Ümummilli lider Heydər Əliyevin xatirəsinə həsr olunmuş voleybol turniri başa çatdı

Bakı:

29 °C

44 %

3 m/s

Əlaqə

AZ RU EN

Ana səhifə / İdman / Ümummilli lider Heydər Əliyevin xatirəsinə həsr olunmuş voleybol turniri başa çatdı

Ümummilli lider Heydər Əliyevin xatirəsinə həsr olunmuş voleybol turniri başa çatdı

07.05.2013 [14:01]

“Yeni Azərbaycan”, “Səs”, “İki sahil” qəzetlərinin və Azərbaycan Voleybol Federasiyasının təşkilatçılığı ilə keçirilən yarışlarda final görüşləri keçirilib
“Yeni Azərbaycan”, “Səs”, “İki sahil” qəzetləri və Azərbaycan Voleybol Federasiyasının birgə təşkilatçılığı ilə keçirilən Ulu öndər Heydər Əliyevin anadan olmasının 90-cı ildönümünə həsr olunmuş voleybol yarışlarına yekun vurulub. Dünən keçirilən final matçlarında əvvəlcə yeniyetmə qızlar arasında yarışlarda qalib müəyyənləşib. “Azəryol” arenasında keçən turnirin final mərhələsində qızlar arasında komandalardan “Azəryol” və “İqtisadçı” komandaları qarşılaşıblar. Maraqlı keçən oyunda “Azəryol” komandası qələbə qazanaraq birinciliyi əldə edib. Yalnız finalda məğlub olan “İqtisadçı” komandasının yeniyetmə qızları isə ikincliklə kifayətləniblər. Üçüncü yeri isə “Nəqliyyatçı” komandası tutub.
Daha sonra isə media nümayəndələri və Yeni Azərbaycan Partiyasının Bakı şəhəri üzrə rayon təşkilatlarının komandaları arasında yarışların final görüşü baş tutub. Qeyd edək ki, media nümayəndələri və Yeni Azərbaycan Partiyasının Bakı şəhəri üzrə rayon təşkilatlarının komandaları arasında yarışlara 24 komanda qatılmışdı. YAP Yasamal rayon təşkilatının komandası və YAP Nərimanov rayon təşkilatının komanadası bütün rəqiblərini qabaqlayaraq finalda üz-üzə gəlmək hüququ qazanmışdılar. Bu oyuna qədər məğlubiyyətsiz irəliləyən YAP Yasamal rayon təşkilatının komandası bu görüşdə də 3-0 hesabı ilə qalib gələrək xatirə turnirinin qalibi adını qazanıb. 3-cü yer uğrunda keçirilən oyunu isə YAP Nizami rayon təşkilatı qələbə ilə başa vuraraq medalçılar sırasına düşə bilib.
Sonuncu final qarşılaşması isə daha böyük marağa səbəb olub. Belə ki, “böyük final” adlanan matçda peşəkar voleybolçular birincilik uğrunda mübarizə aparıblar. Həmin görüşdə “Aztelekom” komandası Azərbaycanın kişi voleybolçulardan ibarət yığma komandası ilə qarşılaşıb.
Daha sonra qaliblərin mükafatlandırılması mərasimi keçirilib. Mərasimdə çıxış edən Yeni Azərbaycan Partiyasının Sədr müavini-İcra katibi, millət vəkili Əli Əhmədov qalibləri qələbə münasibətilə təbrik edib. Bu günlərdə Ümummilli liderimiz Heydər Əliyevin 90 illik yubileyi münasibətilə ölkəmizin hər yerində müxtəlif tədbirlərin keçirildiyini deyən Əli Əhmədov bildirib ki, bütün bunlar böyük şəxsiyyətə olan dərin hörmət və ehtiramın ifadəsidir. “Heydər Əliyev siyasəti bu gün Azərbaycanda uğurla həyata keçirilir və ölkəmizin inkişafına, tərəqqisinə xidmət edir. Hər bir Azərbaycan vətəndaşı bu siyasətin bəhrəsini öz həyatlarında hiss edirlər. Ona görə də, Heydər Əliyev siyasəti Azərbaycanı inkişafa aparan yoldur və bu siyasət ölkəmizin güclənməsinə, qüdrətlənməsinə xidmət edir. Bu mənada Ümummilli liderimizin 90 illik yubileyinə həsr olunmuş tədbirlər ölkə vətəndaşlarının öz milli liderinə olan dərin ehtiramının ifadəsidir”, - deyə YAP Sədrinin müavini vurğulayıb.
“Yeni Azərbaycan”, “Səs” və “İki sahil” qəzetlərinin keçirdiyi voleybol turnirini təqdir edən Əli Əhmədov bu yarışın maraqlı mübarizə şəraitində keçdiyini deyib. O, qalib komandalara uğurlar arzulayıb.
Azərbaycan Voleybol Federasiyasının vitse-prezidenti Vaqif Əliyev Ulu öndər Heydər Əliyevin xatirəsinə həsr olunmuş turnir keçirməyin böyük fəxr və məsuliyyətli olduğunu deyib. Onun sözlərinə görə, Azərbaycan Voleybol Federasiyası həmişə belə turnirlərə dəstək verməyə hazırdır.
Sonda Ümummilli lider Heydər Əliyevə həsr olunmuş “Əbədiyyət heykəli” video-çarxı nümayiş olunub.
Nardar BAYRAMLI

Paylaş:

Baxılıb: 1936 dəfə