Roza Otunbayeva: Diplomatik Akademiya Azərbaycanın beynəlxalq aləmdə mövqeyinin möhkəmləndirilməsi istiqamətində xüsusi rol oynayan mərkəzlərdən biri olacaq

Bakı:

17 °C

67 %

2 m/s

AZ RU EN

Ana səhifə / Siyasət / Roza Otunbayeva: Diplomatik Akademiya Azərbaycanın beynəlxalq aləmdə mövqeyinin möhkəmləndirilməsi istiqamətində xüsusi rol oynayan mərkəzlərdən biri olacaq

Roza Otunbayeva: Diplomatik Akademiya Azərbaycanın beynəlxalq aləmdə mövqeyinin möhkəmləndirilməsi istiqamətində xüsusi rol oynayan mərkəzlərdən biri olacaq

03.10.2012 [12:13]

Qırğız Respublikasının keçmiş Prezidenti Roza Otunbayeva dünən Azərbaycan Diplomatik Akademiyasında (ADA) olub. ADA-nın rektoru, xarici işlər nazirinin müavini Hafiz Paşayev qonağa Akademiyanın yaranma tarixi, fəaliyyəti, beynəlxalq əlaqələri barədə ətraflı məlumat verib. Bildirilib ki, Prezident İlham Əliyevin 2006-cı il 6 mart tarixli Fərmanı ilə təsis edilən ADA yarandığı gündən öz fəaliyyətində xüsusi ixtisaslı diplomat kadrların hazırlanmasını və beynəlxalq münasibətlər sahəsində elmi tədqiqatların aparılmasını əsas prioritet kimi götürüb. Fəaliyyətə başladığı 2007-ci ildən bəri Akademiyada 400 gənc diplomat hazırlanıb. 2009-cu ildən bu təhsil ocağında tədris proqramının genişləndirilməsinə və “Beynəlxalq əlaqələr və diplomatiya” sahəsində magistratura proqramının reallaşdırılmasına başlanılıb. Ötən ildən isə “Biznesin idarə edilməsi və beynəlxalq münasibətlər” üzrə bakalavr ixtisasları yaradılıb. Bu ixtisaslar üzrə hazırda 250 tələbə təhsil alır. Akademiyanın 19 xarici ölkədən 35 tələbəsi də var.
Prezident İlham Əliyevin Sərəncamı əsasında 2009-cu ildən təhsil ocağının yeni tədris kompleksinin tikintisinə başlanılıb. Yeni tədris kompleksi ABŞ-ın EYP şirkətinin layihəsi əsasında xüsusi dizaynla yüksək standartlar səviyyəsində tikilib. Bu tədris ocağı dünyanın tanınmış universitetlərinin təcrübəsinə əsaslanaraq ən son texnoloji nailiyyətlərlə inşa olunub. Burada dörd ayrı bina - biznes və beynəlxalq münasibətlər institutları, tələbə mərkəzi və kitabxana fəaliyyət göstərir. Azərbaycanda ilk dəfə olaraq bu tədris kompleksinin havalandırma sistemi geotermal enerji ilə həyata keçirilir.
Sonra Roza Otunbayeva Akademiyada yaradılan şəraitlə tanış olub.
Bildirilib ki, Akademiyada tədris ingilis dilində aparıldığından burada xarici ölkələrin tanınmış universitetlərindən 15 professor da daxil olmaqla, 35 pedaqoq çalışır.
Təhsil ocağının dördmərtəbəli kitabxana korpusu ilə tanışlıq zamanı qonağa məlumat verilib ki, Azərbaycanda ən böyük xarici dilli kitabxanaya malik olan Akademiyada ingilis dilində 120 min kitab var.
Akademiya ilə tanışlıqdan zəngin təəssüratla ayrılan Roza Otunbayeva ADA-nın yaradılmasını, buradakı şəraiti yüksək qiymətləndirib. Bildirib ki, xarici siyasət sahəsində uğurların əldə olunmasında, ilk növbədə, diplomatiyanın xüsusi rolu var. İnanırıq ki, bu Akademiya Azərbaycanın beynəlxalq aləmdə mövqeyinin möhkəmləndirilməsi istiqamətində xüsusi rol oynayan mərkəzlərdən biri olacaq.

Paylaş:

Baxılıb: 1259 dəfə