Təhsildə yeni çağırışlar

Bakı:

26 °C

38 %

6 m/s

Əlaqə

AZ RU EN

Ana səhifə / MEDİA / Təhsildə yeni çağırışlar

Təhsildə yeni çağırışlar

06.09.2022 [10:46]

Müasir hədəflər, innovasiyalar

P.İSMAYILOV

Təhsil hər bir xalqın sabahına, gələcəyinə aparan yoldur. Bu yolun təkmilləşdirilməsi, müasir tələblərə uyğunlaşdırılması isə zamanın tələbidir. Təhsil sahəsinin inkişafı Azərbaycanda da prioritet istiqamətlərdən biridir. Ölkəmizdə təhsilin inkişafına böyük diqqət və qayğı göstərilir. Azərbaycan təhsilinin bugünkü inkişafının mənbəyi ümummilli lider Heydər Əliyevin rəhbərliyi ilə əsası qoyulan məqsədyönlü siyasətdən qaynaqlanır. Prezident İlham Əliyev tərəfindən Azərbaycan təhsilində sistemli islahatlar aparılaraq Ümummilli Liderin təhsil siyasəti uğurla davam etdirilir. Təhsilin müasir hədəflərinə doğru qəbul olunmuş strateji inkişaf sənədlərinin müddəaları yüksək dəqiqliklə həyata keçirilir.

Təsadüfi deyil ki, ölkəmizdə təhsilin müasirləşdirilməsi məqsədilə seçilmiş məqsədyönlü fəaliyyət istiqaməti keyfiyyətin dayanıqlılığını təmin etmək və müasir dövrün çağırışlarına əsaslanmaqla inkişafı şərtləndirən dəyişikliklərə nail olmaq üçün bütün potensial imkanlar səfərbər edilib. Təhsil sahəsində aparılan islahatlar, dövlət proqramları, Prezident İlham Əliyevin Sərəncamı ilə “Azərbaycan Respublikasında təhsilin inkişafı üzrə Dövlət Strategiyası”nın təsdiq edilməsi, həmçinin “Bakı şəhərində və onun qəsəbələrində təhsil müəssisələrinin tikintisi və təmiri ilə bağlı tədbirlər haqqında”, “Azərbaycan Respublikasında təhsil infrastrukturunun inkişafı ilə əlaqədar tədbirlər haqqında”, “Dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin əməkhaqqının artırılması haqqında” Azərbaycan Respublikası Prezidentinin sərəncamları bir daha təhsilin dövlət başçısının daim diqqət mərkəzində olduğunun göstəricisidir.

Ən əsası təhsilin inkişafında innovativliyə, müasirliyə keçid ən mühüm tədbirlərdəndir. Bu gün Azərbaycanda tətbiq olunan tədris proqramları yeni dövrün çağırışlarına tam cavab verir. Yeri gəlmişkən, noyabrın 5-də Təhsildə Yeni Çağırışlar III Beynəlxalq Forumu keçiriləcək. Forum “T-Network” təhsil işçilərinin təcrübə və kommunikasiya platforması və Təhsil İnstitutunun təşkilatçılığı, Elm və Təhsil Nazirliyi, İqtisadi Əməkdaşlıq və İnkişaf Təşkilatı (İƏİT), Təhsilin İnkişafı Fondunun tərəfdaşlığı, “Təhsil TV”, “Azərbaycan müəllimi” qəzeti və “Azərbaycan məktəbi” jurnalının media dəstəyi ilə hibrid formatda təşkil olunacaq. Təhsil İnstitutundan verilən məlumatda bildirilib ki, forumun əsas məqsədi təhsildə yeni çağırışları müzakirə etmək, yeni dövrün təhsil tələblərini nəzərdən keçirərək keyfiyyətin daha da yüksəldilməsinə nail olmaqdır. “Daha təhsilli gələcək” şüarı ilə keçiriləcək forum rəqəmsal dünyada öyrənmək və qlobal səriştələr mövzularını əhatə edəcək. Forum “Azərbaycan 2030: sosial-iqtisadi inkişafa dair Milli Prioritetlər” sənədinin “XXI əsrin tələblərinə uyğun təhsil” istiqamətini, İƏİT-nin “Təhsil və bacarıqların gələcəyi - 2030” sənədini, BMT-nin Dayanıqlı İnkişaf Məqsədlərindən biri olan keyfiyyətli təhsil məsələsini rəhbər tutur. Forumun əsas məruzəçisi İƏİT-nin Baş katibinin təhsil siyasəti üzrə xüsusi müşaviri, təhsil və bacarıqlar üzrə direktoru Andreas Şleyxer olacaq. Forumda iştirak ödənişsizdir. Qeydiyyatdan keçən şəxslərin onlayn iştirakı üçün link göndəriləcək. Əyani iştirak yalnız dəvətnamə ilə mümkün olacaq. Arzu edən iştirakçılara beynəlxalq sertifikat təqdim ediləcək.

Xatırladaq ki, Təhsildə Yeni Çağırışlar II Beynəlxalq Forumu ötən ilin oktyabrın 1-də keçirilib. Forumun əsas məqsədi təhsildə yeni çağırışları müzakirə etmək, beləliklə təhsildə keyfiyyətin daha da yüksəldilməsinə nail olmaqdır. “Təşəbbüsdən tətbiqə” başlığı altında baş tutan forum virtual təhsil, beynəlxalq qiymətləndirmə, liderlik, XXI əsrin bacarıqları və davamlı inkişaf mövzularını əhatə edib. Forumun açılış çıxışı Azərbaycan Respublikasının elm və təhsil naziri Emin Əmrullayev tərəfindən edilib. On beş minə yaxın mütəxəssisin qoşulduğu birinci və ikinci forumlarda əsas məruzəçi isə Andreas Şleyxer olub. Forumda tanınmış təhsil mütəxəssisləri Filip Kotler, Sal Khan, Maykl Fullan, Anant Aqarval və digərləri çıxış ediblər.

Təhsildə Yeni Çağırışlar III Beynəlxalq Forumunda da dünya şöhrətli təhsil mütəxəssislərinin çıxış edəcəyi gözlənilir.

Göründüyü kimi, Prezident İlham Əliyevin rəhbərliyi ilə ölkəmizdə həyata keçirilən təhsil siyasətinin çox mühüm strateji hədəflərindən biri “qara qızıl”ın intellektual kapitala çevrilməsidir. 2004-cü ildə bəyan edilmiş “qara qızıl”ı insan kapitalına çevirmək strategiyasında elmin və təhsilin oynadığı başlıca rol daim diqqət mərkəzində saxlanılır. Bu istiqamətdə Azərbaycanda həm təhsilin maddi-texniki bazasının möhkəmləndirilməsi, həm də yüksəkkeyfiyyətli tədris prosesinin həyata keçirilməsi mühüm yer tutur. Bu gün Azərbaycanda innovativ biliklərə və tətbiqlərə əsaslanan yeni texnologiyaların yaradılması, innovativ və rəqabət qabiliyyətli iqtisadiyyatın formalaşmasına, universitet və elmi-tədqiqat müəssisələrində elmi və innovativ proseslərin idarə olunmasına, prioritet istiqamətlərin düzgün və çevik olaraq müəyyənləşdirilməsinə, elmi nəticələrin kommersiyalaşdırılmasına, təhsilalanlarda, müəllim və alimlərdə yaradıcı və innovativ yönümlü düşüncənin inkişaf etdirilməsinə xüsusi diqqət göstərilir. Bu səbəbdəndir ki, Azərbaycan dünyada sürətlə inkişaf edən və modernləşən dövlət kimi tanınır və qəbul edilir, beynəlxalq indekslər üzrə sıralamada inamla irəliləyir.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Elmi-kütləvi, mədəni-maarif, təhsil proqramlarının hazırlanması” istiqaməti üzrə hazırlanmışdır

Paylaş:

Baxılıb: 857 dəfə