Nyu-Yorkda mühüm konfrans

Bakı:

16°C

59%

10m/s

Əlaqə

AZ RU EN

Ana səhifə / MEDİA / Nyu-Yorkda mühüm konfrans

Nyu-Yorkda mühüm konfrans

14.03.2025 [09:15]

Qadınların Statusu Komissiyasının sessiyası keçirilir...

Bu günlərdə BMT-nin qadınların vəziyyəti üzrə Komissiyasının (CSW69) 69-cu sessiyası baş tutub. Martın 10-da başlayan tədbir martın 21-dək davam edəcək. Məlumdur ki, qadın hüquqlarının təşviqi, bütün dünyada onların həyat reallığının sənədləşdirilməsi, gender bərabərliyi ilə bağlı qlobal standartların formalaşdırılmasında mühüm rol oynayır. Ötən il CSW68-də 100 dünya lideri və 4800 vətəndaş cəmiyyəti təmsilçisi iştirak edib.

Builki sessiyada Baş Assambleyanın 23-cü xüsusi sessiyasının nəticələri, habelə 1995-ci ildə qəbul edilmiş əlamətdar Pekin Bəyannaməsi və Fəaliyyət Platforması nəzərdən keçirilir.

“Gender Bərabərliyi üzrə Milli Fəaliyyət Planı” yenilənib

Sessiyada Azərbaycanı Ailə, Qadın və Uşaq Problemləri üzrə Dövlət Komitəsinin sədri Bahar Muradovanın rəhbərlik etdiyi nümayəndə heyəti təmsil edir. Tədbirdə çıxış edən komitə sədri bildirib ki, son otuz il ərzində Pekin Bəyannaməsi və Fəaliyyət Platforması əsasında dünya gender bərabərliyi sahəsində böyük irəliləyiş əldə edilib. Onun sözlərinə görə, ötən il Bakıda keçirilən COP29 çərçivəsində ilk dəfə “Gender Günü” keçirilib və bu mövzu əsas diqqət mərkəzində olub. Bahar Muradova Azərbaycanda institusional və vətəndaş cəmiyyəti təşkilatlarının koordinasiyalı səyləri sayəsində qadın hüquqlarının müdafiəsində nəzərəçarpacaq irəliləyiş əldə edildiyini qeyd edib: “Məişət zorakılığının, azyaşlı nikahların, qohum nikahların qarşısının alınması üçün qanunvericilikdə yeni tənzimləyici normalar yaratmışıq. Komitənin əlaqələndirməsilə yerli icra hakimiyyəti orqanları yanında müvafiq monitorinq və əlaqələndirmə qrupları yaradılıb. “Məişət zorakılığına qarşı mübarizə üzrə Milli Fəaliyyət Planı”nın icrası uğurla başa çatıb və hazırda yeni plan hazırlanıb. “Gender Bərabərliyi üzrə Milli Fəaliyyət Planı” yenilənib.

Qadınların siyasətdə iştirakı artır...

B.Muradova bildirib ki, Azərbaycanda qadınların və gənc qızların təhsil imkanlarının genişləndirilməsinə yönəlmiş bir sıra layihə və proqramlar həyata keçirilib: “Qadınların siyasətdə iştirakı və qərarların qəbul edilməsində təmsil olunması hər il artır. Son seçkilər zamanı qadın deputatların sayı 21 faizə, bələdiyyələrdə isə 39 faizə yüksəlib”.

Komitə sədri qeyd edib ki, bəşəriyyətə qarşı ən böyük zorakılıq ədalətsiz müharibələrdən, işğaldan, etnik təmizləmə aktlarından qaynaqlanır. Bahar Muradova əlavə edib ki, Azərbaycan öz ərazi bütövlüyünü və suverenliyini bərpa etsə də, onilliklər boyu davam edən işğalın dağıdıcı nəticələri mülki əhaliyə təsir etməkdə davam edir.

Son 5 ildə Azərbaycanda bu sahədə ciddi irəliləyiş olub

Bundan başqa, sessiyası çərçivəsində Serbiyanın gender bərabərliyi, qadınlara qarşı zorakılığın qarşısının alınması və qadınların iqtisadi və siyasi səlahiyyətləndirilməsi naziri Tatyana Makura ilə görüşüb. Görüşdə iki ölkənin ailə sahəsində gördüyü işlərə, əldə olunan təcrübələrə dair müzakirə aparılıb. Bahar Muradova Serbiyanın Azərbaycan üçün dost ölkə olduğunu deyərək iki ölkə arasında ali siyasi səviyyədə güclü əlaqələrin qurulduğunu əlavə edib. O, rəhbərlik etdiyi qurumun fəaliyyət istiqamətləri barədə serbiyalı həmkarına məlumat verib və son 5 ildə Azərbaycanda ailə sahəsində ciddi irəliləyişin olduğunu diqqətə çatdırıb. Bahar Muradova erkən nikah, ailədaxili zorakılıq mövzularında cəmiyyətdə məlumatlılığın aparılması üçün müxtəlif, o cümlədən sosial mediada geniş kampaniyaların aparıldığını deyib. Komitə sədri həmçinin, son illər bu mövzuda parlamentdə geniş müzakirələrin aparıldığını və bir sıra qanun və məcəllələrə dəyişikliklərin edildiyini də vurğulayıb.

Azərbaycan və Serbiyanın ailə mövzusunda ortaq maraqları var

Serbiyalı nazir iki ölkənin ailə mövzusunda ortaq maraqlarının olduğunu deyib və son bir ildə ölkəsində ailədaxili münaqişə sahəsində aparılan kampaniyadan bəhs edib. O da bu məsələnin həllində qanunverici bazada dəyişikliyin xüsusi əhəmiyyət kəsb etdiyini vurğulayaraq, vətəndaş cəmiyyətinin də məişət zorakılığına qarşı mübarizədə rolunu qeyd edib. Tərəflər bu sahədə birgə layihələrin icrasına dair müzakirə aparıb və ikitərəfli əməkdaşlığın yollarını müzakirə ediblər.

Səlim

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Gender, ailə və demoqrafiya məsələlərinin işıqlandırılması” istiqaməti üzrə hazırlanmışdır.

Paylaş:

Baxılıb: 250 dəfə