20 iyun seçkiləri Ermənistana vətəndaş müharibəsi vəd edir

Bakı:

24 °C

71 %

3 m/s

Əlaqə

AZ RU EN

Ana səhifə / Dünya / 20 iyun seçkiləri Ermənistana vətəndaş müharibəsi vəd edir

20 iyun seçkiləri Ermənistana vətəndaş müharibəsi vəd edir

08.06.2021 [09:00]

Məlum olduğu kimi, iyun ayının 20-də məğlub Ermənistanda növbədənkənar parlament seçkiləri keçiriləcək. Artıq seçkiqabağı təşviqat-təbliğat kampaniyasına rəsmən start verilib. Yerli medianın mərkəzi seçki komissiyasına (MSK) istinadən yaydığı məlumata görə, 7 iyun tarixindən başlayan seçkiqabağı təşviqat-təbliğat kampaniyasının müddəti 19 iyuna qədər davam edəcək. MSK seçkilərdə iştirak edəcək 4 bloku və 22 partiyanı rəsmi olaraq qeydiyyata alıb.
Qeyd edək ki, seçkilərdə iştirakını elan edən siyasi qüvvələr Paşinyanın komandasının hakimiyyətdən kənarlaşdırılmasını əsas hədəf kimi qarşıya qoyur. Amma seçkiqabağı blokların və ittifaqların formalaşması mümkün olsa da, 7 iyuna qədər aparılan rəy sorğuları səslərin ciddi şəkildə parçalanacağını göstərir.
Sonuncu rəy sorğusunun nəticələrinə görə, parlament seçkilərində müstəqil olaraq iştirak edən hakim partiya irəlidə olsa da, qələbə qazanmaq şansı xeyli aşağı düşüb. “News.am” yazır ki, N.Paşinyanın rəhbərlik etdiyi “Vətəndaş müqaviləsi” partiyasının gözlənilən səs faizi 22-yə düşüb. Onun ardınca 20 faizlə “Ermənistan” seçki bloku gəlir. Digər blok və partiyalara gəlincə, “Çiçəklənən Ermənistan” partiyası və “Şərəfim var” blokunun səsləri 4 faizə yaxın hesab edilir.
Mövcud hakimiyyətin nüfuzdan düşməsini digər rəy sorğularından da görmək mümkündür. “Armenia today”in yaydığı məlumata görə, “Gallup” beynəlxalq assosiasiyasının Ermənistan nümayəndəliyi tərəfindən aparılan və ölkənin bütün regionlarından 1100 respondentin iştirak etdiyi telefon sorğusu da bunu sübut edir. Həmin rəy sorğusuna görə, baş nazir vəzifəsini icra edən N.Paşinyanın fəaliyyəti vətəndaşların 27,2 faizi tərəfindən müsbət qiymətləndirilir. Nəşr yazır ki, rəyi soruşulan respondentlərin 55,3 faizi isə parlament seçkilərində mütləq iştirak edəcəklərini bildiriblər.
Sabiq spiker Qalust Sahakyan da yeni parlamentin necə formalaşacağı barədə proqnoz verib. “Sputnik-Ermənistan”a müsahibəsində Q.Sahakyanın verdiyi proqnozlara görə, 5 siyasi qüvvə yeni parlamentdə yer tuta biləcək: “Çox güman ki, “Şərəfim var” və “Ermənistan” blokları, “Çiçəklənən Ermənistan” partiyası və hakim partiya mandat əldə edə biləcək. Beşinci qüvvənin kimliyi barədə cavab verməkdə çətinlik çəkirəm”.
Sahakyan hesab edir ki, saxtalaşdırmalar olmasa, Paşinyanın partiyası seçkilərdə 20-22 faiz səs əldə edə biləcək. Onun fikrincə, səslərin 60 faizinə iddia edən hakimiyyət hər vasitə ilə seçki nəticələrini saxtalaşdırmağa çalışacaq.
Bu arada, “News.am” yazır ki, “Maariflənən Ermənistan” partiyasının sədri Edmon Marukyan deyib ki, seçki ərəfəsində həmrəylik və birlik rədd edilirsə, onun alternativi vətəndaş müharibəsi və qarşıdurmadır. O, bildirib ki, Ermənistanın vətəndaş müharibəsi astanasında olduğunu proqnozlaşdırmaq mümkündür.
Göründüyü kimi, bəzi ekspertlərin fikrincə, parlament seçkilərinin nəticələri ciddi toqquşmalara gətirib çıxara bilər. Seçkilərdə yeni hökumətin qurulmasına mane ola biləcək ehtimallar onu deməyə əsas verir ki, 20 iyun seçkiləri Ermənistana vətəndaş müharibəsi vəd edir.
Qaşqay ZİYƏDDİNOĞLU

Paylaş:

Baxılıb: 856 dəfə