Dostluq, mehribanlıq, barışıq və mərhəmət bayramı

Bakı:

25 °C

71 %

15 m/s

Əlaqə

AZ RU EN

Ana səhifə / Gündəm / Dostluq, mehribanlıq, barışıq və mərhəmət bayramı - NOVRUZ

Dostluq, mehribanlıq, barışıq və mərhəmət bayramı - NOVRUZ

26.03.2010 [16:36]

Azərbaycan xalqı növbəti dəfə Novruz bayramını qeyd edir. Məlumat üçün bildirək ki, Novruz Şimal yarımkürəsində astronomik yazın başlandığı, gecə-gündüz bərabərliyi günündə (martın 20-si, 21-i və ya 22-sində) keçirilir. Bir sıra xalqlar yaz fəslinin gəlməsini təbiətin canlanması ilə bağlayır, bu münasibətlə şənliklər keçirir, onu yeni ilin başlanğıcı kimi bayram edirlər. Novruzun Azərbaycan dövlətinin və xalqının tarixində isə xüsusi bir yeri var. Belə ki, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın Azərbaycan mədəniyyətinin beynəlxalq aləmdə təbliği istiqamətində yorulmadan apardığı məqsədyönlü iş nəticəsində 2009-cu il sentyabrın 30-da Novruz YUNESKO-nun Qeyri-maddi mədəni irs siyahısına salınıb. Bu yaxınlarda isə BMT Baş Məclisinin 64-cü sessiyasının iclasında bütün dünyada martın 21-i “Beynəlxalq Novruz Günü” elan edilib.
Xalqımızın ən əziz bayramı olan Novruzun beynəlxalq status qazanması hər bir azərbaycanlının qəlbində sonsuz sevinc və qürur hissi doğurub. çünki bu, həm də xalqımızın qədim tarixə söykənən bayramına yeni həyatın verilməsi deməkdir. Prezident İlham Əliyevin Novruz bayramı münasibətilə Azərbaycan xalqına müraciətində qeyd edildiyi kimi, xalqımız min illər ərzində təşəkkül tapmış ənənələrə sadiq qalaraq hər il Novruz gününü təntənə ilə bayram edir. Təbiətlə insanın sarsılmaz vəhdətinə dair qədim təsəvvürləri əks etdirən Novruz bayramı insanlarımızın yaddaşına əbədi həkk olunub. Ulu əcdadlarımızın indiki nəsillərə misilsiz ərməğanı olan Novruz adət-ənənələrinin günümüzədək layiqincə yaşadılması Azərbaycan xalqının çoxəsrlik tariximiz qarşısında müstəsna xidmətidir. Yüksək mənəviyyat xəzinəsi sayılan Bahar bayramı milli-mədəni sərvətlərimizin zənginliyini dolğun ifadə edir. O böyük mənəvi gücə malik olub, insanlar arasında qarşılıqlı dostluq, səmimiyyət, qayğıkeşlik və qardaşlıq duyğularını gücləndirir, cəmiyyətdə əmin-amanlığın və xoş münasibətlərin bərqərar olmasına zəmin yaradır. Sürətlə dəyişən dünyamızda qloballaşma proseslərinin geniş vüsət aldığı bir zamanda Novruz bayramı daşıdığı bütün məna və rəmzləri ilə xalqımızın tarixi-mədəni irsə son dərəcə bağlı olduğunu parlaq nümayiş etdirir.
Dövlət başçısının müraciətində ən ali keyfiyyətləri özündə cəmləşdirən bayram kimi Novruzun YUNESKO tərəfindən bəşəriyyətin mədəni irs nümunələri siyahısına daxil edilməsinin təqdirəlayiq hal olduğu bildirilir. Beləliklə, yuxarıda da qeyd etdiyimiz kimi, ötən il Azərbaycan Prezidenti İlham Əliyevin və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın yüksək diqqət və qayğısı sayəsində Azərbaycan mədəniyyətinin tarixinə daha bir parlaq səhifə yazılıb. YUNESKO-nun Qeyri maddi-mədəni irsin qorunması üzrə Komitəsinin ötən ilin sentyabrın 30-da Birləşmiş Ərəb Əmirliklərinin Abu-Dabi şəhərində keçirilən 4-cü sessiyasında Azərbaycanın aşıq sənəti və Novruz bayramı YUNESKO-nun Qeyri-maddi mədəni irs siyahısına daxil edilib. Bu uğur Azərbaycan Prezidenti İlham Əliyevin apardığı məqsədyönlü siyasətin və xalqımızın mədəniyyətinə göstərdiyi yüksək qayğısının nəticəsidir. Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın Azərbaycanın qeyri-maddi mədəni irsinin, xüsusilə, muğam və aşıq sənətinin, milli adət-ənənələrimizin dünyada tanıdılması və təbliği istiqamətində gördüyü işlər isə bu uğurların qazanılmasında mühüm rol oynayıb. Bu uğur eyni zamanda qədim el sənətimizin, maddi və mənəvi sərvətlərimizin mühafizəsinin əmin əllərdə olduğunu bir daha təsdiqləyir. Artıq Azərbaycanın mədəniyyətinin dünyanın ən mötəbər qurumlarından biri olan YUNESKO-nun siyahısında təsdiq olunmuş yeri var və bu, gələcək nəsillər üçün əvəzolunmaz bir töhfədir.
Qeyd edək ki, “Muğam aləmi” Beynəlxalq festivalında iştirak etmək üçün ötən il ölkəmizdə səfərdə olan YUNESKO-nun sabiq Baş direktoru Koişiro Matsuura da Azərbaycan dövlətinin bu sahəyə xüsusi diqqət yetirdiyindən məmnunluqla danışıb: “Azərbaycana səfərlərim zamanı mən bir daha şahid oldum ki, Prezident İlham Əliyev və Mehriban xanım Əliyeva qeyri-maddi mədəni irsin qorunmasına xüsusi diqqət yetirirlər. Azərbaycan xalqının mənəvi dəyərlərinin yaşanmasına böyük qayğı göstərirlər. Mən buna görə, Prezident İlham Əliyevə və birinci xanım Mehriban Əliyevaya öz dərin minnətdarlığımı bildirirəm. Mən dəfələrlə ölkənizə səfər etdikdə sizin zəngin mədəniyyətinizin şahidi olmuşam, burada musiqinizi dinləmişəm, rəqslərinizi görmüşəm. Bütün bunlar qeyri-maddi mədəni irsin tərkib hissələridir”.

Paylaş:

Baxılıb: 1349 dəfə