5G texnologiyası nədir?

Bakı:

22 °C

68 %

5 m/s

Əlaqə

AZ RU EN

Ana səhifə / Maraqlı / 5G texnologiyası nədir?

5G texnologiyası nədir?

17.05.2023 [10:54]

Nicat Dilqəmli

Texnologiya əsrinin müasir kəşflərindən biri də beşinci nəsil texnologiyalardır. 5G əvvəlki nəsil şəbəkələrə nisbətən daha yüksək yükləmə sürətli, daha sabit əlaqə və daha böyük tutum imkanları təqdim edən beşinci nəsil simsiz mobil texnologiyadır.

Bəs texnologiyanın beşinci nəsli barədə hansı məlumatlar məlumdur?

5G hazırda məşhur olan 4G şəbəkələrindən daha sürətli və etibarlıdır. Ekspertlərin fikrincə, bu texnoloyi tətbiqlər, sosial şəbəkələr və məlumat üçün internetdən istifadə üsulumuzda inqilab edə bilər. Məsələn, özünü idarə etmək xüsusiyyətinə malik avtomobillər, qabaqcıl oyun platformaları və proqramları, yüksək sürətli məlumat bağlantısı tələb edən axın mediası üçün bu texnologiyanın olduqca böyük faydalarının olacağı ehtimal edilir. Ümumiyyətlə, 5G şəbəkəsi 4G-dən ən az 10 dəfə daha sürətlidir. Bəzi ekspertlər iddia edirlər ki, bu fərq 100 dəfəyə qədər qalxa bilər. Bu o deməkdir ki, misal üçün, 2 saatlıq bir film 5G ilə 10 saniyədən daha az bir vaxta yüklənəcək. 4G-də isə bu, 7 dəqiqə civarındadır. Təbii ki, burada internet şəbəkəsinin bəzi texniki göstəriciləri də önəmli məqamlardandır.

Məlum olduğu kimi, texnologiya dünyası hər gün yüzlərlə yeni kəşfə qucaq açır. Təbii ki, innovasiyaların tətbiq edilməsi üçün yüksək sürətli internet bağlantısının olması zərurəti yaranır. Çünki müasir texnoloji avadanlıqların bir çoxunun emal etdiyi informasiyanın həcmi indikindən dəfələrlə çoxdur. İndiki nəsil texnologiyalar isə bu qədər böyük həcmlərdə məlumatları emal etmək gücündə deyil. Elə o səbəbdən də yeni nəsil texnologiyaların yaranması zərurəti meydana çıxır. Bu sahədəki inqilab nəticəsində emal edilən informasiyanın həcminin qarşıdakı illərdə də artacağı istisna edilmir. Hələlik dəqiq nəticələr əldə olunmasa da, gələcəkdəki informasiyaların həcmi barədə müxtəlif fikirlər artıq ortaya atılmaqda, səsləndirilməkdədir. Növbəti onilliklərdə məlumatların həcminin yüzlərlə zettabayt artacağı ehtimal edilir. İndiki mobil infrastruktur qeyd edilən həcmdə informasiya üçün nəzərdə tutulmadığından yenilənmələrin olması mütləqdir.

Hər bir yeni nəsil simsiz şəbəkə texnologiyasının gətirdiyi kimi, 5G də özünəməxsus yeni istifadə sahələri yaratmaqdadır. Bəzi mənbələrdə 5G texnologiyasının əsas fokuslanacağı sahələrin IoT (internet of things) və kritik kommunikasiya proqramları olacağı bildirilir.

Mütəxəssislərin qənaətinə görə, beşinci nəsil texnologiyaların inkişafının gələcək dövr üçün trilyonlarla dollarlıq iqtisadi dəyəri olacaq. Bundan başqa, 5G-nin inkişafı həm də milyonlarla yeni iş yerinin yaranması deməkdir. Beşinci nəsil texnologiyaların köməyi ilə ağıllı kəndlərin salınması sürətlənəcək, tibb sahəsində mühüm inkişaf müşahidə ediləcək. Bu, həm də ətraf mühitin zərərli tullantılardan qorunması baxımından da vacibdir. Çünki 5G-nin geniş miqyasda tətbiqi ətraf mühitə atılan zərərli maddələrin həcminin bir xeyli azalmasına səbəb olacaq.

Rəqəmsal inkişaf və nəqliyyat naziri Rəşad Nəbiyev M360 GSMA beynəlxalq telekommunikasiya konfransında çıxışı zamanı bildirib ki, 2024-cü ilin sonuna qədər ölkə əhalisinin hamısı genişzolaqlı internet ilə təmin olunacaq.

“Biz Xəzər üzərində fiber-optik xəttin çəkilməsi üzərində çalışırıq. Bu Azərbaycan və Orta Asiya arasında əlaqə yaradılması üçün güclü təkan yaradacaq. Dünya əhalisinin 46%-inin rəqəmsal sahədə bilik və bacarıqları zəifdir. Bizim qarşımızda rəqəmsallaşmanın geniş istifadə edilməsi tapşırığı durur. Qarşıdakı illərdə kibertəhlükəsizlik sahəsində savadlı kadrlar yetişdirəcəyik. Ölkədə internet sürətinin artırılması istiqamətində işləri görməkdəyik. Tezliklərin düzgün tənzimlənməməsinin şahidiyik. Həmçinin tezliklərin 5G bağlantıda yerləşdirilməsi istiqamətində vəzifələri yerinə yetirməkdəyik. Azercell 5G-ni tətbiq edən ilk şirkət olacaq”, - deyə R.Nəbiyev bildirib.

Paylaş:

Baxılıb: 1755 dəfə