Altay Həsənov: Azərbaycanın gimnastika yığmasının əsas uğurları hələ irəlidədir

Bakı:

26 °C

54 %

1 m/s

Əlaqə

AZ RU EN

Ana səhifə / İdman / Altay Həsənov: Azərbaycanın gimnastika yığmasının əsas uğurları hələ irəlidədir

Altay Həsənov: Azərbaycanın gimnastika yığmasının əsas uğurları hələ irəlidədir

06.03.2014 [09:36]

“Hazırda Azərbaycanda gimnastika müasir və inkişaf etmiş infrastrukturu olan ən sevimli idman növlərindən biridir. Azərbaycanın gimnastika məktəbinin nailiyyətləri dünya idman ictimaiyyəti tərəfindən tanınıb və bütün bunlar ölkəmizin birinci xanımı Mehriban Əliyevanın Azərbaycan Gimnastika Federasiyasına rəhbərliyi sayəsində mümkün olub”. “Trend”in məlumatına görə, bunu “International Gymnast” jurnalına müsahibəsində Azərbaycan Gimnastika Federasiyasının vitse-prezidenti Altay Həsənov deyib.
Onun sözlərinə görə, Mehriban xanım Əliyevanın 2002-ci ildə Azərbaycan Gimnastika Federasiyasının prezidenti seçilməsi ilə ölkəmizdə həqiqətən də bu idman növünün yeni inkişaf mərhələsi başlayıb: “Məhz Mehriban xanım Əliyevanın sayəsində gimnastika ölkəmizdə böyük inkişaf və populyarlıq qazandı. Artıq 2003-cü ildə Bakıda bədii gimnastika üzrə ilk Dünya Kuboku keçirildi. Bakı 2005-ci ildə gimnastika üzrə dünya çempionatına ev sahibliyi etdi. 2007-2009-cu illərdə isə ölkəmizdə iki dəfə Avropa çempionatı keçirildi. 2014-cü ildə Azərbaycanda yeni Milli Gimnastika Arenasında yenidən gimnastika üzrə qitə birinciliyi təşkil ediləcək. İdmançılarımız da böyük uğurlar qazanırlar. Azərbaycan gimnastı Dinara Gimatova 2003-cü ildə Afina Olimpiya Oyunlarına ilk milli lisenziyanı qazandı. Aliyə Qarayeva isə 2007-ci ildə bədii gimnastika üzrə Avropa çempionu tituluna sahib çıxdı, dünya çempionatında isə qızlarımız komanda hesabında üçüncü oldular. Gimnastlarımız növbəti illərdə ölkəni Olimpiya Oyunlarında layiqincə təmsil ediblər, dünya və Avropa çempionatlarında, komanda hesabında və fərdi yarışlarda mükafatçılar sırasına daxil olublar”.
Azərbaycan Gimnastika Federasiyasının vitse-prezidenti onu da deyib ki, Azərbaycanda yerli bədii gimnastika məktəbinin yaradılmasını əsas uğur hesab edirik: “Bizim gənc və istedadlı qızlarımız artıq neçə ildir ki, Bakıda milli komandamızın baş məşqçisi, bolqarıstanlı mütəxəssis Mariana Vasilevanın rəhbərliyi altında məşq edirlər. Hazırda gənc məşqçilərin yeni nəsli yetişir. Bu nəsil yaxın keçmişdə Azərbaycanı beynəlxalq idman yarışlarında təmsil edən keçmiş gimnastlardır. Hazırda onlar işlərinin öhdəsindən layiqincə gəlirlər. Təkcə son 5 ildə yuniorlarımız Avropa çempionatlarında həmişə mükafatçılar sırasına daxil olublar. Bu, Azərbaycanda idman uğurlarının varislik sisteminin yaradılmasına parlaq sübutdur. Bu isə gələcək uğurların əsas açarıdır”.
Onun sözlərinə görə, Azərbaycanda gimnastikanın digər növləri də inkişaf edir. Belə ki, Şakir Şıxəliyev London Olimpiya Oyunlarında idman gimnastikası üzrə yarışlarda ölkəmizi təmsil edib: “Doğrudur, o, V.Belenkinin nailiyyətlərini təkrar edə bilmədi, lakin necə deyərlər, ən uzun yol ilk addımdan başlayır və bizim gimnastika məktəbimiz artıq bu addımı atıb. Müasir gimnastikanın tarixinə akrobatlarımız Ayla Əhmədova və Dilarə Sultanovanın da adları yazılıb. Qadınlardan ibarət bu cütlüyümüz 2009-cu ildə akrobatik gimnastika üzrə Avropa çempionatında qızıl medal qazanıb. Fəaliyyətini populyar “Günəş sirki”ndə (Cirque du Soleil) də qadınlardan ibarət üçlükdə davam etdirən A.Əhmədova 2013-cü ildə Beynəlxalq Gimnastika Federasiyasının (BGF) Atletlər Komissiyasında akrobatların nümayəndəsi seçilib. Ölkəmiz BGF-in İntizam Komissiyası və Şurasında təmsil olunub, Azərbaycan Gimnastika Federasiyasının baş katibi isə bu yaxınlarda Avropa Gimnastika İttifaqının vitse-prezidenti seçilib. İdman dünyasında tanınmaq böyük şeydir. Mehriban Əliyevanın rəhbərlik etdiyi federasiyamızın nəticələri hazırda bunlardan ibarətdir”.
Azərbaycan Prezidenti İlham Əliyevin rəhbərliyi ilə ölkəmizdə həyata keçirilən idman siyasətinin uğurlarından danışan natiq bildirib ki, hazırda Azərbaycanda idmançı olmaq sözün əsl mənasında nüfuzludur. Bu, hər şeydən əvvəl bədii gimnastikada nəzərə çarpır. Əgər Azərbaycan məşqçiləri və idmançıları yaxın keçmişdə xaricdə iş axtarmağa üstünlük verirdilərsə, hazırda digər ölkələrin atletləri və məşqçiləri Azərbaycana işləməyə gəlirlər.
Müsahibəsində gimnastika ilə bağlı bir sıra digər sualları da cavablandıran A.Həsənov sonda “İndi artıq təsdiq etmək olar ki, Azərbaycanda bədii gimnastika həqiqətən də sevilən idman növü oldu. Bəli, hələlik bizdə Korbut, Nemov və ya Belenki kimi belə parlaq adlar yoxdur, amma Bakı, Gəncə, Sumqayıt və başqa şəhərlərdə idmançılarımızı yaxşı tanıyır, onların çıxışlarını diqqətlə izləyir, onların uğurlarına səmimi qəlbdən sevinirlər. Əminəm ki, yığmamızın əsas uğurları hələ irəlidədir. Bizdə potensial var və biz hamımız ölkəmizin idman ictimaiyyətinin dəstəyini hiss edirik”, - deyib.

Paylaş:

Baxılıb: 1497 dəfə