Sumqayıtda ümumxalq səsverməsi yüksək fəallıqla müşayiət olunub

Bakı:

8 °C

76 %

10 m/s

Əlaqə

AZ RU EN

Ana səhifə / Gündəm / Sumqayıtda ümumxalq səsverməsi yüksək fəallıqla müşayiət olunub

Sumqayıtda ümumxalq səsverməsi yüksək fəallıqla müşayiət olunub

19.03.2009 [11:51]

Dünən Azərbaycan Konstitusiyasına əlavə və dəyişikliklərlə bağlı ümumxalq səsverməsi-referendum keçirilib. Böyük seçici aktivliyi ilə müşahidə olunan referendum yüksək demokratik prinsiplər əsasında baş tutub. Azad, ədalətli, şəffaf şəkildə keçirilən ümumxalq səsverməsinə çıxarılan məsələlərin xalqın sifarişi ilə gündəmə gəldiyini nəzərə alsaq, insanların seçki günü səhər tezdən məntəqələrə axışaraq öz həyat və gələcəyinin formalaşdırılmasında müstəsna rola malik olan maddələrə səs verməsi olduqca təbii qarşılanmalıdır. Xatırladaq ki, dekabrın 26-da Azərbaycan Respublikasının Milli Məclisi tərəfindən təsdiq olunan Konstitusiyaya əlavə və dəyişikliklər layihəsində ana qanunvericiliyimizin 29 maddəsində 41 əlavə və dəyişiklik nəzərdə tutulub. Səsvermənin keçirilmə şəraitini izləmək üçün biz də seçki məntəqələrində olduq.
Sumqayıt şəhər 43 saylı II Seçki Dairəsi ərazisində yerləşən 10 saylı seçki məntəqəsində proses olduqca şəffaf şəkildə irəliləyib. Məntəqədə vətəndaşlara azad şəkildə səs vermək üçün hər bir şərait yaradılıb. Məntəqənin sədri Maya Abdulova bildirib ki, seçkini müşahidə etmək üçün veb-kamera da quraşdırılıb. Dünən saat 17-də artıq 600-ə qədər seçicinin səs verdiyi məntəqədə heç bir problem yaşanmayıb.
43 saylı II Sumqayıt Seçki Dairəsinin 27 və 28 saylı seçki məntəqəsində də vəziyyət analoji olub. “Yeni Azərbaycan” təşviqat qrupunun müşahidəçiləri Nailə İsgəndərova və Emil Mütəllibov, “Davamlı İnkişaf Naminə” təşviqat qrupunun müşahidəçisi Lalə Məmmədova, “Hüquq və Demokratiya” təşviqat qrupunun müşahidəçisi Rəhim Adışirinov referendumun gedişatında heç bir qanun pozuntusuna yol verilmədiyini, prosesin şəffaf şəkildə inkişaf etdiyini dilə gətiriblər.
Həmin dairənin 23 saylı seçki məntəqəsində də seçicilər azad şəkildə referenduma çıxarılan məsələlərə öz münasibətlərini bildiriblər. Müşahidəçilər bütünlüklə prosesin demokratik və qanunauyğun şəkildə inkişaf etdiyini dilə gətiriblər.
Dairənin 25, 26, 3 və 2 saylı məntəqələrində də vəziyyət olduqca yüksək səviyyədə olub. Seçici fəallığı ilə müşayiət olunan prosesdə azad seçim etmək üçün seçicilərə bütün şərait yaradılmışdı.
41 saylı Sumqayıt I Seçki dairəsində də seçicilərin azad, şəffaf və ədalətli şəkildə referenduma çıxarılan məsələlərə münasibət bildirməsi üçün şərait yaradılmışdı. Dairənin 16 saylı seçki məntəqəsində müşahidə aparan Vətəndaş və İnkişaf Partiyasının müşahidəçisi Yaqut Nağızadə səsvermə zamanı heç bir qanun pozuntusuna yol verilmədiyini deyib. Onun sözlərinə görə, prosesə heç bir kənar müdaxilə olmayıb. “Yeni Azərbaycan” təşviqat qrupunun nümayəndəsi Sitarə Abdulova da səsvermədə heç bir qanun pozuntusuna yol verilmədiyini bildirib. “Hüquq və Demokratiya” təşviqat qrupunu təmsil edən Kəmalə Mehdiyeva müşahidə apardığı seçki məntəqəsində seçicilərə qarşı hər hansı bir qanun pozuntusuna rast gəlmədiyini söyləyib. Şəxsi təşəbbüslə səsverməni izləyən Qafar Sultanov da seçkidə hər hansı bir qanun pozuntusuna yol verilmədiyini deyib.
Dairənin 19 və 20 saylı məntəqələrində də vəziyyət olduqca normal şəkildə inkişaf edib. 20 saylı məntəqədə seçkini müşahidə edən Vətəndaş Həmrəyliyi Partiyasının nümayəndəsi Azər Eynullayev də səsvermənin olduqca şəffaf şəkildə keçirildiyini bildirib.
14 və 28 saylı seçki məntəqələrində də heç bir qanun pozuntusu qeydə alınmayıb. Məntəqədə müşahidə aparan nümayəndələr bildiriblər ki, günün ikinci yarısında olduqca yüksək aktivlik müşahidə olunub. İnsanlar böyük həvəslə məntəqələrə gələrək referenduma çıxarılan məsələlərə münasibət bildiriblər.
Sumqayıt 43 saylı seçki dairəsinin 2 saylı məntəqəsində də referendum uğurla keçib. Müşahidəçilərdən Tünzalə Həbibova və Esmira Mirzəyeva seçicilərin səsvermədə yüksək səviyyədə iştirak etdiklərini deyiblər. 3 saylı məntəqənin müşahidəçiləri Hidayət Mustafayev və Rəvanə Qurbanova da səsvermənin şəffaf məcrada inkişaf etdiyini bildiriblər.
Sumqayıt şəhərində seçkilərin azad, şəffaf şəkildə keçməsini şəhərdə müşahidə missiyasını həyata keçirən xarici ölkələrin müşahidəçiləri də təsdiqləyiblər. Şəhərin müxtəlif dairələrində müşahidə aparan belaruslu müşahidəçilər Vasili Buşçik və Natalya Buşnaya səsvermənin ədalətli və azad şəkildə baş tutduğunu önə çəkiblər. Onlar Sumqayıtda ümumxalq səsverməsində seçicilərin fəallığını yüksək qiymətləndiriblər: “Biz 17, 18, 23 və 33 saylı seçki məntəqələrində olduq. Hər yerdə xalqın öz iradəsini sərbəst ifadə etməsi üçün maksimum rahat şərait yaradılıb. Məntəqə seçki komissiyaları üzvlərinin öz vəzifələrinə məsuliyyətlə yanaşdıqları hiss olunur. İnsanlar məntəqələrə həvəslə gəlirlər, bəzi yerlərdə növbələr müşahidə olunurdu. Bütövlükdə bizdə referendumun gedişi ilə bağlı xoş təəssüratlar yaranıb. Biz bu işdə təsadüfi adamlar deyilik. Belarus Mərkəzi Seçki Komissiyasının üzvləri kimi, belə siyasi kampaniyanın keçirilməsinin bütün çətinliklərini bilirik. Ona görə də, xalqınızı belə yaxşı təşkil olunmuş ümumxalq səsverməsi münasibətilə təbrik edirik. Dövlətinizə və xalqınıza tərəqqi arzu edirik və bahar bayramı münasibətilə təbrik edirik”.
Pərviz SADAYOÄžLU

Paylaş:

Baxılıb: 1456 dəfə