Azərbaycan hökumətinin atdığı addımlar yüksək qiymətləndirilib

Bakı:

20 °C

73 %

2 m/s

Əlaqə

AZ RU EN

Ana səhifə / Gündəm / Azərbaycan hökumətinin atdığı addımlar yüksək qiymətləndirilib

Azərbaycan hökumətinin atdığı addımlar yüksək qiymətləndirilib

14.08.2009 [14:37]

BMT-nin İrqi ayrı-seçkiliyin ləğv edilməsi üzrə Komitəsinin Cenevrədə keçirilmiş 75-ci sessiyası çərçivəsində avqustun 11-12-də “İrqi ayrı-seçkiliyin bütün formalarının ləğv edilməsi haqqında” Beynəlxalq Konvensiya üzrə Azərbaycan Respublikasının beşinci və altıncı dövri məruzəsinə baxılıb. Xarici İşlər Nazirliyinin mətbuat xidmətindən bildiriblər ki, xarici işlər nazirinin müavini X.Xələfovun başçılıq etdiyi nümayəndə heyəti məruzənin təqdimatında və müzakirəsində iştirak edib.
Tədbirdə ölkəmizdə insan hüquqlarının və əsas azadlıqlarının təmin olunması üçün yaradılmış hüquqi əsaslar, insan hüquqlarının və əsas azadlıqlarının qorunmasına və təşviqinin möhkəmləndirilməsinə yönəldilmiş səylər barədə ətraflı məlumat verilib, 2009-cu il martın 18-də keçirilmiş referendumda Azərbaycan Konstitusiyasına edilmiş əlavələrin insan hüquqları və azadlıqlarının daha da möhkəmləndirilməsi və inkişafı baxımından əhəmiyyəti vurğulanıb.
Azərbaycan hökumətinin irqi ayrı-seçkiliyə yol verilməməsi, milli azlıqların hüquqlarının təminatı sahəsində öhdəliklərin yerinə yetirilməsi üzrə gördüyü işlər və əldə olunmuş uğurlar Komitə üzvlərinin diqqətinə çatdırılıb. Eyni zamanda, dözümlülüyün təşviq və təmin edilməsi, əcnəbilərin və vətəndaşlığı olmayan şəxslərin hüquqlarının qorunması, gender bərabərliyinin möhkəmləndirilməsi, korrupsiyaya və insan alverinə qarşı mübarizə sahəsində görülən işlər, eləcə də Heydər Əliyev Fondu tərəfindən mədəniyyətlərarası və dinlərarası dialoqun təşviqi ilə bağlı həyata keçirilən tədbirlər, proqram və layihələr, ölkənin sosial-iqtisadi inkişaf göstəriciləri barədə geniş məlumat verilib.
Azərbaycanın müstəqilliyini bərpa etdikdən sonra qarşılaşdığı çətinliklər və problemlərdən danışılıb, Ermənistanın Azərbaycana qarşı davam edən təcavüzü, onun ağır nəticələri və Azərbaycan hökumətinin qaçqınların və məcburi köçkünlərin sosial vəziyyətinin yaxşılaşdırılması istiqamətində həyata keçirdiyi tədbirlər xüsusi qeyd edilib.
Daha sonra, nümayəndə heyətinin üzvləri Komitənin ekspertlərinin məruzə ilə bağlı suallarını cavablandırıb, qaldırılan məsələlərlə əlaqədar Azərbaycanda görülmüş işlərin və davamlı surətdə göstərilən səylərin mahiyyəti və nəticələri haqqında ətraflı şərhlər veriblər.
Komitə üzvləri çıxış edərək, Azərbaycanın tədbirdə yüksək səviyyədə nümayəndə heyəti ilə təmsil olunmasını, hesabatların mütəmadi sürətdə Komitəyə təqdim edilməsini xüsusi vurğulayıblar.
Azərbaycan hökumətinin “İrqi ayrı-seçkiliyn bütün formalarının ləğv edilməsi haqqında” Beynəlxalq Konvensiya üzrə götürdüyü öhdəliklərin yerinə yetirilməsinə ciddi yanaşdığı, insan hüquqları sahəsində bütün əsas beynəlxalq sənədləri ratifikasiya etdiyi, ölkədə insan hüquqlarının qorunmasına dair Milli Fəaliyyət Planının qəbul olunduğu, insan alverinə qarşı mübarizənin gücləndirildiyi, məhkəmə sisteminin müstəqilliyinin artırıldığı, qaçqınların, məcburi köçkünlərin və miqrantların vəziyyətinin yaxşılaşdırılması üçün mühüm işlər görüldüyü, milli azlıqların dilinin, mədəniyyətinin və adət-ənənələrinin qorunması üçün ardıcıl tədbirlərin həyata keçirildiyi Komitə üzvləri tərəfindən yüksək qiymətləndirilib.
Müzakirələr interaktiv dialoq formasında davam edib, Azərbaycan nümayəndə heyəti başçısının yekun çıxışı ilə başa çatıb.

Paylaş:

Baxılıb: 1482 dəfə