Əli Hüseynli: Türkiyənin münaqişənin həllində beynəlxalq mandat əsasında fəaliyyət göstərməsi ideyası problemin ədalətli həllinə öz töhfəsini verə bilər

Bakı:

28 °C

55 %

9 m/s

AZ RU EN

Ana səhifə / Müsahibə / Əli Hüseynli: Türkiyənin münaqişənin həllində beynəlxalq mandat əsasında fəaliyyət göstərməsi ideyası problemin ədalətli həllinə öz töhfəsini verə bilər

Əli Hüseynli: Türkiyənin münaqişənin həllində beynəlxalq mandat əsasında fəaliyyət göstərməsi ideyası problemin ədalətli həllinə öz töhfəsini verə bilər

07.10.2020 [09:01]

Azərbaycan Respublikası Milli Məclisi Sədrinin birinci müavini Əli Hüseynli AZƏRTAC-a müsahibə verib. Müsahibəni təqdim edirik.
- Əli müəllim, Prezident İlham Əliyevin “TRT Haber” kanalına müsahibəsində ATƏT-in Minsk qrupunun fəaliyyəti və həmsədrlərlə bağlı söylədiyi fikirlərə münasibətinizi bilmək istərdik.
- Möhtərəm Prezident İlham Əliyev dəfələrlə ATƏT-in Minsk qrupunun yarıtmaz fəaliyyəti ilə bağlı fikirlərini söyləyib. Bu dəfə isə cənab Prezident Minsk qrupunun həmsədri kimi Fransanın mandatına uyğun olaraq tərəfsiz deyil, Ermənistanın havadarı kimi çıxış etməsini sərt tənqid etdi. Amma dövlətimizin başçısının budəfəki açıqlamasında əsas diqqət Türkiyənin bu münaqişənin həllində oynadığı və gələcəkdə oynaya biləcəyi rola yönəldildi. Bildirildi ki, müəyyən şərtlər çərçivəsində, o cümlədən erməni silahlı qüvvələrinin torpaqlarımızdan çıxarılması tarixləri verilərsə, o zaman atəşkəs üzərində çalışmaq olar. Bu zaman Minsk qrupunun həmsədrləri və mümkün olan ölkələr buna qoşularsa, döyüşlərə son qoyula bilər. Digər ölkələr dedikdə, cənab Prezident məhz Türkiyəni nəzərdə tutduğunu söylədi ki, bu da çox böyük əhəmiyyət kəsb edir. Türkiyə həm Azərbaycanın, həm də Ermənistanın qonşusudur, Cənubi Qafqazın qonşusudur, güclü bir dövlətdir və böyük potensiala malikdir. Sözsüz ki, Türkiyənin Dağlıq Qarabağ münaqişəsinin həllində beynəlxalq mandat əsasında fəaliyyət göstərməsi ideyası münaqişənin ədalətli həllinə öz töhfəsini verə bilər.
- Eyni zamanda, Rusiyanın da həm ATƏT-in Minsk qrupunun həmsədri kimi, həm də qonşuluqda olan böyük dövlət kimi bu məsələdə mövqeyi tərəflər üçün əhəmiyyət kəsb edir. Rusiyanın mövqeyinə həm də bir sıra hallarda Azərbaycan ictimaiyyəti həssaslıqla yanaşır.
- Cənab Prezident müsahibəsində bu məsələlərə də tam aydınlıq gətirdi. O dedi: “Rusiya bizim qonşumuzdur, Rusiya ilə münasibətlərimiz uğurla inkişaf edir, bu gün bir çox sahələrdə Rusiya ilə Azərbaycan arasındakı münasibətlər çox yüksək səviyyədədir. Hər iki ölkə bu münasibətlərə strateji tərəfdaşlıq münasibətləri kimi yanaşır və bu, birgə imzalanmış müqavilələrdə də öz təsdiqini tapır. Bu məsələ ilə bağlı Rusiya çox məsuliyyətli və böyük ölkə kimi davranır. Rusiyadan müsbət mesajlar gəlir... Onlar Rusiyanı bu münaqişəyə cəlb etmək istəyiblər”. Cənab Prezident ermənilərin buna müvəffəq olmayacaqlarına əminliyini də bildirdi. Bu da təsadüfi deyil, həqiqətən də son illər Azərbaycan və Rusiya arasında hərtərəfli əlaqələr öz müsbət nəticəsini verməkdədir. Baxmayaraq ki, bir sıra mətbuat orqanları erməni lobbisinin dəstəyi ilə təcavüzkar Ermənistana dəstək verir. Amma buna baxmayaraq Yuri Korotçenko, Maksim Şevçenko və digər obyektiv ekspertlər ədalətli mövqedən çıxış edirlər.
- Cənab Prezident öz müsahibəsində həm də Azərbaycanın ordu quruculuğunun nailiyyətlərinə də toxundu. Siz bu sahədə görülən işlərlə bağlı nə deyə bilərsiniz?
- Bəli, bu, çox vacib məsələdir. Bilirsiniz ki, hələ zamanında cənab Prezident Azərbaycan Ordusunun büdcəsinin Ermənistanın bir dövlət kimi büdcəsindən üstün olacağı məqsədini qarşıya qoymuşdur. Milyardlarla vəsaitlər ayrılmış və Azərbaycan Ordusu ən müasir silahlarla təchiz olunmuşdur. Təsadüfi deyil ki, cənab Prezident müsahibəsində açıqladı ki, Azərbaycan dünyanın ən güclü ordularından olan Türk Ordusunun kiçik modelini qurur. Sözsüz ki, bu, bizim uğurlarımızın əsas səbəbidir. Cənab Prezident Azərbaycan-Türkiyə münasibətlərini bir daha yüksək qiymətləndirdi və dedi ki, biz çox xoşbəxt ölkəyik ki, bizim Türkiyə kimi müttəfiqimiz, qardaşımız var.
- Bu gün Milli Məclisdə Madagiz kəndinin Suqovuşan kəndi adlandırılması ilə bağlı qanun qəbul edildi.
- Bəli, erməni işğalçılarının Qarabağda yaşayış məskənlərinin tarixi adlarının dəyişdirilməsi kimi qanunsuz əməllərindən birinə bu gün son qoyuldu. Heç şübhə yoxdur ki, bundan sonra da torpaqlarımız işğaldan azad olunduqca cənab Prezident tərəfindən bu cür qanunlar parlamentə təqdim olunacaq və yekdilliklə qəbul ediləcək.

Paylaş:

Baxılıb: 872 dəfə