Ulu öndərin anadan olmasının 89-cu ildönümünə həsr olunmuş voleybol turniri başa çatıb

Bakı:

31 °C

42 %

3 m/s

Əlaqə

AZ RU EN

Ana səhifə / İdman / Ulu öndərin anadan olmasının 89-cu ildönümünə həsr olunmuş voleybol turniri başa çatıb

Ulu öndərin anadan olmasının 89-cu ildönümünə həsr olunmuş voleybol turniri başa çatıb

04.05.2012 [01:09]

Əli Əhmədov: Belə tədbirlərin keçirilməsi bütövlükdə hər bir Azərbaycan vətəndaşının və Azərbaycan xalqının Heydər Əliyevə, Onun əziz xatirəsinə, ideyalarına hörmətinin, ehtiramının ifadəsidir
Dünən “Yeni Azərbaycan”, “İki sahil” və “Səs” qəzetlərinin birgə təşkilatçılığı ilə Ulu öndər Heydər Əliyevin anadan olmasının 89-cu ildönümünə həsr edilmiş media nümayəndələri arasında voleybol turnirinin final oyunu keçirilib. Azərbaycan Voleybol Federasiyasında təşkil olunmuş final görüşündə “Səs” və “Xalq qəzeti”nin komandaları üz-üzə gəliblər.
Qarşılaşmanı Yeni Azərbaycan Partiyasının Sədr müavini-İcra katibi Əli Əhmədov, İcra katibinin müavini Mübariz Qurbanlı, turniri təşkil edən qəzetlərin baş redaktorları, kütləvi informasiya vasitələrinin nümayəndələri və komanda azarkeşləri izləyiblər.
Beynəlxalq dərəcəli hakim Eldar Zülfüqarovun idarə etdiyi matçın ilk iki setində “Səs” qəzetinin komandası qələbə qazanıb(25:19, 25: 21).
İlk iki setdən sonra “Xalq qəzeti”nin voleybolçuları oyunda dönüş etməyə müvəffəq olublar. Nəticədə 3-cü və 4-cü setlərdə gərgin şəraitdə keçən mübarizənin qalibi məhz “Xalq qəzeti”nin voleybolçuları olub (22: 25, 26:28).
Bundan sonra oyunun gedişində sükanı ələ keçirən “Səs” qəzetinin komandası əzmkar və komanda oyunu göstərərək həlledici - 5-ci setdə 18:16 hesabı ilə qələbə qazanıb. Beləliklə, “Səs” qəzetinin komandası ümummilli lider Heydər Əliyevin xatirəsinə həsr olunmuş turnirin qalibi və fəxri kubokun sahibi olub.
Final oyunundan sonra qaliblərin mükafatlandırma mərasimi keçirilib. Mərasimdə çıxış edən Yeni Azərbaycan Partiyasının Sədr müavini- İcra katibi Əli Əhmədov vurğulayıb ki, partiyanın yaradıcısı ümummilli lider Heydər Əliyevin doğum günü ərəfəsində müxtəlif tədbirlər keçirilir: “Bu tədbirlər içərisində önəmli yer tutan hadisələrdən biri də idman yarışlarının keçirilməsidir. Belə tədbirlərin keçirilməsi bütövlükdə hər bir Azərbaycan vətəndaşının və Azərbaycan xalqının Heydər Əliyevə, Onun əziz xatirəsinə, ideyalarına hörmətinin, ehtiramının ifadəsidir. İndi Azərbaycanı müxtəlif və mötəbər beynəlxalq idman yarışlarının keçirildiyi bir məkan kimi tanıyırlar”.
Əli Əhmədov final oyunu haqqında fikrini açıqlayarkən qeyd edib ki, qalibin kim olacağı sonuncu ana qədər məlum olmayıb ki, bu da oyunun maraqlı keçməsindən irəli gəlib.
YAP İcra katibinin müavini onu da vurğulayıb ki, turnirin ən böyük gözəlliyi ondan ibarətdir ki, bu turnir Azərbaycan xalqının ümummilli lideri Heydər Əliyevin 89-cu ildönümünə həsr olunub: “Hesab edirəm ki, idmançılar Heydər Əliyevin xalqımızın qarşısında göstərdiyi xidmətlərini yüksək qiymətləndirirlər, Onun əziz xatirəsinə həmişə böyük ehtiram və hörmət nümayiş etdirirlər. çünki Azərbaycanda bütün sahələrlə yanaşı, idmanın və kütləvi bədən tərbiyəsinin də inkişaf təməli məhz Ulu öndər Heydər Əliyev tərəfindən qoyulmuşdur. Bu gün Azərbaycanda idman çox inkişaf edib. Hökumətimiz və dövlətimiz bu istiqamətdə əlavə proqramlar həyata keçirir və çox əlamətdardır ki, bizim idmançılarımız, eləcə də bu və digər formalarda fəaliyyət göstərən həvəskar idmançılarımız həmişə Ulu öndər Heydər Əliyevin xatirəsini əziz tuturlar. Bizlər bir daha bu gerçəkliyin şahidi olduq. Mən sizi bir daha təbrik etmək istəyirəm. Ancaq kimisə qalib saymaq, kimi isə məğlub hesab etmək bizim üçün həqiqətən də çətindir. Lakin burada üç mükafat yeri tutmuş komandalar var. Onu da bildirim ki, final uğrunda oyuna çıxan hər iki komanda çox güclü oyun nümayiş etdirdilər. Mən sizi bir daha təbrik edirəm”.
Görüşdən sonra 3-cü yerin sahibi “AzərTAc” komandasına, 2-ci yerin sahibi “Xalq qəzeti”nin komandasına və turnirin qalibi olan “Səs” qəzeti komandasına Yeni Azərbaycan Partiyasının Sədr müavini, İcra katibi Əli Əhmədov, İcra katibinin müavini Mübariz Qurbanlı və digər qonaqlar tərəfindən diplom və pul mükafatı təqdim olunub.
Sonda xatirə şəkli çəkdirilib.

Paylaş:

Baxılıb: 1475 dəfə