YAP öz fəaliyyətində Azərbaycan xalqının dəstəyinə arxalanır

Bakı:

18 °C

52 %

1 m/s

Əlaqə

AZ RU EN

Ana səhifə / Siyasət / YAP öz fəaliyyətində Azərbaycan xalqının dəstəyinə arxalanır

YAP öz fəaliyyətində Azərbaycan xalqının dəstəyinə arxalanır

14.11.2012 [01:45]

Siyavuş Novruzov: İqtisadi siyasətimizin uğurları dövlət büdcəsində özünü bariz şəkildə göstərir
“Azərbaycanın iqtisadi nailiyyətləri daim artır. Prezident İlham Əliyevin həyata keçirdiyi iqtisadi siyasətin uğurları dövlət büdcəsində özünü bariz şəkildə göstərir”. Bu fikirləri YAP İcra katibinin müavini, millət vəkili Siyavuş Novruzov Milli Məclisin dünən keçirilən iclasında çıxışı zamanı deyib. S.Novuzovun fikrincə, büdcə vəsaitlərinin böyük hissəsi nəticəsi olan sahələrə sərf olunmalıdır. O qeyd edib ki, həm elm, həm təhsil, həm də digər sahələrə ayrılan vəsaitlər ciddi nəticələr verməlidir.
“Mən də o fikirlə razıyam ki, elmə böyük diqqət göstərmək lazımdır. Amma elmin tətbiqi olmalıdır. Məsələn, kimsə, Füzulinin bir qəzəli əsasında elmi iş müdafiə edib, elmlər namizədi olursa, amma onun müdafiə etdiyi elmi işin tətbiqi yoxdursa, cəmiyyətə xeyir vermirsə, belə məsələlərə böyük vəsait ayırmaq lazım deyil. Hesab edirəm ki, bu məsələlər dəqiqləşdirilməlidir. Fikrimcə, elmi institutlarla aparıcı universitetlər birləşməlidir. Bunun nəticəsində həm elmi işlə məşğul olmaq olar, həm də tədris prosesində iştirak etmək mümkündür” - deyə, millət vəkili vurğulayıb. S.Novruzov deyib ki, cəmiyyətə xeyir verməyən sahələrə büdcədən vəsaitin artırılmasına ehtiyac yoxdur. Onun fikrincə, ilk növbədə bu sahələrdə struktur islahatları aparılmalıdır. Millət vəkili bildirib ki, bəzi dövlət strukturlarında da islahatlara ehtiyac var: “Paralel şöbələr, paralel komitələr və s. Bu da ona gətirib çıxarır ki, bəzən biri-birilərinin səlahiyyətlərinə müdaxilə edirlər. Ona görə də, bu məsələlər tənzimlənməlidir”.
Çıxışında müdafiə xərclərinə kifayət qədər vəsaitin artırıldığını deyən S.Novruzov hərbçilərin sosial müdafiəsinin gücləndirilməsinə, onların mənzil şəraitinin daha da yaxşılaşdırılmasına diqqətin artırılmasını vacib hesab edib. Millət vəkili həmçinin, kənd təsərrüfatının inkişafı üçün də vəsaitin artırılmasını təklif edib. Onun sözlərinə görə, bu ərzaq təhlükəsizliyinin təmin olunmasına əhəmiyyətli təsir göstərəcək. Millət vəkili uşaq baxçalarına da maliyyənin kifayət qədər artırılmasını təklif edib: “Bu uşaqlar Azərbaycanın gələcəyidir və onları təhlükəsiz, keyfiyyətli qida ilə təmin etməliyik”.
Siyasi partiyaların maliyyələşməsinə gəlincə, YAP İcra katibinin müavini bu məqsədlə ayrılan vəsaitin iki dəfə artırılmasının mümkünlüyünü deyib: “Hakimiyyətin mənbəyi xalqdır və YAP öz fəaliyyətində Azərbaycan xalqının dəstəyinə arxalanır. Xalq həmişə partiyamıza dəstək verib və bundan sonra da dəstəyini əsirgəməyəcək. Partiyaların dövlət büdcəsindən maliyyələşməsi siyasi sistemin təkmilləşməsinə və onların şəffaf fəaliyyət göstərməsinə xidmət edəcək”.

Paylaş:

Baxılıb: 1997 dəfə