Mançester Yunayted Yay Futbol Məktəbinin növbəti mərhələsinə start verilib

Bakı:

23 °C

78 %

3 m/s

Əlaqə

AZ RU EN

Ana səhifə / İdman / Mançester Yunayted Yay Futbol Məktəbinin növbəti mərhələsinə start verilib

Mançester Yunayted Yay Futbol Məktəbinin növbəti mərhələsinə start verilib

04.06.2015 [09:10]

Azərbaycanın ilk mobil operatoru və aparıcı mobil internet provayderi olan “Bakcell” şirkəti və Azərbaycan Futbol Federasiyaları Assosiasiyası (AFFA) üçüncü Mançester Yunayted Yay Futbol Məktəbi layihəsinin təlim-məşq toplanışlarına start verib. Şirkətdən verilən məlumatda qeyd olunur ki, yay futbol məktəbinin məqsədi paytaxt və bölgələrdə yaşayan 8-12 yaşlı uşaqlar arasında gənc istedadları aşkar etmək və onların futbol sahəsində inkişafına töhfə verməkdir. Məktəbə qəbul üçün Gəncə, Qax, Xaçmaz, Sumqayıt və Bakıda təşkil olunmuş seçimlərdə 965 uşaq iştirak edib. Seçim prosesi AFFA-nın Elit Məşq layihəsinin məşqçiləri və Mançester Yunayted Futbol Məktəbinin baş məşqçisi Mik Benet (Mick Bennett) tərəfindən həyata keçirilib. Seçimdən müvəffəqiyyətlə keçən 34 nəfər gənc iyunun 1-dən 5-dək Bakıda “Bayıl Arena” stadionunda təşkil olunan təlim-məşq toplanışlarında iştirak edirlər. Təlimlərə “Mançester Yunayted” klubunun Azərbaycana ezam olunmuş məşqçiləri Qarvey Luiz və Ollieuz Kristofer rəhbərlik edirlər.
“Üçüncü dəfədir ki, AFFA və “Mançester Yunayted” ilə birlikdə Mançester Yunayted Yay Futbol Məktəbini təşkil edirik. Bu il seçimlərdə iştirak edən uşaqların sayı ötən ildəkindən təxminən 300 nəfər artıqdır və bu sayın ildən-ilə artması layihənin uğurlu olmasından xəbər verir. Bu il seçilən uşaqlar arasında elələri var ki, onlar ikinci və hətta üçüncü dəfədir ki, seçimdə iştirak edir və müvəffəqiyyətlə növbəti mərhələyə keçirlər. Bu o deməkdir ki, insanlar seçim prosesinin şəffaflığına və məktəbin effektivliyinə etibar edirlər. Hazırda məktəbimizin məzunlarının 80 faizdən çoxu perspektivli klubları təmsil edir, digərləri isə müxtəlif maraqlı təkliflər alırlar. Onlardan biri bu il “U-13” Liqasında ən yaxşı oyunçu adına layiq görülüb, başqa bir iştirakçının isə “Fenerbahçe” klubunda çıxış edəcəyi gözlənilir. Azərbaycanlı uşaqların futbol sahəsindəki uğurları bizi sevindirir”, - deyə “Bakcell”in baş marketinq direktoru Mariya Toyçeva bildirib.
AFFA-nın baş katibi Elxan Məmmədov isə “Mançester Yunayted” kimi təkcə Avropada deyil, bütün dünyada tanınmış bir brendin Azərbaycanda olmasını çox müsbət hal kimi dəyərləndirib. “Bu layihə artıq üçüncü ildir ki, uğurla həyata keçirilir. Futbola həvəsi olan, yaşıdlarından öz istedadları ilə seçilən 30-dan artıq uşağın əvvəlcə Bakıda toplanışda olması, sonra onların arasından bir neçə nəfərin seçilərək İngiltərəyə - Mançester Yunayted Yay Futbol Məktəbinə göndərilməsi həmin uşaqların peşəkar futbol mühitinə doğru inamlı addım atmasına münbit şərait yaradıb. Bu layihədən bir müddət sonra Bakıda daimi fəaliyyət göstərən Mançester Yunayted Futbol Məktəbinin öz işinə başlamasını da yüksək qiymətləndiririk. İnanırıq ki, bu əməkdaşlıq və uğurlu layihələr sayəsində istedadlı uşaqların peşəkar futbolçu kimi yetişməsi istiqamətində müsbət nəticələr əldə edə biləcəyik”, - deyə AFFA-nın baş katibi vurğulayıb.
Səlim LOĞMANOĞLU

Paylaş:

Baxılıb: 1120 dəfə