Daha bir güləşçimiz Avropa çempionu oldu

Bakı:

28 °C

62 %

8 m/s

Əlaqə

AZ RU EN

Ana səhifə / İdman / Daha bir güləşçimiz Avropa çempionu oldu

Daha bir güləşçimiz Avropa çempionu oldu

15.04.2010 [09:31]

Bakıda keçirilən Avropa çempionatında dünən sərbəst güləşçilərin mübarizəsinə yekun vurulub. Yarışların ikinci günü çəkisi 60 kq, 74 kq və 96 kq olan güləşçilər xalça üzərinə çıxıblar. Bu çəkilərdə Azərbaycanı Hacı Əliyev, çamsulvara çamsulvarayev və Xetaq Qazyumov təmsil ediblər. Yığmamızın heyəti açıqlanarkən, qitə birinciliyində 60 kq çəki dərəcəsində Avropa çempionu Zəlimxan Hüseynovun mübarizə aparacağı bildirilsə də, o, son anda Hacı Əliyevlə əvəzlənib.
60 kq çəki dərəcəsində döşəyə çıxacaq Hacı Əliyev 1/8 final mərhələsindən mübarizəyə başlayıb. O, ilk görüşdə almaniyalı Tim Sleyçerlə güləşib. İlk hissədə idmançımız fəallıq nümayiş etdirsə də, xal ala bilməyib. Hissənin sonunda püşk atılıb və rəqib fənd işlədib. Düzgün fənd almaniyalının fasiləyə qalib kimi yollanmasını təmin edib. Lakin bundan sonra özünə gələn Əliyev rəqibə bu idman növündən “dərs” keçməyə başlayıb. Belə ki, ikinci hissədə 3:0 hesabı ilə qələbə qazanan pəhləvanımız növbəti hissədə 1 xal geri düşsə də, sonradan 2 xal qazanaraq növbəti mərhələyə vəsiqə qazanıb.
Həmyerlimiz növbəti mərhələdə Andrey Perpelita (Moldova) ilə güləşib. İlk hissədə 4:2 hesabı ilə irəlidə olan pəhləvanımız sonda 4:5 hesabı ilə uduzub. O, ikinci hissədə hesabı bərabərləşdirsə də, bu uğurun davamını gətirə bilməyib. üçüncü hissədə qələbə qazanan rəqib yarımfinala yüksəlib.
74 kq çəkidə yarışan yığmamızın liderlərindən biri - çamsulvara çamsulvarayev Avropa çempionatında qızıl medala iddialı sayılırdı. Güləş üslubu ilə xüsusi rəğbət qazanan idmançımız güclülərin yer aldığı yarımqrupda mübarizə aparıb. Təmsilçimiz birinci döyüşdə Ukrayna millisinin şərəfini qoruyan gürcü Giya çixladzeni sınağa çəkib. Rəqibin zəif nöqtələrini tapdıqdan sonra özünün şah fəndlərini işlədən dağıstanlı legionerimiz ilk hissədə 5:0 hesabı ilə qələbə qazanıb. İkinci hissədə də üstünlük onun tərəfində olub. çamsulvarayev bu dəfə Ukrayna təmsilçisinə 2:1 hesabı ilə qalib gəlib. Təəssüf ki, həmyerlimiz növbəti mərhələdə məğlub olaraq qızıl medal şansını itirib. Amma o, təsəlliverici görüşdə alman güləşciyə qalib gələrək ölkəmizə bürünc medal qazandırıb.
96 kq çəkidə yarışan Xetaq Qazyumov isə titulunu qorumaq üçün döşəyə çıxıb. Son Avropa çempionatında bütün rəqiblərinə başağrısı olan güləşçimiz ötən il dünya kubokunun qızıl medalını da qazanıb. Sevindirici haldır ki, o, 2010-cu ilin ilk mötəbər turnirinə də uğurla başlayıb. Əvvəlcə Pekin-2008-in bürünc mükafatçısı İmants Lagodskisi (Latviya) yarışdan kənarlaşdırıb. Birinci hissədə 5:0 hesabı ilə rəqibinə qalib gələn Qazyumov ikinci hissədə Lagodskisi 4:0 hesabı ilə məğlub edib. İkinci qarşılaşmada həmyerlimiz Radoslav Baranla (Polşa) qurşaq tutub və parlaq qələbə qazanaraq finala vəsiqə əldə edib. Güləşçimiz finalda gürcü idmançısına qalib gələrək Avropa çempionu olub. Beləliklə, iki günün nəticəsinə əsasən, güləşçilərimiz 3 qızıl, 1 gümüş və 1 bürünc medal qazanıblar.

Paylaş:

Baxılıb: 1429 dəfə