Birinci Avropa oyunlarının məşəli Ağcabədidə

Bakı:

25 °C

57 %

6 m/s

Əlaqə

AZ RU EN

Ana səhifə / İdman / Birinci Avropa oyunlarının məşəli Ağcabədidə

Birinci Avropa oyunlarının məşəli Ağcabədidə

13.05.2015 [10:25]

Birinci Avropa Oyunlarının məşəlinin növbəti ünvanı Aran Qarabağın son illərdə sürətlə inkişaf edən və gözəlləşən daha bir diyarı - Ağcabədi olub.
AZƏRTAC xəbər verir ki, mayın 10-da Ağcabədi şəhərindəki Heydər Əliyev adına parkın qarşısında məşəlin təntənəli qarşılanma mərasimi keçirilib.
Rayonun minlərlə sakininin alqış sədaları altında Yeni Azərbaycan Partiyası rayon təşkilatı Qadınlar Şurasının sədr müavini Radə Qafarova birinci Avropa Oyunlarının rəmzi qapısında məşəli qəbul etdikdən sonra 3,5 kilometr məsafədə yürüş başlanıb. Üzeyir Hacıbəyli və Heydər Əliyev prospektləri boyunca hərəkət edərək Heydər Əliyev adına mərkəzi meydana gələn məşəlçilər rayon sakinləri tərəfindən sevinc və hərarətlə qarşılanıb. Sonuncu yürüşçü - rayon gənclər və idman idarəsi rəisinin müavini Eldəniz Qənbərov səhnəyə qalxaraq, məşəli alovlandırıb. Oyunların burada yandırılan çırağını 1 nömrəli tam orta məktəbin şagirdi Minayə Əkbərova rayon ictimaiyyətinə təqdim edib. Çıraq Birinci Avropa Oyunlarının sonunadək rayonda qalacaq.
Mərasimdə aprelin 26-da Atəşgah məbədində birinci Avropa Oyunlarının məşəlinin alovlandırılması mərasiminin əks olunduğu videoçarx nümayiş etdirilib.
Yürüşdə iştirak edən sonuncu məşəlçi Eldəniz Qənbərov təəssüratlarını AZƏRTAC-ın müxbiri ilə bölüşərək deyib: “Çox həyəcanlıyam. Məşəli alovlandırmaq mənə nəsib olduğu üçün sevincimin həddi-hüdudu yoxdur. Birinci Avropa Oyunlarında Azərbaycan idmançılarına uğurlar arzulayıram. Qoy yarışlarda üç rəngli, ay-ulduzlu bayrağımız ucalsın, dövlət himnimiz səslənsin”.
Məşəl estafetini qarşılayan rayon sakini Mais İbrahimov yaşadığı anları belə ifadə edib: “Fotoqraf kimi indiyədək çox tədbirlərdə çəkilişlər aparmışam. Bugünkü coşqunu, insanların fərəh və sevincini sözlə ifadə etmək çətindir. Məşəl estafetinin tarixi anlarını kadrlara köçürdüyüm üçün özümü xoşbəxt sanıram”.
Ağcabədi şəhər 11 nömrəli tam orta məktəbin müəllimi Xanım Əliyeva isə deyib: “Biz fərəhli, unudulmaz bir gün yaşayırıq. Birinci Avropa Oyunlarının məşəli bizim rayona da gəlib çıxdı. Bu günün sevincini birgə yaşamaq üçün müəllim yoldaşlarım və şagirdlərimlə gəlmişəm. İnanıram ki, Alov estafeti, ilk dəfə ölkəmizdə keçiriləcək Avropa Oyunları şagirdlərin vətənpərvərlik hisslərini daha da artıracaq və onların yaddaşlarında uzun müddət qalacaq”.
Ağcabədi şəhər sakini Tofiq Zeynalov deyib ki, son zamanlar Ağcabədidə bir çox tədbirlər, musiqi festivalları və müsabiqələr, təntənəli mərasimlər keçirilir. Ancaq bu möhtəşəm tədbirin özünəməxsus yeri var. Birinci Avropa Oyunları sayəsində dünya ictimaiyyəti ölkəmizi daha yaxından tanıyacaq. Bütün bunlara görə Prezident İlham Əliyevə, Heydər Əliyev Fondunun prezidenti Mehriban Əliyevaya minnətdarıq.

Paylaş:

Baxılıb: 2092 dəfə