“Alov Qoruyanlar”

Bakı:

26 °C

53 %

5 m/s

Əlaqə

AZ RU EN

Ana səhifə / İdman / “Alov Qoruyanlar”

“Alov Qoruyanlar”

22.05.2015 [09:25]

İlk Avropa Oyunlarının keçirilməsinə sayılı günlər qalıb. Hazırda ölkəmizdə bu idman yarışına ciddi hazırlıq işləri sürətlə davam edir və demək olar ki, dünya idman tarixində mühüm hadisə olacaq ilk Avropa Oyunlarına Azərbaycan tam hazırdır. İlk Avropa Oyunlarının Bakıda təşkili Azərbaycanın beynəlxalq nüfuzunun daha da artmasına, idman aləmində önəmli yer tutmasına şərait yaradacaq.
Sevindirici haldır ki, dünyanın diqqətini çəkən ilk Avropa Oyunlarını hazırda bütün ictimaiyyət nümayəndələri kimi gənclər, eləcə də, “Bakı-2015”in könüllüləri də səbirsizliklə gözləyirlər.
Ənənəmizə sadiq qalaraq “Yeni Azərbaycan” qəzetinin “Alov Qoruyanlar” adlı rubrikasında ilk Avropa Oyunlarında fəaliyyət göstərəcək növbəti könüllü gənclərimizi oxucularımıza təqdim edirik.
“İlk Avropa Oyunlarının Bakıda keçirilməsi böyük tarixi hadisədir və ölkəmizin böyük uğurudur”. Bunu qəzetimizə açıqlamasında Azərbaycan Dövlət Pedaqoji Universitetinin Pedaqogika və Psixologiya fakültəsinin tələbəsi Ayşən Osmanova deyib. O, birinci Avropa Oyunlarının, ilk növbədə, Azərbaycanda kütləvi idmanın təbliği baxımdan mühüm rol oynayacağını vurğulayıb: “Birinci Avropa Oyunları gənclərin idmana marağının artmasında da böyük rol oynayacaq. Eyni zamanda, bu Oyunların Azərbaycanda Olimpiya Oyunları səviyyəsində keçirilməsi dünyada ölkəmizin daha da tanınmasına gətirib çıxaracaq. Ölkəmizdə inşa olunmuş möhtəşəm yeni idman qurğuları gələcəkdə də Azərbaycanda insanların müstəqil şəkildə idmanla məşğul olması, idmançılarımızın təlim-məşq toplanışları və möhtəşəm yarışlar keçirmək üçün əhəmiyyətli olacaq. Eyni zamanda, bunlar Oyunlardan sonra da Azərbaycan xalqının rifahına xidmət edəcək”.
Ayşən Osmanova, həmçinin, “Bakı-2015”in könüllüləri ailəsinə qatıldığı üçün qürur hissi keçirdiyini də bildirib: “Mən çox sevinirəm ki, “Bakı-2015”in könüllüləri sırasına qatılmışam. Eşidəndə ki, bununla bağlı müsabiqə keçirilir, dərhal müsabiqələrə qatıldım və Oyunlarda ölkəmi təbliğ etmək şansı əldə etdim. Bu məni qürurlandırır, həm də sevindirir”.
“İlk Avropa Oyunlarının Azərbaycanda keçirilməsi bir gənc kimi məni hədsiz sevindirdi”. Bunu qəzetimizə açıqlamasında Bakı Dövlət Universitetinin I kurs tələbəsi Vahid Əmirli deyib. Onun sözlərinə görə, ilk Avropa Oyunlarının Azərbaycanda keçirilməsi böyük bir tarixi hadisədir və bu Oyunları hər bir gənc səbirsizliklə gözləyir: “Bu Oyunların ölkəmizdə keçirilməsinin əhəmiyyəti çox böyükdür. Biz gənclər bu Oyunları dəstəkləyirik və bu Oyunların ölkəmizə verə biləcəyi faydaları da yaxşı anlayırıq”.
Həmçinin, “Bakı-2015”in könüllüsü ilk Avropa Oyunları ərəfəsində bəzi dairələrin ölkəmizə qarşı “qara piar” kampaniyasına da münasibət bildirib: “Bu şər-böhtan, qarayaxma kampaniyaları ilə məşğul olanlar bu Oyunların ölkəmizə gətirə biləcəyi xeyirdən agahdırlar. Onlar yaxşı bilirlər ki, bu yarışma Azərbaycana ancaq xeyir verəcək. Ona görə də, dərhal hərəkətə keçib bu işi ləkələmək istəyirlər. Təbii ki, Azərbaycanın inkişafını istəməyən qüvvələr bu dəfə də məğlub olacaqlar. “Eurovision” musiqi yarışmasını yada salaq. O zamanlar da bu musiqi yarışmasının Azərbaycanda keçirilməsini istəməyən qüvvələr var idi. Nəticəsi nə oldu?! Azərbaycan yenə də uğura imza atdı. Bu dəfə də belə olacaq. Nə qədər çox çalışıb Avropa ölkələrinə özümüzü tanıtsaq, bu, bizim xeyrimizə olacaq”.
Vüsalə

Paylaş:

Baxılıb: 1910 dəfə