Prezident İlham Əliyev metronun "28 May" stansiyasının ikinci çıxışının açılışında iştirak edib

Bakı:

28 °C

60 %

14 m/s

Əlaqə

AZ RU EN

Ana səhifə / Gündəm / Prezident İlham Əliyev metronun "28 May" stansiyasının ikinci çıxışının açılışında iştirak edib

Prezident İlham Əliyev metronun "28 May" stansiyasının ikinci çıxışının açılışında iştirak edib

31.12.2009 [02:02]

Dünən Salatın Əsgərova küçəsi və Azadlıq prospektinin kəsişməsində Bakı metrosunun “28 May” stansiyasının ikinci çıxışı istifadəyə verilib. Azərbaycan Respublikasının Prezidenti İlham Əliyev mərasimdə iştirak edib.
Dövlətimizin başçısı rəmzi açılışı bildirən qırmızı lenti kəsib.
Prezident İlham Əliyev Bakı metrosu xətlərinin perspektiv inkişaf sxemini və metropolitenin texnoloji korpusunu əks etdirən stendlərlə tanış olub.
Bakı Metropoliteninin rəisi Tağı Əhmədov metronun “28 May” stansiyasının strukturu və görülən işlər barədə məlumat verib.
Bildirilib ki, “28 May” stansiyasının ikinci çıxışı kompleksinə müasir memarlıq üslubunda inşa olunmuş vestibül, sərnişinləri buradan piyada tunelinə və əksinə daşıyan üç eskalator, həmçinin yeraltı, piyada keçidi daxildir. Tikinti işlərini “Azərmetrotuneltikinti” Açıq Səhmdar Cəmiyyəti həyata keçirib. Layihənin əsas məqsədi “Xətai”-”Azadlıq prospekti” xəttini “İçərişəhər”-”Həzi Aslanov” xəttindən ayırmaqla hər iki marşrutun sərbəst istismarını təşkil etməkdir.
Qeyd olunub ki, bu vestibül Bakı Metropolitenində ən geniş və müasir avadanlıqla təchiz olunan ilk vestibüldür. Vestibülün girişində sərnişinlər üçün elektron məlumat bazası yerləşdirilib. Burada sərnişinlər Azərbaycan, rus və ingilis dillərində stansiyaların hərəkət xətti barədə məlumat əldə edə bilərlər. Keçidin çıxışında Bakı Metropolitenində ilk dəfə olaraq sərnişinləri sayan və buradan girişin qarşısını alan xüsusi turniketlər quraşdırılıb. Vestibülün memarlıq tərtibatı “Bakıdövlətlayihə” İnstitutu tərəfindən hazırlanıb.
Prezident İlham Əliyev eskalatorla yeni keçidə enib.
Dövlətimizin başçısına məlumat verilib ki, keçid 40 metr dərinlikdə yerləşir, “28 May” stansiyasına qədər piyada tunelinin ümumi uzunluğu isə 165 metrdir. Sərnişinlər tunel vasitəsilə “28 May” stansiyasından başqa, metronun “Cəfər Cabbarlı” stansiyasına da sərbəst gedə bilərlər. Burada istiqamətləndirici işarələr və stansiyanın yaxınlığında yerləşən mühüm inzibati bina və tikililərin adları göstərilib. Piyada tunelində təhlükəsizlik kameraları da quraşdırılıb.
Dövlətimizin başçısına məlumat verilib ki, hazırda metronun ikinci çıxışı olmayan digər stansiyalarda da bu istiqamətdə əsaslı işlər görülür. Artıq “Elmlər Akademiyası” stansiyasının ikinci çıxışının layihəsi hazırdır və tikintinin 2010-cu ildə başlanması nəzərdə tutulub. Dərində yerləşən “Xətai”, “İçərişəhər”, “Sahil” və “Nizami” stansiyalarının layihələndirilməsi də yaxın gələcəkdə həyata keçiriləcək.
Yeni keçidi gəzən dövlətimizin başçısı görülən işləri yüksək qiymətləndirib, tövsiyə və tapşırıqlarını verib.

Paylaş:

Baxılıb: 1446 dəfə