Mingəçevirlilər də Referendum Aktının lehinə səs verəcəklər

Bakı:

26 °C

83 %

2 m/s

Əlaqə

AZ RU EN

Ana səhifə / Gündəm / Mingəçevirlilər də Referendum Aktının lehinə səs verəcəklər

Mingəçevirlilər də Referendum Aktının lehinə səs verəcəklər

11.03.2009 [15:37]

Martın 18-də keçiriləcək referendumla əlaqədar “Yeni Azərbaycan” və “Vətəndaş cəmiyyəti” referendum üzrə təşviqat qruplarının üzvləri dünən Mingəçevirdə seçicilərlə görüşüblər. “Yeni Azərbaycan” təşviqat qrupunun Mingəçevir şəhər şöbəsinin sədri Cavanşir Yusubov vurğulayıb ki, Azərbaycan Respublikası Konstitusiyasına əlavə və dəyişikliklər edilməsi təklifi xalqın iradəsindən irəli gəlir: “Biz Yeni Azərbaycan Partiyasının rayon təşkilatı olaraq, daim vətəndaşlarla işləyirik, hər gün xeyli sayda sakinlərlə görüşürük. Mən tam əminliklə deyə bilərəm ki, bu ideya rəsmiləşməzdən əvvəl xalqda belə bir istək, arzu var idi. çünki hamı dövlətimizin inkişaf etdiyini, qüdrətləndiyini görür və bu inkişaf tempi ilə ayaqlaşmaq üçün hüquqi müstəvidə də dəyişikliklər edilməsinin zərurətini dərk edir”.
Sonra çıxış edən “Vətəndaş cəmiyyəti” təşviqat qrupunun vəkili, “Səs” qəzetinin baş redaktoru Bəhruz Quliyev qeyd edib ki, Azərbaycan bu gün həyata keçirdiyi demokratik islahatların genişliyinə və əldə edilən sosial-iqtisadi nailiyyətlərə görə, dünyada ən qabaqcıl və qüdrətli ölkə hesab edilir: “Bu, beynəlxalq təşkilatların mütəmadi hazırladıqları hesabatlarda dəfələrlə öz əksini tapıb. Son prezident seçkilərində Azərbaycan dövləti və xalqı bir daha demokratik dəyərlərə sadiqliyini nümayiş etdirdi. Bu, təsdiq edir ki, ölkəmizdə demokratiya institutu təkmilləşir, müasirləşir, mütərəqqi qanunların tətbiqinə diqqət artırılır. Xüsusən, nəzərdə tutulan Konstitusiya dəyişikliklərində ölkə vətəndaşlarının sosial həyatına dövlətin qayğısını artırır”.
Sonra çıxış edən tarix elmləri doktoru, Gəncə Dövlət Universitetinin professoru Həsənbala Sadıqov dəyişikliklər barədə məlumat verib. İlk olaraq, Konstitusiyanın 12-ci maddəsinə təklif olunan əlavə haqqında danışan natiq xatırladıb ki, bu əlavədə göstərilir ki, Azərbaycan Respublikasının vətəndaşlarına layiqli həyat səviyyəsinin təmin edilməsi dövlətin ali məqsədidir. Azərbaycan dövləti zənginləşdikcə, dövlətin maddi imkanları gücləndikcə, artıq öz vətəndaşlarının layiqli həyat səviyyəsi ilə təmin edilməsi haqqında düşünür.
Millət vəkili Məcnun Şükürov isə deyib ki, təkliflərdə insanların şəxsi həyatına müdaxilələrin qanunla qəbul olunmuş qaydalara uyğun müdafiəsinin təşkili mühüm yer tutur. Eləcə də, uşaq hüquqlarının qorunması, onların həyatına, mənəviyyatına, sağlamlığına təsir edə biləcək halların qarşısının alınması üçün dövlət nəzarətinin artırılması, vətəndaşların hüquqlarının qorunması, insanların vəzifələrinin yalnız Ali Qanunla müəyyənləşdirilməsi kimi maddələr Konstitusiyaya təklif edilən əlavə və dəyişikliklərdə öz əksini tapıb.
Görüşdə seçicilərin çoxsaylı suallarını cavablandıran təşviqat qruplarının üzvləri seçiciləri referendumda fəal olmağa və Konstitusiya islahatlarına səs verməyə çağırıb. Tədbirdə fikirlərini bölüşən iştirakçılar isə Konstitusiyaya təklif edilən əlavə və dəyişiklikləri mütərəqqi islahat kimi dəyərləndirib və 18 martda keçiriləcək referendumda fəal iştirak edəcəklərini diqqətə çatdırıblar.

Paylaş:

Baxılıb: 1715 dəfə