Böyük Qayıdışa doğru daha bir addım...

Bakı:

9 °C

76 %

7 m/s

Əlaqə

AZ RU EN

Ana səhifə / İqtisadiyyat / Böyük Qayıdışa doğru daha bir addım...

Böyük Qayıdışa doğru daha bir addım...

03.02.2022 [10:13]

Bərdə-Ağdam dəmir yolunda stansiyaların tikintisinə başlanıldı

Mübariz

Bu günlərdə işğaldan azad edilmiş ərazilərdə yeni infrastruktur obyektlərinin - Bərdə-Ağdam dəmir yolunda stansiyaların tikintisinə başlanılıb. Bu barədə ölkə Prezidentinin müvafiq Sərəncamı ilə yaradılan işğaldan azad edilmiş ərazilərdə məsələlərin mərkəzləşmiş qaydada həlli ilə bağlı Əlaqələndirmə Qərargahının İdarələrarası Mərkəzinin nəzdində fəaliyyət göstərən Nəqliyyat, rabitə və yüksək texnologiyalar üzrə İşçi Qrupundan məlumat verilib.

Müharibənin başa çatmasından sonra təxminən 10 min kvadratkilometri əhatə edən böyük bir ərazidə başlanan bərpa işlərinin əsas istiqamətini şəhər və kəndlərin, yolların keçəcəyi ərazilərdən minaların təmizlənməsi və təmizlənmiş ərazilərdə müasir infrastrukturun qurulması təşkil edib. Azərbaycan dövləti nəzərdə tutulan layihələrin icrasına lazımi qədər vəsait ayırır. İşğaldan azad edilmiş ərazilərin bərpası məqsədilə 2021-ci ildə dövlət büdcəsindən 2,2 milyard manat vəsait ayrıldı. Cari ildə də işğaldan azad olunmuş ərazilərdə layihələrin reallaşdırılmasına eyni məbləğdə maliyyə vəsaitinin yönəldilməsi nəzərdə tutulub.

Bütövlükdə, bərpa işləri müxtəlif istiqamətləri əhatə edir. Buraya minalardan təmizlənmiş ərazilərdə elektrik verilişi xətlərinin çəkilməsi, su elektrik stansiyalarının tikintisi, ekoloji tarazlığın bərpası, su layihələrinin icrası və digər istiqamətlər daxildir. Ötən il, həmçinin yaşayış məntəqələrinin bərpasına start verilib. İşğaldan azad edilmiş ərazilərdə şəhər və kəndlərin bərpası “ağıllı kənd”, “ağıllı şəhər konseptinə uyğun həyata keçirilir. Artıq Zəngilan rayonunun Ağalı kəndində müasir yanaşmalar əsasında inşa olunan ilk “ağıllı kənd” layihəsinin icrası tamamlanmaq üzrədir. Növbəti “ağıllı kənd”in tikintisin Füzuli rayonunda reallaşdırılması nəzərdə tutulub. Eyni zamanda, ötən il Ağdam, Şuşa kimi şəhərlərin bərpasına başlanılıb. Şəhərlərin və kəndlərin bərpası əvvəlcədən Azərbaycanın memarlıq ənənələri nəzərə alınmaqla hazırlanan layihələr əsasında reallaşdırılır.

İşğaldan azad olunmuş ərazilərdə ötən bir il ərzində görülən bərpa işlərinin sırasında yüksək səviyyəli yol-nəqliyyat infrastrukturunun qurulması xüsusilə diqqət çəkir. İşğaldan azad olunmuş ərazilərdə beynəlxalq səviyyəli üç hava limanının yaradılması planlaşdırılıb. Onlardan biri - Füzuli Beynəlxalq Hava Limanı ötən il istifadəyə verildi. Digər iki beynəlxalq səviyyəli hava limanının inşası isə Zəngilan və Laçında həyata keçirilir. 2021-ci ildə, həmçinin Şuşaya çəkilən Zəfər yolunun inşası tamamlandı. Hazırda Azərbaycanın mədəniyyət paytaxtı olan Şuşaya ikinci yolun çəkilməsi uğurla davam etdirikir. İcra olunan digər yol layihələri tamamlandıqdan, o cümlədən Murovda çəkilən tunellər istifadəyə verildikdən sonra işğaldan azad olunmuş ərazilərə yüklərin daşınması və insanların gediş-gəlişi asanlaşacaq.

İşğaldan azad edilmiş ərazilərdə yeni infrastruktur obyektlərinin inşası yenidən qurulan Bərdə-Ağdam dəmir yolunda Köçərli və Təzəkənd stansiyalarının inzibati binasının və sərnişin platformasının tikintisini əhatə edir. Xatırladaq ki, dövlət başçısının 24 noyabr 2020-ci il tarixli Sərəncamına əsasən, Bərdə-Ağdam dəmir yolu xəttinin tikinti-quraşdırma işlərinə 2020-ci ilin dekabr ayının əvvəlində start verilib. Yolun ox üzrə uzunluğu 47,1 km-dir. Layihə çərçivəsində dörd ədəd stansiyanın, üç ədəd körpünün, bir ədəd yolötürücünün, 23 ədəd avtomobil yolu ilə eyni səviyyədə kəsişmənin və ümumilikdə 127 ədəd süni mühəndisi qurğunun tikintisi planlaşdırılır. Tikinti işləri iki mərhələdə həyata keçirilir. Birinci mərhələ Bərdə-Köçərli-Təzəkənd stansiyalarını əhatə etməklə 20,78 km, ikinci mərhələ isə Təzəkənd-Ağdam stansiyalarını əhatə etməklə 26,32 km təşkil edir. Birinci mərhələ üzrə dəmir yolu xəttinin torpaq yatağının tikintisi işlərinə 2020-ci ilin dekabr ayında, süni qurğuların tikintisinə 2021-ci ilin fevral ayında, yolun üst quruluşu elementlərinin tikintisinə isə 2021-ci ilin avqust ayında başlanılıb.

Artıq birinci mərhələ üzrə torpaq işləri 98% yerinə yetirilib, həmçinin 35 ədəd suötürücü boru, iki ədəd körpü, səkkiz ədəd ehtiyat keçidi tam tikilib. 16,8 km dəmir yolunun üst quruluşu elementləri və 18 ədəd yoldəyişdirən qurğu quraşdırılıb. Köçərli və Təzəkənd stansiyalarının inşası da birinci mərhələ çərçivəsində aparılır. Ümumilikdə birinci mərhələ üzrə tikinti-quraşdırma işləri 65% yerinə yetirilib. İkinci mərhələ üzrə dəmir yolu xətti minalandığından tikinti-quraşdırma işləri minatəmizləmə prosesinə paralel həyata keçirilir. Bərdə-Ağdam dəmir yolunun tikintisinin gələn il yekunlaşdırılması planlaşdırılır.

Paylaş:

Baxılıb: 1001 dəfə