfə