Prezident İlham Əliyev MDB-nin üzvü olan ölkələrin Dövlət Başçıları Şurasının qeyri-rəsmi iclasında iştirak edib

Bakı:

26 °C

48 %

3 m/s

AZ RU EN

Ana səhifə / Gündəm / Prezident İlham Əliyev MDB-nin üzvü olan ölkələrin Dövlət Başçıları Şurasının qeyri-rəsmi iclasında iştirak edib

Prezident İlham Əliyev MDB-nin üzvü olan ölkələrin Dövlət Başçıları Şurasının qeyri-rəsmi iclasında iştirak edib

17.05.2012 [00:14]

Xəbər verdiyimiz kimi, mayın 15-də Moskvada MDB Dövlət Başçıları Şurasının qeyri-rəsmi iclası keçirilib. Azərbaycan Respublikasının Prezidenti İlham Əliyev iclasda iştirak edib.
Rusiya Prezidenti Vladimir Putin Azərbaycan Prezidenti İlham Əliyevi və iclasda iştirak edən digər dövlət başçılarını qarşılayıb.
İclası açan Rusiya Federasiyasının Prezidenti Vladimir Putin Birliyin üzvü olan ölkələrin dövlət başçılarına dəvəti qəbul etdikləri üçün təşəkkürünü bildirib, qeyd edib ki, Rusiya MDB ölkələri ilə hərtərəfli əlaqələrə çox böyük önəm verir.
MDB-də sədrlik edən Türkmənistan dövlətinin başçısı Qurbanqulu Berdiməhəmmədov isə çıxışında Birlik məkanında müxtəlif sahələrdə əməkdaşlığın sürətləndirilməsinin vacibliyini vurğulayıb.
İclasda MDB çərçivəsində inteqrasiya proseslərinin inkişafına dair fikir mübadiləsi aparılıb.
Sonra MDB dövlət başçılarının qeyri-rəsmi naharı olub. Azərbaycan Prezidenti İlham Əliyev naharda iştirak edib.
* * *
Mayın 15-də Moskvada Azərbaycan Respublikasının Prezidenti İlham Əliyevin və Moldova Respublikasının Prezidenti Nikolaye Timoftinin görüşü olub.
Əlaqələrimizin müxtəlif sahələrdə inkişafından məmnunluğun ifadə olunduğu görüşdə dövlət başçıları Azərbaycan ilə Moldova arasında enerji, sərmayələrin yatırılması və digər sahələrdə əməkdaşlığın inkişafı üçün böyük potensialın olduğunu qeyd ediblər.
Görüşdə ikitərəfli münasibətlərin bundan sonra da uğurla inkişaf edəcəyinə əminlik ifadə olunub.
* * *
Mayın 15-də Moskvada Azərbaycan Respublikasının Prezidenti İlham Əliyevin və Qırğız Respublikasının Prezidenti Almazbek Atambayevin görüşü olub.
Görüşdə ölkələrimiz arasında ikitərəfli əlaqələrin müxtəlif istiqamətlərdə inkişafından, eləcə də hökumətlərarası komissiyanın fəaliyyətindən məmnunluq ifadə olunub. Qarşılıqlı səfərlərin münasibətlərimizin inkişafına böyük töhfə verdiyi vurğulanıb. İkitərəfli faydalı əməkdaşlığın daha da inkişaf etdirilməsi üçün yaxşı imkanların mövcud olduğu bildirilib.
* * *
Moskvada MDB Dövlət Başçıları Şurasının qeyri-rəsmi iclasında iştirak edən Azərbaycan Respublikasının Prezidenti İlham Əliyevin mayın 15-də Rusiyaya işgüzar səfəri başa çatıb. Moskvanın Vnukovo-2 Beynəlxalq Aeroportunda Azərbaycan Prezidentini Rusiyanın yüksək vəzifəli dövlət və hökumət nümayəndələri yola salıblar.
Mayın 16-da Azərbaycan Prezidenti İlham Əliyev Bakıya qayıdıb.

Paylaş:

Baxılıb: 1032 dəfə