Fələstin Dövlətinin Prezidenti Mahmud Abbasın Azərbaycan Respublikasına rəsmi səfəri başa çatıb

Bakı:

21 °C

59 %

1 m/s

Əlaqə

AZ RU EN

Ana səhifə / Gündəm / Fələstin Dövlətinin Prezidenti Mahmud Abbasın Azərbaycan Respublikasına rəsmi səfəri başa çatıb

Fələstin Dövlətinin Prezidenti Mahmud Abbasın Azərbaycan Respublikasına rəsmi səfəri başa çatıb

30.06.2011 [10:44]

Fələstin Dövlətinin Prezidenti Mahmud Abbas Heydər Əliyev Fondunda olub
ölkəmizdə rəsmi səfərdə olan Fələstin Dövlətinin Prezidenti Mahmud Abbas dünən Fəxri Xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə əklil qoyub. Görkəmli oftalmoloq alim, akademik Zərifə xanım Əliyevanın məzarı üstünə də güllər düzülüb.
Fələstin Dövlətinin Prezidenti Mahmud Abbas Azərbaycanın azadlığı və bütövlüyü uğrunda həlak olan qəhrəman oğul və qızlarımızın uyuduğu Şəhidlər Xiyabanını da ziyarət edib.

* * *

Fələstin Dövlətinin Prezidenti Mahmud Abbas dünən Heydər Əliyev Fondunda olub. Fələstin Dövlətinin başçısını Azərbaycan Prezidenti İlham Əliyev və xanımı Mehriban Əliyeva qarşılayıblar.
Prezident İlham Əliyev və xanımı Mehriban Əliyeva ali qonağa Azərbaycan xalqının ümummilli liderinin xatirəsinə yaradılmış Fondun məqsədi və fəaliyyəti barədə məlumat veriblər.
Bildirilib ki, Fond ümummilli liderin zəngin irsini öyrənir və təbliğ edir, müxtəlif sosial-iqtisadi, humanitar layihələr həyata keçirməklə Azərbaycanın tərəqqisinə, mədəniyyətinin inkişafına və tarixinin öyrənilməsinə kömək göstərir.
Prezident Mahmud Abbas Ulu öndərin şəxsi arxivindən götürülmüş və Onun fəaliyyətinin ayrı-ayrı dövrlərinə aid fotoşəkillərlə, habelə müxtəlif eksponatlarla tanış olub.
Fondla tanışlıq zamanı Fələstin Dövlətinin Prezidentinə məlumat verilib ki, Ulu öndərin hakimiyyətdə olduğu dövr Azərbaycan tarixinin ən şərəfli səhifələrindən biridir. Bu gün beynəlxalq birlik tərəfindən ölkəmizin misilsiz uğurları kimi qəbul edilən sosial-iqtisadi inkişaf, əldə olunan nailiyyətlər məhz ümummilli liderin fəaliyyətinin bəhrələridir.
Ali qonaq fenomen şəxsiyyət Heydər Əliyevin həyatının ən müxtəlif məqamlarını əks etdirən və Azərbaycan tarixinin bütöv bir dövrü barədə geniş təsəvvür yaradan çoxlu sənədlərlə, dünyanın tanınmış siyasi xadimlərinin bəxş etdikləri hədiyyələrlə, Ulu öndərə həsr olunmuş kitablarla, nüfuzlu elm, mədəniyyət və incəsənət xadimlərinin müstəqil Azərbaycan dövlətinin qurucusu haqqında fikirləri ilə tanış olub, xarici ölkələrin liderləri ilə görüşlərdə çəkilmiş şəkillərə maraqla baxıb.
Prezident Mahmud Abbas Fondla tanışlıqdan sonra Xatirə kitabına ürək sözlərini yazıb.
Heydər Əliyev Fondunun prezidenti Mehriban xanım Əliyeva Fələstin Dövlətinin Prezidentinə xatirə hədiyyəsi və Fondun fəaliyyətindən bəhs edən kitab təqdim edib.
Ali qonaq Fonddan zəngin təəssüratla ayrılıb.

* * *

Azərbaycan Respublikasının Baş naziri Artur Rasizadə və ölkəmizdə rəsmi səfərdə olan Fələstin Dövlətinin Prezidenti Mahmud Abbas birgə nahar ediblər.

* * *

Dünən Bakıda Fələstin Dövlətinin Azərbaycandakı səfirliyinin rəsmi açılışı olub. Mərasimdə Azərbaycanda rəsmi səfərdə olan Fələstin Dövlətinin Prezidenti Mahmud Abbas iştirak edib.
Fələstin Dövlətinin başçısı səfirliyin rəmzi açılışını bildirən lenti kəsib.
Prezident Mahmud Abbas səfirliyin əməkdaşları ilə görüşüb.
Baş nazirin müavini Elçin Əfəndiyev Fələstin Dövlətinin ölkəmizdə səfirliyinin açılmasını xalqlarımız arasında dostluq və əməkdaşlığın daha da inkişafına şərait yaradacağını bildirib.
Prezident Mahmud Abbas Bakıda Fələstin səfirliyi üçün binanın verilməsinə görə Azərbaycan dövlətinə təşəkkürünü bildirib. Fələstin Dövlətinin başçısı məhz bu amilin ölkələrimiz arasında mövcud əlaqələrin inkişafının daha bir göstəricisi olduğunu vurğulayıb.
ölkəmizə ilk səfərindən məmnun qaldığını bildirən ali qonaq Azərbaycan xalqının qonaqpərvərliyini yüksək qiymətləndirib. Xalqlarımız arasında qədim tarixi əlaqələrin mövcudluğundan danışan Prezident Mahmud Abbas Azərbaycan ilə Fələstin arasında bir çox sahələrdə yeni əməkdaşlıq imkanlarının olduğunu qeyd edib. Fələstin Dövlətinin başçısı gələcəkdə sosial-iqtisadi sahədə əməkdaşlığın daha da inkişaf etdirilməsinin vacibliyini vurğulayıb.

* * *

Fələstin Dövlətinin Prezidenti Mahmud Abbasın Azərbaycan Respublikasına rəsmi səfəri dünən başa çatıb.

Paylaş:

Baxılıb: 1101 dəfə