Bakı Tennis Akademiyasının mərkəzi kortu istifadəyə verilib

Bakı:

24 °C

88 %

2 m/s

Əlaqə

AZ RU EN

Ana səhifə / Gündəm / Bakı Tennis Akademiyasının mərkəzi kortu istifadəyə verilib

Bakı Tennis Akademiyasının mərkəzi kortu istifadəyə verilib

30.06.2011 [10:42]

Azərbaycan Respublikasının Prezidenti İlham Əliyev açılış mərasimində iştirak edib
Dünən Azərbaycan Respublikasının Prezidenti İlham Əliyev və xanımı Mehriban Əliyeva Bakı Tennis Akademiyasının mərkəzi kortunun açılışında iştirak ediblər.
İnşaatçılar və Tennis Akademiyasının əməkdaşları dövlətimizin başçısını və xanımını hərarətlə qarşılayıblar.
Mehriban xanım Əliyevaya gül dəstəsi təqdim olunub.
Prezident İlham Əliyev mərkəzi kortun açılışını bildirən rəmzi lenti kəsib.
Azərbaycan Tennis Federasiyasının prezidenti, Milli Məclisin sədri Oqtay Əsədov dövlətimizin başçısına məlumat verib ki, tikintisinə ötən ilin fevralında başlanılan və 5500 kvadratmetr ərazini əhatə edən mərkəzi kortda tennislə yanaşı, voleybol, həndbol, mini futbol yarışlarının keçirilməsi, eləcə də, konsert proqramlarının təşkil edilməsi üçün hər cür şərait yaradılıb.
Böyük zövq və ustalıqla qurulan mərkəzi kortda beynəlxalq yarışların təşkili, o cümlədən, yeniyetmə və gənc idmançıların tennislə məşğul olmaları üçün bütün imkanlar var.
Qeyd edilib ki, 3 min tamaşaçı yeri olan mərkəzi kortun tikintisi zamanı müasir materiallardan, kompakt laminatlardan istifadə olunub.
Mərkəzi kortla tanışlıq zamanı gənc tennisçilərin oyununu izləyən Prezident İlham Əliyev və xanımı Mehriban Əliyeva idmançılarla görüşərək söhbət ediblər. Bildirilib ki, Tennis Akademiyasına maraq böyükdür. Bu idman ocağına müraciət edənlərin sayı getdikcə çoxalır. Artıq burada beynəlxalq miqyaslı yarışlar da təşkil olunur. Bu il Bakı Tennis Akademiyasında yeniyetmə və gənclər arasında Avropa tennis turniri keçirilib. Bununla yanaşı, Heydər Əliyev Fondunun dəstəyi ilə iyunun 16-dan 24-dək qadınlar arasında keçirilən “Baku Cup” beynəlxalq turniri də uğurla başa çatıb.
Sonra Prezident İlham Əliyev və xanımı Mehriban Əliyeva Bakı Tennis Akademiyasının trenajor zalı ilə tanış olublar. Bildirilib ki, burada idmançıların təlim-məşq toplanışlarına hazırlaşmaları, ümumiyyətlə idmanla məşğul olmaları üçün bütün zəruri avadanlıq və idman qurğuları quraşdırılıb.
Dövlətimizin başçısı turnikdə dartınıb.
Dövlətimizin başçısı və xanımı Bakı Tennis Akademiyasındakı üzgüçülük hovuzunda yaradılan şəraitlə də tanış olublar. Bildirilib ki, hovuzun uzunluğu 25, eni 16 metrdir. Bundan əlavə, Tennis Akademiyasında aerobika bölməsi və SPA mərkəzi də idmançıların istifadəsinə verilib.
Bildirilib ki, ərazidə abadlıq işləri aparılıb, yaşıllıq zolağı genişləndirilib.
Prezident İlham Əliyev inşaatçıları və Tennis Akademiyasının kollektivini təbrik edib.
Dövlət başçısı İlham Əliyev söyləyib ki, Azərbaycanda idmanın bütün növləri inkişaf edir: “Ancaq idmanın tennis növünün xüsusiyyəti ondan ibarətdir ki, dünya miqyasında çox böyük marağa layiq olan bir idman növüdür. Beynəlxalq yarışlar, müxtəlif ölkələrdə keçirilən yarışlar geniş auditoriyaya malikdir. Milyonlarla insan bu yarışlara baxır”.
Sonda xatirə şəkli çəkdirilib.

Paylaş:

Baxılıb: 1247 dəfə