Yulia Ferştandt: Azərbaycan mənim vətənimdir...

Bakı:

17°C

72%

5m/s

Əlaqə

AZ RU EN

Ana səhifə / Müsahibə / Yulia Ferştandt: Azərbaycan mənim vətənimdir...

Yulia Ferştandt: Azərbaycan mənim vətənimdir...

19.03.2025 [08:53]

- Yulia xanım, öncə oxucular sizi tanısın...

- Mən Yulia Ferştandt, uzun illərdir Azebaycan Akademik Opera və Balet Teatrında aparıcı solist olaraq çalışıram.

- Balerina olmaq həvəsi haradan yarandı?

- Uşaqlıq illərimdə televizordan “Mavi quş” baletini, eləcə də İqor Moiseyev adına rəqs ansamblının çıxışlarını izləyirdim. İzlədikcə hiss edirdim ki, məndə balet sevgisi yaranır. Bundan əlavə, qonşumuz balerina idi, qızı xoreoqrafiya məktəbində oxuyurdu. Onları balerina geyimində görəndə çox həvəslənirdim.

- Balet sənətinin fiziki tərəfləri məlumdur, bəs psixoloji çətinlikləri hansılardır?

- Təbii ki, psixoloji çətinlikləri də var, bu hisslər idmançının yarışdan əvvəl yaşadığı hisslərə bənzəyir. Həyəcan və narahatlığın sizə maneə olmasına imkan verməməlisiniz. Düzdür, bəzən bu, çox çətin olur, lakin çoxlu məşq edərək bunu bacarmalısan.

- Nə vaxtdan Opera və Balet teatrında çalışırsınız?

- Rəsmi olaraq 2002-ci ildən teatrda çalışıram, amma ondan bir il əvvəldən fəaliyyətə başladım. İştirak etdiyim ilk tamaşa müəllimim, Azərbaycanın Xalq Artisti Tamila Şirəliyevanın quruluşunda bəstəkar Tofiq Bakıxanovun “Xəzər balladası” oldu.

- Hansı obrazlar və ya tamaşalar sizin yaddaşınızda iz qoyub?

- Təbii ki, bütün rollarım mənə əzizdir: A.Adəmin eyniadlı baletindəki Jizel mənim üçün inanılmaz dərəcədə maraqlı, dərin və yaxın obraz oldu. F.Əmirovun “1001 gecə” baletindəki parlaq, müdrik və rəngarəng Şəhrizad obrazın oynamaq da maraqlı idi. Bundan əlavə “Məhəbbət əfsənəsi” baletinin Şirin, “Şelkunçik” baletindən Maşa obrazları da sevdiklərimdəndir.

- Rusiyada balet artistləri balerina Anastasiya Voloçkovanın çəkisi çox olduğu üçün qaldırmağa gücləri çatmadığını deyirlər. Azərbaycan səhnəsində də elə problemlər olurmu?

- Xeyr, bütün balerinalarımız özlərini əla formada saxlayırlar. Bizim partnyorlarımız güclü və hazırlıqlıdır, ona görə də bizdə belə problemlər olmur.

- Sizin bu qədər incə olmağınız işinizlə bağlıdır?

- Daha çox işimi nəzərə alaraq pəhriz saxlayıram.

- Bizim cəmiyyətimizdə balet o qədər də geniş yayılmayıb. Tamaşaları daha çox ziyalı, elit təbəqənin insanları izləyirlər. Sizcə niyə?

- Əslində, yaxın vaxtlara qədər belə idi, indi isə yeni rəhbərliyin gəlişi ilə Azərbaycan baletinə marağın açıq şəkildə artdığını görürük. Bu bizi çox sevindirir.

- Səhnədə başınıza gözlənilməz hadisələr gəlibmi?

- Bir dəfə rəqs ayaqqabılarımı unutmuşdum və bunu səhnəyə çıxandan sonra bildim.

Qrim otağına getmək imkanım yox idi, həmin vaxt tamaşada birlikdə rəqs etdiyim baldızım Liya Ferştandtın ayaqqabılarını götürdüm. Ayaq ölçümüz eyni olsa da, heç vaxt bir-birimizin ayaqqabılarından istifadə etmirik. İlk çıxışımı etdim, hər şey yaxşı keçdi. Həmin vaxt çox həyəcanlanmışdım, lakin son anda çıxış yolunu tapdıq, belə hadisələr arada olur.

- Azərbaycan dilini mükəmməl bilirsiz?

- Hələki mükəmməl danışa bilmirəm, lakin təkmilləşdirməyə çalışıram.

- Nə vaxt öyrəndiniz?

- Tədricən, dostlarım və həmkarlarımla ünsiyyət vasitəsilə öyrəndim.

- İşiniz bunu tələb elədi yoxsa necə?

- Biz işdə həm Azərbaycan, həm də rus dilində danışırıq. Onu da qeyd edim ki, bütün dünyada geniş istifadə olunan fransız balet terminlərindən də çox istifadə edirik.

- Baletdə çox vaxt əsas partiyaları ifa edirsiniz. Sizi fərqləndirən nədir ki, bu rollar sizə verilir?

- Bu suala cavab vermək çətindir, yəqin ki, bu rolları mənə etibar edən insanların güvənini qazandığımdandır. Onu deyə bilərəm ki, bütün rollarıma böyük fədakarlıqla və həvəslə hazırlaşıram.

- Tamaşalar zamanı xəsarət alsanız, tibbi sığortanız varmı? Və yaxud işlədiyiniz teatr bu xərcləri qarşılayar?

- Bizdə belə hallar yoxdur. Düşünürəm ki, teatr qarşılayır. Ümid edirəm ki, belə hallarla qarşılaşmarıq.

- Yoldaşınız da balet sənətçisidir. Tanışlığınız necə oldu?

- Həyat yoldaşım - Makar Ferştandt, Azərbaycanın əməkdar artisti, eyni zamanda, teatrımızın aparıcı solistidir. Biz xoreoqrafiya məktəbində birlikdə oxumuşuq və son illərimizdə ünsiyyət qurmağa başladıq. Sonra ailə qurduq və iki gözəl qızımız var, qeyd edim ki, qızlarımız da balet akademiyasında oxuyur.

- Belə çıxır ki, siz ailəlikcə bu sənətlə məşğulsunuz?

- Bəli, hətta həyat yoldaşımın bacısı ilə bir balet truppasında işləyirik, övladlarımız isə xoreoqrafiya akademiyasında oxuyur. Məlum olduğu kimi balet sevgisi onlara miras yolu ilə keçib.

- Niyə məhz digər ölkələr yox, Azərbaycan?

- Azərbaycan mənim vətənimdir, mən burada doğulmuşam, valideynlərim, həyat yoldaşım, onun valideynləri burada yaşayır. Azərbaycanda böyüyüb təhsil almışam, indi də teatrımıza xidmət edirəm. Azərbaycanda balet sənətinin gələcək taleyinə biganə deyiləm.

- Yaxın günlərdə Azərbaycanın xalq artisti Tamila Şirəliyeva dünyasını dəyişdi. Bildiyim qədər müəlliminiz olub...

- Bəli, Tamila Şirəliyeva Xoreoqrafiya akademiyasında müəllimim olub. O, mənə müəllim kimi çox şey öyrətdi. Balerina olaraq xarakter formalaşdırdı, bu peşəyə sevgi ilə yanaşmağı öyrətdi. Bizi həmişə dəstəkləyirdi. Ona ömür boyu təşəkkür edəcəm. Tamila Şirəliyevanın əbədi gedişi hamımızı çox üzdü. Allahdan ona rəhmət diləyirəm. Əsl sənətkarlar hər zaman yaşayırlar.

Söhbətləşdi: Havar Şəfiyeva

Bizim müsahib

Paylaş:

Baxılıb: 473 dəfə